MANGMUHNAK 1 - Ngawm Bible

Johan i Mangmuh

¹ Hi thu hi Jesuh Khrih i phuanmi hi: A hengpal tukmi nate, a sila tei lakah langtik tukin Pathian in, a lakah a phuanmi hi. Mahmi cu Khrih in, a vancungmi pa khat hahin, a sila Johan lakah a theihtikmi hi.

² Johan in, a muhmi hempoh cu hilh khawng hi. Pathian lak pen a hungmi thuthang le Jesuh Khrih i theihtikmi thutak cu Johan in hi bangin hilh hi.

³ Hi laibu a sialtu le profet i phuanmi thu a zatu le a sung a ngatmi a zuitute cu thupha co mite haw hi. Itahim titale hi thute a kimnak tuk hun nai zo hi.

Pawlpi Salih Tei Lakah Nuksatnak

⁴ Asia ngamsung a ummi pawlpi salih tei lakah keimah Johan in hitin nuksat ing. Tu laih takin, a ummi le a um awng zo mi le mailam hei ah a um tuk laihmi Pathian le a kumpi khunnak mai a ummi hawvang salih le,

⁵ A muanhuai theihpihtu, hin masakbel Capa, thihnak pen thawh kiklehtikmi leihum kumpite uktu Jesuh Khrih i hehpihnak le lemdaihnak thupha cu nohtei humah um tahen. Ohte it in, a thihnak hangin sualnak pen luattik zo hi.

⁶ A Pathian le a pa i nadektu hi tukin ohte cu kumpi le thiampi phunin, a bawlsaktu Jesuh Khrih lakah sunloihnak le huham cu kumkhua in um tahen! Amen.

⁷ Zo un! Khrih cu meingo hum pen hung tuk a, mi hempoh ten mu haw tuk hi; amah a suntute vangin mu bok haw tuk hi. Leihum mi hempoh ten sikkikin, kap haw tuk hi. Mahtin um tatak tuk hi! Amen.

⁸ Cungnungbel Topa Pathian in, “Kei cu Alfa le Omega, ihempoh i bulpatnak le a tawpnak ing.” A bosa hun, tu hun le a heng tuk laihmi hunah hei in, a um leleng tukmi ing, ti hi.

Johan In Khrih A Muhnak

⁹ Keimah cu na unaupih uh Johan ing hi, Jesuh i nungzuitu pa khat ka hihnak hangin nangmuhte tuah langkhatin Khrih uknak sungah a teltu tei hum a haksat thuaknakte ah, a thuak litu bok ing hi. Pathian thu le Jesuh i phuansuahmi thudik ka hilhnak hangin Patmos tuikulhah a koihmi haw ing.

¹⁰ Topa i Ni in, Hawvang tuah ka dim laih takin, ka nunglam pen pengkul aw bang awn ngingzet za ing.

¹¹ Mahmi aw, ngingin, “Na muhmi hilai sungah ngan inna, mah laibu cu Efesa, Smyrna, Pergamum, Thiatira, Sardis, Filadelfia le Laodisia khua salih a ummi pawlpi tei lakah kuatin,” ti hi.

¹² Mahtin a titu cu akua him tin hekkikin ka zoh ten sui meivaknak salih mu ing.

¹³ Mah meivak tei lakah, mihing bang pa khat angki cualpi a ke mit tian silhin, a awmah sui awmkilh kilhmi mu bok ing.

¹⁴ Mahmi pa i sam cu tuumul le vuk bangin ngo hi. A mit cu mei alh bang hi.

¹⁵ A ke cu pumsuknak meiling sungah haltui celh ten tah lehmi daal bangin de hi. A aw cu teusang tuicak aw bang hi.

¹⁶ A taklam khutin aksi salih na cawi a, a kam sung pen lang nih hiam namsau pa khat tul hi. A maicang cu suun laihtak ni bangin khap hi.

¹⁷ Mahtin ka muh ten mithi bangin a kebulah lum ing. A taklam khut cu ka humah nga in, “Lau pahsun, Keimah cu a bulpatnak le a tawpnak ing hi;

¹⁸ A nungmi hei hi ing. Thi zo na vengin atu-in kum zangza ca in nungleh zo ing. Thihnak le mithi khua ah thuneitu ing hi.

¹⁹ Mah hangin na muhmi nate, tulaihtak a, a ummi le mailam a, a um tuk laihmite hi nganin hi.

²⁰ Ka taklam khut a na muhmi aksi salih le sui meivaknak salih tei sullam thu-ip cu hitih bangin hi. Aksi salih cu pawlpi salih tei vancungmite hi haw a, mei vaknak salih cu pawlpi salih hi haw,” ti hi.