KOLOSE 1 - Ngawm Bible

¹ Kolose khua a ummi Pathian i mihing, Khrih tuah na pehzopnak uh i hangin muantakmi Khristian unaupihte aw, nangmu lakah,

² Pathian i lungkimnakin Khrih Jesuh i palai keimah Paul le Khrih sungah a unau uh Timote in laikuat ung hi. A Pa uh Pathian in, a thupha le lemdaihnak thupha pia zal tahen.

Lungdamsat Thungetnak

³ Nangmu ca thu ka nget sial uhten a Topa uh Jesuh Khrih Pa le a Pathian uh i lakah lungdamnak thu hilh leleng ung hi.

⁴ Ita lungdamnak thu hilh kam ung titale Khrih Jesuh na upnak uh le Pathian i mihing hempoh tei lakah itnak na neih uh khi ka zak uh hangin hi.

⁵ A manmi Thuthangpha na nel uhah a hen tungin, iti bang muansannak pia him tih cu nangmuh ten thei uh ci. Mah hangin upnak le itnak na neih uhmi cu vancungah nangmu ca in cangkim zetin koihsami muansannak humah bulphuh haw hi.

⁶ Pathian i hehpihnak na theih masakbel ni uh pepan atu tian, Thuthangpha in muicu cu nohtei lakah henpihin leihum khua hempoh ah zaitik hi.

⁷ Pathian i hehpihnak cu Epafras i lak pen na theih uhmi hi. Amah cu ka ih zetmi ka nadehpih uh, keimu ai-awhin muantak zetin Khrih i nadektu hi.

⁸ Amah in Hawvang i piakmi itnak na neih uhmi thute hilh hi.

⁹ Hitih bangin na thu le la uh ka theihbek uhten nangmu ca thungen leleng ung. Pathian in ama deihnak theih theihnak tukin Hawvang i piakmi cihnak le theihtupnak tuah a dimtiknak tukin Pathian nelah ngen ung hi.

¹⁰ Mahten Topa i deihnak bangin nung thei tuk uh ci, amah lungdamtik leleng thei tuk uh ci. Mahten na nunnak uhin ngah pha a phunkim ngah tuk a, Pathian na theihnak uhah khangto pepel tuk uh ci.

¹¹ Ihempoh na tawh uhten thinsaunak le thuak theihnak nei tukin Pathian sunloihnak pen a tulmi thazaangin ngilnak pia zal tahen.

¹² Vaknak ngam sungah Pathian in, a mitei ca tukin a koihmi cu a cotu hi bok tukin a semsuahtu Pathian cu lungdamin thangphat un.

¹³ Amah in khuathimnak huham sung pen ohte pan suakin, a Capa i uknak sungah ohte tumpih zo hi;

¹⁴ A Capa i thisan hangin sualzahnak ngah hung a, miluat hi zo hung hi.

Khrih i Mihing A Hihnak le A Nadeh

¹⁵ Khrih cu muh theih ngawlmi Pathian i mel langnak hi. Amah cu ca upabel hi a, bawlmi thil hempoh sangin humtabel hi.

¹⁶ Itahim titale Pathian in Khrih i sung pen ihempoh vancung le leihumah hihen, muh theihmi le muh theih ngawlmi hihen, hawvang lam cahnak huham neitute, bawite, uktute le thuneitu hei hihen bawl hi. Pathian in van le leihum hempoh Khrih sung pen, bawlin, Khrih ca in hulawmdun khawng tukin bawl hi.

¹⁷ Khrih cu ihempoh tei umlaih ngawlin um zo in, amah tuah a pehzomnak haw hangin ihempoh cu amu umnak tuk tek nei haw hi.

¹⁸ Pawlpi cu Khrih i taksa pumpi hi a, Khrih cu a lu hi. A pumpi i nunnak bulpi cu Khrih amah hi. Amah cu capa tawntil hi a, ihempoh i humah pa khatnak a hih lelengnak tukin thihnak pen thawhlehtik hi zo hi.

¹⁹ Capa in ama sungah Pathian hihnak cangkimin, a neihnak cu amah Pathian i leitek sa hi.

²⁰ Mahten a Capa i sung pen lei le van cu Pathian i lakah kiklehtik nuam hi. Pathian in, a Capa thinglamteh hum a, thisan i hangin van le lei a thil hempoh tuah lemnak bawlin mahten ama lakah pui kikleh hi.

²¹ Ni dangin thilpha ngawl na bawlnak uh hangin le na ngaihsut uh hangin, Pathian tuah khawladunin, a ngal hi uh ci.

²² Mahnaven atu-in, a Capa i taksa pum loli in thihnak a thuaknak i hangin, Pathian in, a ngualcamin bawl hi. Mahtin a bawlnak cu a mai ah mi thiangtho, sualnak nei ngawlin le sonbang ngawlin hentik a nuamnak hangin hi.

²³ Mahti bang a hih hangin na bulpatnak uh a kho zetmi humah kho zetin upnak tuah ding leleng un hi; Thuthangpha na zaknak uh pen na co ngah uhmi muansannak tuah kuamah in khen haw pahsuh hen. Hi Thuthangpha i ca in, keimah Paul hi, nadektu hi ing a, leihummi hempoh tei lakah a hilh haw mi Thuthangpha hi.

Paul i Pawlpi Ca Nadehnak

²⁴ Nangmu ca haksatnak ka thuakmite hangin lungdamnak nei ing hi; itahim titale ka pumpi in ka tawhmi thuaknak i hangin, Khrih in ama pumpi pawlpi ca in haksatnak a tawhmi khi kimtik bok ing.

²⁵ Kei cu pawlpi nadektu in bawl zo hi. Hi nadeh a piakmi cu nangmu nemcuamnak tukin hi. Mahmi cu Pathian i Thuthangpha cangkim zetin phuanmi khi hi.

²⁶ Mah Thuthangpha cu khang tampi sung a koi hinnam lakah hei hihen, phuang ngawlin ipcihmi hi a, tu bek hah a mihing tei lakah phuanmi Thuthangpha hi.

²⁷ Pathian i tuptahmi cu mi hempoh tei ca in ngaihsutsa mi a sunglawi le nalamdang thu-ip cu atu-in, a mihing tei lakah langtik tukmi khi hi. Mah a thu-ip cu nangmu sungah a ummi Khrih a tihnuammi a hih hangin Pathian i sunloihnak khi kawm bok tuk uh ci tihnak hi.

²⁸ Mah hangin a kuakua i lakah hei in Khrih cu phuang ung hi. Mi hempoh tei humah cihnak ka neih uhmi hempoh mangin ngallinnak thu hilhin zilh ung hi. Mahti bangin ka tihnak cu akua abang hei hihen Khrih tuah a pehzopnak haw i hangin, Khristian piting hi in, Pathian mai ah henpih ka nuam uh hangin hi.

²⁹ Ahi cu deksuak tukin amah Khrih i piakmi cahnak, ka sung a, nadektu mangin nase zetin thuaklo in, nadek li ing.