KAH LA 2 - Ngawm Bible

Topa In Jerusalem Dantat

¹ Topa cu a thinuk hangin Zion cu thimnak tuah khuh hi; A sunloihnak cu van pen lei ah khesuk hi. A thinuk ni ten, a Biakinn tian nunghek hi.

² Judah ngam khuano hempoh, siatsuah khawng hi. Ngaihsut saknak imah um ngawlin a ngal kulhtiante phelet khawng. A ngam haw hupin, panmun a khualnak haw, ngal kulhtiante cu zahcak mualphonak hengtik hi. A uktu tei humah le a uknak haw ah in.

³ A thinuknak tuah Israel i ngilnak cu sat tawng khawng hi. A baan zaksa cu dok kiklehin, ngal tei a do haw ten mei alh bangin ka humah alh dudumin, na hempoh siatsuah khawng hi.

⁴ Ngalte bang bokin a thalcang tuah keimah kapin, ka min phatnak hempoh uh cu amah in susia khawng hi. Hi Jerusalem khuapi sungah, a thinuknak mei alh bangin thuak ung.

⁵ Topa in, ngalte bangin Israel bawlsia khawng zo. A khua kulhtian haw le a kumpi innte cu buakseh bangin suaktik zo. Judah mipi tei humah a bo thei ngawl thasiatnak hengtik zo hi.

⁶ Amah ka biaknak uh Biakinn pi cu keh bilhbelhin sepkeh khawng hi. Ka can uhmi nite, Sabbath ni le ni thiangthote cu susia khawng zo hi. Kumpi le thiampite vangin a nase zetmi a thinuknak cu thuak haw hi.

⁷ Topa in, a biaklandawh le a biakinn thiangtho nangawnin zamsanin, biakinn kulhtiante cu ngalte phelettik khawng hi. Pathian ka biaknak uh munah ngal nehnak aupih het haw hi.

⁸ Topa in, Zion kulhtiante cu siatik loli tukin a tumtah hamsa khawng hi. Taitan dawhmi innte le a kulhtiante cu sia bilhbelh khawng zo hi.

⁹ A kongkate cu buaksehmi sungah khuh khawngin um hi. A kongholhte vang ek khawng. Kumpi le bawi upate cu sal matmi thawngkhiaknakah heng khawng zo haw hi. Topa i lak pen profet ten muhnak neileh ngawltohin, Daan cu kuamah in zilh haw ma toh hi.

¹⁰ Jerusalem putekte cu, lei ah dap diudeu in khungthong haw hi. A lu ah vutzakin, a pumpi hawah thangkhau puan khuh haw hi. Jerusalem khanglaite cu lei tawngkha tianin, a lu kun haw hi.

¹¹ Ka kahnak hangin ka mit kha khawng. Ka lungmu tamnakin ka lungbing khawng; Ka mihingte bawngsiatnak a tawh haw hangin ka thasia leita in, pel li thong ing. Naupang le naumomte, khuapi lampi lakah lum haw hi.

¹² Dangdum le ngilkialin, nu aw, tin kap haw hi. Lampi humah maliam thuak bangin, lum haw a, dem hehetno in, a nu le pa tei ang humah, a nunnak haw bo hi.

¹³ Maw, Jerusalem, deih awh zetmi Jerusalem, ikaw ka otleh tuk toh? Itih bangin kaw ka hehnem theih tuk? Nang bangin a thuaktu um awng haw ma hi. Na meima hi tuipi thuanthum bangin thuk a hih ten akua kaw a damtik thei tuk?

¹⁴ Na profet ten zolthu a son haw tih ngawl hilh tuk nei dang haw ma! Zolthu bek a hilh haw hangin, na sualnak le phuang awng sih haw ma! Thuman ngawl a hilh haw hangin, sihkiknak kul ngawlin ngaisung ci.

¹⁵ Na el a hawhtu ten, zawnsak nautatnak tuah zo haw hi. A lu haw thingin, Jerusalem siatlalnak cu nuihcip haw hi. “Hihi maw khuapi mawibel a tih haw mi cu? Leihum buppi i uangthuan pih zetmi cu na hi maw?” tin ti haw hi.

¹⁶ Na ngal ten nautatin, huatnak mit tuah zo haw hi. A muk haw cipin, nuihcip haw a, siatsuah khawng zo ung. Ka ngahhelh uhmi ni cu hihi, hi,’ tin ti haw hi.

¹⁷ Topa in, bawl tung hi a tih leleng bangin bawlsuak ngangai zo hi. Ngallinnak a piak hamsa bangin, hehpihnak nei ngawlin bawlsia khawng zo. Ka ngal tei lakah, nehnak pia hi. Ka siatlal khawng uh hangin amuhte cu lungdamtik hi.

¹⁸ Maw Jerusalem, na kulhtian ten au haw henna, na hitui cu sun le zanin, nguntui bang luang hen. Na ca in colh ni um ngawlin na hitui vang hul ni nei ma hen.

¹⁹ Zankhua tho lelem inna, Topa cu sam lelemin hi. Topa i mai ah na lungmu natnak cu tui bangin luangtik inna, lamkawi tihkimah a thi awn tohmi na canote, an ngawlin a thi khawng awn tohmi na cano tei ca in baanzakin hehpihnak ngenin hi.

²⁰ Maw Topa! Zo hemin, na bawlsiat lihmite hi zo hemin hi. Numei ten a ihzet haw mi a cano tei cik cu ei haw hi. Thiampi le profette cu Biakinn pi sung loli pen that haw hi.

²¹ Khangno le upa ti ngawlin thi haw a, khuapi lampi ah khanglai le tangvalte vang thi haw hi. Hehpihnak nei ngawl tei ngalnam tuah that ci.

²² Ka ngalte cu puaisim tuk bangin khua tihkim pen zawm ci. Na thinuk ni ten a luat theitu kuamah um haw ma. Ka ihzetmi ka canote thah sak khawng haw hi.