KAH LA 1 - Ngawm Bible

Jerusalem Khaw-ngaihnak

¹ Hun khat laihin, ngimta zetin, a umnak haw, Jerusalem cu vengzetta hi. Leihum khuap a thupibel khuapi hi. meivong bangin suak zo hi! Miphun kim umnak khuapi cu, sal matmi in cang zo hi.

² Zankhua kap ua-uahin; hitui a biangah luangsuk kukuih? A nemtu tuk ngualcam pa khatno hei um haw ma toh. A phial pih ten naunehin, mi hempohin langpang haw hi.

³ Judah mite cu pantu tuk nei ngawl sal bangin a inn haw pen hawl tul haw hi. Miphun dang tei ngamah um haw a, ka ngam tih tuk nei ngawlin! Ngal ten kil khawngin, luat theihnak tuk lampi nei haw ma.

⁴ Ni thiangtho ni ah Pathian bia tukin, a kuamah Biakinn ah hawh haw ma toh. Mahlai a, lasatu khanglai ten bawlsiatnak thuakin, thiampite tau haw hi. Khuapi kongkhah humah um haw ma toh, Zion in thinnatnak thuak hi.

⁵ A ngal ten neh haw a, a khut sung hawah suum haw hi. Topa amah in thuaktik a, a sualnak a tam leita hangin, a canote cu sal tukin puivawk haw hi.

⁶ Jerusalem i sunloihnak cu bo zo hi. A hotute cu a nawmtam zetmi sazuk bang haw hi. Sakap thiam mai pen a tai haw ten, tha nei viang haw ma.

⁷ Jerusalem cu a sia zo hangin khawngaihhuai em thong. Ni dang laihin, a sunglawi dante phawk kik mek haw hi. A ngal tei sim ten kuamah bawmtu nei haw ma. Ngal neh ngawl a hih haw hangin nuihsanin, zawnsakin, caksuk hawta hi.

⁸ Maizah tak a hihnak cu bo zo, thacangin um a hih haw ten zakca haw hi. A khawngaih hangin kap li in, a zakca in, a mai hup hi. Jerusalem in sualnak lauhuai a bawl zo hangin, lauhuaizet hi.

⁹ A thianthoh ngawlnak cu, muh paih thei thong hi! A mailam thu cu ngaisung kha sapma. A thasiatnak a nase leita hangin kuamah in nem thei haw ma. A ngal ten a neh zo haw hangin Topa lakah hehpih kun hi.

¹⁰ A ngal ten a nate lonsak khawngin, Biakinn sungah a tumpih laihtak haw mu hi. Topa in Gentail tei hawh tuk a khammi mun cu mu hi.

¹¹ Eih tuk pa kha khat zei in, a mihingte cu tau li haw hi. A nuncak theihnak tukin a na manpha haw cu an tuah hek haw hi. “Topa hu zo hemin,” tin, a khuapi haw cu au hi; “Ka haksat daan uh muhsakin hi!”

¹² “Hu zo hem un!” tin au in, a elah a hawhtu hempoh tei lakah, Topa i piakmi natnak hi, ka hum a thinuk ten kuamah in ka thuakmi natnak zah cu thuak awng haw ma.

¹³ Humlam pan mei alh khesukin, ka nguh sungah a alhmi mei hi. Keimah awk tukin thangsiahin, leihumah lumtik hi. kei cu zamsanin, catngawlin natnak thuaktik hi.

¹⁴ Ka sualnak hempoh cu cazin sungah khum khawng; A venghawng munkhatah kenin, ka ngawngah khaih hi. Ngit leita in delhsuk lo hi. Tha nei ma toh ing. Topa in, ka ngal tei khut sungah hengtik hi, ka ca in, a ngil leita haw hangin phe thei mang hi.

¹⁵ Topa in, ka ngalkap ngilbelte cu nuihsan thong hi. Ka tangval that tukin a ngalkap hon khat hah hi. Sabit bangin ka mihingte ngawi hi.

¹⁶ Mah hangin hi ka kahnak, ka hitui nial tui bangin a luan. Hehnemtu kuamah nei mang, thathotiktu kuamah um haw ma, ka ngal ten neh zo haw a, ka mihingte imah nei haw ma toh.

¹⁷ Bopnak deihin, ka baan phalh naveng kuamah in bawm haw ma. Topa in ngalte samin, khua tihkim pen zuan haw hi. Amu lak pen imah hi mang, ningdelhhuai thil hi thongpoh ing.

¹⁸ Mahnaven Topa cu dik hi, a thu eltu ka hih zo hangin hi. Maw miphunte, hu ngai hih teh un, ka thuak daan hi zo hem un. Salmatnak mun ngam khua lapi ah ka leng le valte pai zo haw hi.

¹⁹ Keimah a pantute sam ing. Mahnaven bawm nuam haw ma. Nuncaknak a zeinak haw pen khuapi sung lampi tuanah, thiampi le hotute thi haw hi.

²⁰ Topa aw, ka thuaknak le ka apthong dan hi zo hemin hi. Ka thinna in, ka lungmu keh hi, nang ka langpang sual hangin lampi humah thahdunnak umin, innsung hei ah thihnak heng.

²¹ Ka taunak hu ngaihsak inna, keimah a hehnemtu kuamah um haw sih ngawl. Ka humah siatlalnak na hentik hangin ka ngal ten thincim haw hi. Na tepsa mi cu hengtik nawm inna, ka thuak bangin ka ngal ten thuak bok haw tahen.

²² “A bawl haw hempoh cu na mai ah lang khawng hen; A phatngawlnak haw hangin amuhte cu bawlsia in hi. Ka sualnak hangin na bawlsiat zo bangin, ka lungbingin, vancaukapin tau ing,” ti hi.