JUDE 1 - Ngawm Bible

¹ Khrih i nadektu le James i nau keimah Jude in, Pathian i sammi, Pa Pathian i ihmi le Jesuh Khrih i humhimnak sungah a ummi tei lakah hi laikuat hi ngan ing.

² Pathian hehpihnak, lemdaihnak le itnak thupha cu cangkim zetin nangmuta hi tahen.

Zilhtu Manngawlte

³ Ka ihmi u le naute aw, a venghawng uhin, a pom ten uhmi nunpatnak thu hi ka theihzahno in, nangmu lakah lai tuah ngan ing hi; Pathian in, a mihing tei lakah kumkhua phaat tukin a piakmi upnak thu ah thasuahin tang unna, zuam un tin, a dang saw deuhin, sosuah nuam ing.

⁴ Itahim titale eimuh tei lakah Pathian cu imah in, a simsial ngawltute a theih uh ngawlin tumin, a ngamtat phat ngawlnak haw selcipnak tukin Pathian Thuthangpha cu a ping le pengah hilh haw a, eimuh tei Uktu le Topa Jesuh Khrih cu lawl haw hi. Mahtibang mihingte cu siatsuahnak co haw tuk hi, tin Lai Thiangtho sung pen tanglaihin hilhhamsa khawng zo hi.

⁵ Na theihsa zo uhmi hi. Topa in Israel mite Izipt ngam pen doksuakin, a dawllam ten a um ngawltute cu siatnakah hengtik hi, tih hi na theih tukin deih ing.

⁶ A thuneih theihnak haw sungah um nuam ngawlin a umnak mun a zamsantu vancungmite khi thei leleng un hi. Amuhte cu leihum khuathim sungah kumkhua thik taicin tuah khih comi hi haw in, thukhen Ni ten Pathian in siatsuahleh tuk hi.

⁷ Mah vancungmite bangbok lengin, Sodom le Gomorah khua le a elkim khua ten nupa sualnak bawlin, zoh mawi ngawlin ngamta haw tih khi phawkngil pahsuh un; amuhte kumkhua mei ah dantatnak a thuakmi haw khi mi hempoh tei ca in ngallinnakin, a piakmi hi tih langciang hi.

⁸ Mahti bangbok lelengin, atu khan mihingte vang na hi bok haw a, muhnak nei ing ti haw in, a tisa haw humah sualnak bawl haw hi. Pathian thuneihnak khi nautatin van a ummi mi sunglawite zawnsak haw hi.

⁹ Vancungmi lak pen a upabel Mikhael hei in mahtih bangin bawl ma hi. Moses luang cu akua in co tuk him tin Satan tuah thu a dondun haw ten nautatnak awnkam tuah Satan tamsia ngam ma hi; “Topa in liat hi,” tin ti thong hi.

¹⁰ Mahnaven hi mihingte cu a theihtheih haw ngawlmi thu hempoh cu nautatnak tuah sonsia haw hi. Mahten ngamsate bangin a tisa deihnak tuah a theih theihmi haw thilte cu amuh le muh siatsuahtu in cang hi.

¹¹ Amu ca in lauhuai thong si! A zui haw mi cu Kain i zuimi lampi hi. Tangka deihnak hangin Balaam i bawlmi sualnakah a pumpi pia haw hi. Korah bangin langpangin, siatnakah heng bok haw hi.

¹² Pawlkomnak an na eih langkhat uhten zahcaknak neuno hei nei ngawlin ei le in thahin a noksaktiktu haw hi. Amu ca bek ngaisung haw hi. Huihtheu li naven nguahtui keng ngawl meinim bang haw hi. Cuuk hun hei in ngah a nei ngawlmi thingkung bang haw hi, a zung bongin, a thi mi thingkung bang hi.

¹³ A lauhuai zetmi tuihualpi bangin zahcakhuai a ngamtatnakte haw cu tuicawk bangin lang tuk hi. Aksi leng bang hi haw in, a thukbel khuathimnak munah kumkhua um tukin Pathian in bawlsak zo hi.

¹⁴ Adam pen khang luknak Enok in, hi tei thu le late hilh ham zo hi. Pathian cu a vancungmi, mithiang thawng tampi tuah hung haw tuk hi.

¹⁵ Mi hempoh thukhen tukin le Pathian kihcaknak imah nei ngawlin a ngamta hempoh le Pathian upatnak nei ngawl misual, mullinghah awnkam tuah amah a sonsiatute thukhen tukin hung tuk hi, ti hi.

¹⁶ Himi ten phuciak lelengin, catngawl midang sonsia haw hi; a pha ngawlmi a tisa deihnak zui in, amuh le muh khaisangdunin, amu thuno in, ihempoh a bawl theihnak haw tukin midangte pahcawi li haw hi.

Ngallin Piaknak le Zilhdunnakte

¹⁷ Mahnaven ka ih mite aw a Topa uh Jesuh Khrih i tiikmi tei a zilhnakte haw khi cing un hi.

¹⁸ Nangmuh tei lakah a hilhmi haw cu, “Ni dawlbel hun a hen ten nangmuh a nuihsantu le Pathian kihcaknak nei ngawlin amuh tei lei tisa deihnak a zuitu mihing piang tuk,” ti hi.

¹⁹ Hite cu pawlpi lengkeknak a piangtiktu le tisa deihnak hi ukmi le Hawvang nei ngawltute haw hi.

²⁰ Mahnaven ka ihmi nohte cu a thiangthomi na upnak uh humah khangto pepel un hi. Hawvang thiangtho huham tuah thungen unna,

²¹ a Topa uh Jesuh Khrih in, a hehpihnak tuah kumkhua nunnak a piak tuk ni na ngah uh laihin, Pathian i itnak sungah kho leleng un hi.

²² Khristian hi naven a muangkho ngawltu i humah hehpihnak nei un.

²³ Mite khi mei sung pen suahin, a nun haw pan un hi. Mahten a dang tei humah hehpihnak le kihcaknak langtik un, mahnaven a tisa nopnak i noih khakmi a puante khi hua un.

Muicu Thupha Piaknak

²⁴ Lum le bah tuk ngawlin cingkhawi a, sualnak nei ngawlin lungdamnak tuah a sunglawimi a umnakah a hen theitu,

²⁵ amah bek a Pathian uh le oh Nunpantu lakah a bosa hunah hihen, atu le mailam hunah hihen, kumkhua pen kumkhua tian sunloihnak, thawm ngengnak, ngilnak le thuneihnak cu a Topa uh Jesuh Khrih i hangin a nelah um leleng tahen! Amen.