JOSHUA 7 - Ngawm Bible

Akhan i Sualnak

¹ Topa i thupiakmi cu Israel miten zui ngawlin, lak tuk ngawl a, kham mi hempoh tokkha viang pahsuh un tihmi cu Akhan in, na la hi. Akhan cu Karmi i capa hi, Karmi cu Zabdi i capa hi. Zabdi cu Zerah i casuan hi. Zerah cu Judah miphun hi. Akhan in, na a lak hangin Israel tei humah Topa a thinukzet hi.

² Joshua in Israel mi khenkhat Jerikho pen Ai khua ah ngam zo tukin hah hi. Ai khua cu Bethel pen nisuahnak lam, Bethaven khua elno a, ummi khua hi. Ai khua vilveng tukin hawh haw hi.

³ Joshua lakah “A venghawng uhin hawh kul tukma. Ai khua do tukin mihing thawng nih thawng thum laih hah inna, tham tuk poh. A venghawng uhin do tuk tak ma hi. Mi demno bek haw,” tin hilh haw hi.

⁴ Mah hangin Israel ngalkap thawng thum hawh haw naven Ai khua ngalkap ten nehin, tai khawng haw hi.

⁵ Ai khua ten a khuapi kongka haw pen Shebarim a tih haw mi, suang laknak tian hil haw in, mual nuailam a kihlehnak haw ten Israel ngalkap sawm thum le pa luk that haw hi. Hithu hangin Israel miten ngalnawmin lauzet haw hi.

⁶ Joshua cu a lungsia in, a puan bot kek a, Topa i Thutiam Kuang mai lei ah bok hi. Israel puitute vang thasia in, a lu hum hawah leivul thehin, Joshua lakah taklam tian bok haw hi.

⁷ Joshua in Topa i lakah, “Topa aw, ita Jordan ngun ngalah kai pihin pui nge cim? Amor mitei khut sungah heng tukin le siatsuah tukin ti cim? Ita Jordan ngun ngalkhat lamah um saw ma kam ung?

⁸ Topa aw, Israel mi ngal ten a hil lih haw ten, i kaw ka ot ngam tuk toh?”

⁹ A hilhnak haw thu Kanaan mite le midang ten a zak haw ten, keimuh cu kiimin, cimittik khawng haw tuk hi. Na min sunglawi cu itin kaw na cawisanleh tuk uh ti hi.

¹⁰ Topa in Joshua lakah, “Tho in; ita bok leng cim?

¹¹ Israel mite sual zo haw hi. Zui tukin ka tepsa mi zui haw ma hi. Lak tuk ngawlin kham mi na la haw hi. Ngu in, na dang lakah selin, im haw hi.

¹² Hih thu hangin Israel miten ngal na do theihngawlnak uh hi. Ngaldonak mun pen nungkikin tai uh ci, mah hangin atu-in siatsuah khawng hi tuk uh ci. Na nguk uhmi nate na siatsuah khawng uh ma tale na lak uhah um tukma toh ing.

¹³ Tho in hi, na mihingte a sualnak haw thiangtik inna, keimah tawk tukin ngalling haw hen. Zingten keimah tawk haw hen, phano in hilhin; itahim titale keimah Israel Pathian in, a lak hawah ka ot nuammi cu hi tin hi, ‘Maw Israel tei lak tuk ngawl ka tihmi nate la uh ci. Mah nate na vawk khawng laklawh uh cu na ngal uhte neh tukma uh ci.

¹⁴ Mah hangin zinglamin, a hinnam tetekin tul unna, Topa i tenmi hinnam sung pen a hinnam tetekin tul un hi. Topa in teng tuk a, Topa i tenmi hinnam sung pen, innkua, innkua in tul leleu un. Topa i tenmi innkua sung pen mi pa khat nawno in tul un hi.

¹⁵ Lak tuk ngawl tin kham mi nate a latu cu a innkua le a neihmi hempoh tuah mei ah haal hi tuk hi. Ka thutep a zui ngawl hangin Israel miphun tei humah zahcakhuai na pha ngawl ngengpi hengtik hi,’ tin ti in,” ti hi.

¹⁶ Joshua cu zingtungno tho in Israel mite cu a hinnam haw tenin hungtik hi. Mah hinnam tei lak pen Judah miphun cu piktul hi haw hi.

¹⁷ Judah miphun sung pen a hinnam, a hinnamin tultik haw hi. Zerah hinte vang a innkua, innkua in piktul leleu haw in, Zabdi innkua vang piktul haw hi.

¹⁸ Zabdi innkua sung pen mi pa khat nawno in umtik leleu in, Akhan cu sual puatik haw hi. Akhan cu Karmi capa hi a, Zabdi i tupa hi.

¹⁹ Joshua in Akhan cu, “Ka capa, Israel tei Pathian Topa i mai ah thutakin son inna, sualsikin, na bawlmi cu son inna, imah ipmi nei ngawlin son tul khawngin,” ti hi.

²⁰ Akhan in “Kei hi, Israel Pathian Topa i mai ah sual zo ing. Ka bawlmi cu hihi, hi.

²¹ A lon uhmi na lak pen Babilon puan mawino pa khat, cuai nih bang a ngitmi ngun khal khat le tikal sawm nga ngit sui lom mu ing a, ka deih leita hangin la ing. Ka buk sungah cawi tumin phum ing hi, mu tuk uh ci, a nuaibelah ngun khal koih ing,” ti hi.

²² Mah hangin Joshua in mi khenkhat hahin, Akhan i bukah man langzet tai in, a buk sungah phummi nate cu mu haw hi, ngun khal cu a nuaitabelah mu ngangai haw hi.

²³ Pholhsuah haw a, Joshua le Israel tei lakah cawi haw in, Topa i mai ah koih haw hi.

²⁴ Joshua le Israel miten Akhan le a ngun khal, a sui khal le Babilon puan mawino, a capa le canute, a khui, a cipuh, a tuu le a neihmi hempoh la in, haksatnak Munlawn tihmi munah hawhpih haw hi.

²⁵ Joshua in, “Ita a hum uhah zahcak haksatnak hengtik cim? Topa in, na humah haksatnak hengtik bok tuk hi,” tin a tih ceng ten Akhan cu suang tuah sep hum haw hi. A innkuate le a neihmi hempoh vang sep hum haw a, mei tuah haal khawng haw hi.

²⁶ Akhan i thihnak munah suangphut haw a, tuni tiangin mah suangphut cu umlaih hi. Mah hangin mah mun cu Haksatnak munlawn tin sam haw hi. Topa i thinuknak cu dai hi.