JOSHUA 6 - Ngawm Bible

Jerikho Khua Siatnak

¹ Israel tei tum theih tuk ngawlin Jerikho khua kulh kongkhahpi cu khim zetin khak haw hi. A tum le a tul kua mah um haw ma hi.

² Topa in Joshua lakah, “Ngai kekin! Jerikho khua le a kumpi le a ngalkap a venghawng haw in, na khutah pia ing.

³ Hi khuapi cu nangmah le na ngalkap ten ni khat vei khatin, ni luk sung kiimin, kawn un.

⁴ Thiampi salihin tuucangki pa khat ten kengin, Thutiam Kuang maiah hawh haw hen. Ni salihnak ni ten nangmah le na ngalkap ten khuapi cu vei salih kim unna, thiampi ten a pengkul tum haw hen hi.

⁵ vei khat aw sau thimin, pengkul tum haw hen. Mah amuh haw aw a zak bekleh, mipi ten nase zetin au in, a khua upnak kulhtian cu cim tuk hi. Ngalkap cu amu zawn tek pen khuasungah tum haw tuk,” ti hi.

⁶ Joshua in thiampi cu samin, “Thutiam Kuang la unna, nangmu lak pen mihing salihin tuucangki pa khat ten kengin, Thutiam Kuang maiah hawh un.”

⁷ Israel tei lakah Joshua in, hawh toh un, khuapi cu kim unna, Topa i Thutiam Kuang maiah ngalkap hawh haw hen tin ti hi.

⁸ Joshua i thupiak bangin, Topa i Thutiam Kuang maiah thiampi salih cu tuucangki pengkul tumthahin hawh haw hi.

⁹ Tuucangki a muttu thiampi tei maiah ngalkap cu hawhin, nunglam cingtu ngalkap ten Thutiam Kuang nung pen zui haw hi. Cawl ngawlin pengkul tum haw hi.

¹⁰ Mahnaven Joshua in mipi tei lakah “Au toh un hi ka tih laklawh kuamah in au pahsuh un. Kam khat hei awn pahsuh un,” tin tiam hi.

¹¹ Mah hangin Topa i Thutiam Kuang tuah thiampi cu Joshua i hawhtik bangin khuapi cu kim khat kim haw hi. Mahceng ten a ngiahbuk hawah kiklehin, a bukah zan khat ngiak haw hi.

¹² A zingten, Joshua cu zingtungno tho in, thiampi ten Topa i Thutiam Kuang cu zawng haw hi.

¹³ Thiampi salih cu tuucangki salih pengkul tumthahin mailamah hawh haw hi. A mai hawah ngalkap hawh haw in, nunglam cingtu ngalkapte cu Topa i Thutiam Kuang nung pen zui haw hi. Cawl ngawlin pengkul tum haw hi.

¹⁴ A ni nihnak ten khuapi cu vei khat kimin, a ngiahnakah kikleh haw hi. Ni luk sung mahti bangin kim haw hi.

¹⁵ Ni salih ni zingtungno tho in, ni dang bang lengin khuapi cu kimin vei salih kim haw hi. Vei salih a kip haw cu mah ni bek hi.

¹⁶ Kim salihnak a kip haw ten thiampi ten pengkul tumin, Joshua in, a mitei lakah, “Nase zetin au un! Hi khuapi cu Topa in, na khut sung uhah pia hi.

¹⁷ Khuapi le a sung ummi hempoh cu Topa lakah piak tukin, a piak dan cu siatsuah khawngin hi tuk hi. Vilveng a hah uh mite himdamno in, a sel theih hangin numei pha ngawl Rahab le a innkua bek khawih un hi.

¹⁸ Mahnaven siatsuah tukmi hempoh cu la hihim pahsuh un. Lak tuk ngawl tihmi thil pa kha khat na la kha uh tale Israel tei lakah haksatnak le siatsuahnak hengtik tatak tuk uh ci.

¹⁹ Mahnaven sui le ngun, daal le thik tuah bawlmi na hempoh cu Topa ca tukin pia khawng un. Topa i tangka koihnak innah koih khawng tuk,” ti hi.

²⁰ Mah hangin thiampi ten tuucangki pengkul cu tum haw in, mipi ten a zak haw ten nase zetin au tawtok haw hi. Mahbek ten khua upnak kulhtian cu cim hi. Ngalkap cu amu zawn tek pen khuapi sungah tum haw in, khua cu la haw hi.

²¹ A ngalnam haw tuah khuasung a, ummi hempoh numei hihen, pano hihen naupang upa ti ngawlin that khawng haw hi. Khui le tuu le laakte hei thatcih khawng haw hi.

²² Ngalviltu a hah haw mi pa nih cu Joshua in samin, “Numei pha ngawl Rahab lakah hawh unna, na thutep uh bangin amah le a innkua cu puitul un,” ti hi.

²³ Mah hangin hawh haw in, Rahab cu a pa le nu, a ningpate le a innkua dangte tuah hawhpih haw hi. A innkua hawng le a salte vang pui haw a, Israel tei ngiahbuk pualeu ah koih haw hi.

²⁴ Mah nungten Jerikho khuapi cu a sung a, ummi hempoh tuah mei ah haal haw hi. Mei a, haal ngawlmi sui le ngun, daal le thik tuah bawlmi nate hempoh cu la haw in, Topa i tangka koihnak innah koih haw hi.

²⁵ Mahnaven numei pha ngawl Rahab le a innkua cu Jerikho khua vilvengtu mi pa nih a sel hangin Joshua in that ngawlin khawih hi. Tuni tiangin Rahab i casuante cu Israel ngam sungah um haw laih hi.

²⁶ Mah hun lelengin Joshua in tamsiatnak tuah: “Hi Jerikho khua dinleh tukin a tumtu cu Topa i tamsiatnak tawk tahen; Hi khuapi tungdingleh tukin khuam khuk a cotu cu a capa upabel thi tahen. Hi khuapi kongkhah a bawl lehtu cu a capa nautabel thi tahen,” ti hi.

²⁷ Joshua lakah Topa a um hangin Joshua min cu a ngam buppi hawah thang hi.