JOSHUA 5 - Ngawm Bible

¹ Jordan ngun pen nitumnak lam a, um Amor kumpi le Mediterranean tuipi mawk a, um Kanaan kumpi ten Israel tei Jordan ngun a kaltan haw ten Topain kangtik hi tih thu a zak khawng haw ten thinsuzet haw hi. Israel mite lau in can tawtok haw hi.

Gilgal Ah Vunceptalhnak

² Topain Joshua lakah “Meisuang nam bawl inna, Israel tei vunceptalhin,” ti hi.

³ Mah hangin Joshua in meisuang namno bawlin, Israel mite cu Vuncep tannak Mual a tih haw mi munah a vuncep haw tan hi.

⁴ Ita a vunceptan haw him titale Izipt ngam pen a tul haw ten, ngaldo thei pano hempoh cu tek zo haw in, a khualzinnak lampi ah thi khawng zo haw hi.

⁵ Izipt ngam pen a tulmi pano hempoh cu vunceptan khawng haw naven hampa lak khual a zinnak haw pen a hinleh haw mite cu vunceptan ngawl nguak cang haw hi.

⁶ Israel mite cu ngamlak a vahvaihnak hawah kum sawm li ngei haw hi. Topa i thu a ngaih haw ngawl hangin Izipt ngam pen ngaldo thei sa pano hempoh thi khawng zo haw hi. A pi le pu tei lakah pia tung hi tin ka tepmi, khuinawi le khuaitui luannak ngam pha le ngamnop munah hengtik hihim tuk mang tin, Topa in ti hi.

⁷ A muh tei ai-awhtu a capate cu vunceptan ngawl ngeh haw hi. Mi khangthakte cu Joshua i vunceptan mite haw hi.

⁸ Vuncep a tan ceng haw ten a meima haw a dam laklawh tian, a venghawng haw in, a ngiahbukah um khawng haw hi.

⁹ Topa in Joshua lakah, “Izipt ngam sal na tannak uh pen na zahcaknak hempoh cu tuni in, botik khawng zo ing hi,” tin ti hi. Mah a tihnak mun cu Gilgal tin sam haw hi, tuni tianin sam haw hi.

¹⁰ Israel mite Gilgal ah a um haw laihin, Jerikho el munlawnah mah ha, ni sawm le ni li ni taklam pepan kaltan puai bawl haw hi.

¹¹ A zing cu, Kanaan ngam pen a suakmi an, cangphan le naman tel ngawl cangho a eih masabel haw ni hi.

¹² Mah ngam pen an a eih bek haw ten van pen manna cangho kulh lehma toh hi, mah nung siah Israel miten muleh haw ma toh hi. Mah kum pepan Kanaan ngam suak an bek ei haw hi.

Joshua le Namsau Cawitu

¹³ Joshua cu Jerikho khua elah hengin, khua a zoh ten, namsau a kawng sung pen dawhsa cawi in, a maiah pano pa khat ding mu hi. Joshua in mahpa cu nekin, “Keima mihing cim maw? Ka ngalte uh cim?” tin dong hi.

¹⁴ Mahpa in, “Kua ma mihing hei hi mang, Topa i ngalkap hotu ing,” ti hi. Joshua cu bokin, “Topa kei na salpa i lakah i hilh tuk nei cim,” tin dong hi.

¹⁵ Topa i ngalkap hotu pa in, “Na kedam dukin, mun thiangtho ah ding ci,” ti hi. A tih bangin Joshua in, a kedam cu duk hi.