JOSHUA 4 - Ngawm Bible

Phawhlengnak Suangphut

¹ Israel mite a venghawng haw in Jordan ngunpi a kaltan ceng haw ten Topain Joshua lakah,

² “Israel mi hinnam nam khat pen mi pa khat ten mihing sawm le pa nih teng inna,

³ a lak hawah thiampi tei dinnak Jordan ngun laizang a um suangtum sawm le pa nih la in, na ngiahbuk uhah koih un, tin thupia in,” ti hi.

⁴ Joshua in, a tensa mi mihing sawm le pa nihte cu samin

⁵ “Jordan ngunah, Topa na Pathian uh i Thutiam Kuang maiah hawh unna, tui sung a suang pa khat ten la in, na ko uhah pua un; suang pa khat cu Israel hinnam khat ai-in hi tuk hi.

⁶ Topa i bawlmi hempoh Israel miten a cin leleng theihnak haw tukin hi suang cu melciknak hi tuk hi. Mailam ten na casuan uhten hi suang hi itihnak him tih a dot haw ten,

⁷ Topa i Thutiam Kuang in Jordan ngun a kaltan pih ten Jordan ngun cu luang ngawlin a kang tawngmi cu Israel miten a phawh leleng hawnak tukin hi suang cu melciknak hi tuk hi,” tin ti hi.

⁸ Joshua i thupiak bangin bawl haw hi. Topa in Joshua lakah a hilh bangin mi sawm le pa nih ten Jordan ngun laizang pen suangtum sawm le pa nih la in, suang pa khat ten cu Israel hinnam pa khat tek ca tukin hi. Suang cu la in, a ngiahbukah koih haw hi.

⁹ Joshua in Thutiam Kuang zawngtu thiampi tei dinnak Jordan ngun laizang kekah suang sawm le pa nih phut hi. Mah suang phut cu tu tiang umlaih hi.

¹⁰ Israel tei deh tuk le bawl tukin Topa in Joshua lakah thu a piakmi hempoh a bawl khawng haw laklawh thiampi cu Jordan ngun laizangah ding leleng haw hi. Himi cu Moses i thu a piaksa mi a zui haw mi hi. Israel miten man lang zetin ngunpi cu kaltan haw hi.

¹¹ A venghawng haw in ngun ngal a hen khawng ceng haw ten Topa i Thutiam Kuang le thiampi cu Israel mipi maiah hawh haw hi.

¹² Reuben mi, Gad mi le Manasseh mi khenkhat cu Moses i tepsa bangin ngaldo tukin mipi maiah hawh haw hi.

¹³ Ngaldo tukin ngalthuam tuah ummi mihing thawng sawm li cu Topa i mitmuhin Jerikho el munlawn lamah hawh haw hi.

¹⁴ Mah ni Topa i bawlmi hangin Israel miten Joshua cu upat haw hi.

¹⁵ Topa in Joshua lakah,

¹⁶ “Thutiam Kuang zawngtu thiampi cu Jordan ngun laizang pen tul tukin thupia in,” ti hi.

¹⁷ Topa i thupiak bangin Joshua in thupia hi.

¹⁸ Thiampi cu tui mawkah tulin leiko a sih bek haw ten Jordan ngun cu masa a luan bang leng luangin, a kual dimleh hi.

¹⁹ Israel miten Jordan ngun cu ha masabel ni sawm ni-in kaltan haw a, Jerikho pen nisuahnak lam a um Gilgal khua ah cam haw hi.

²⁰ Jordan ngun pen a lak haw mi suang sawm le pa nih cu Joshua in Gilgal ah phut hi.

²¹ Joshua in Israel tei lakah, “Mailamah na canau ten, ‘Hi suang hi itihnak him?’ tin a dot haw ten

²² Israel mi in Jordan ngun a kaltan haw ten leiko humah hawh haw hi, tin hilh un.

²³ Topa Pathian in Tuipi San a kaltan ceng laklawh tui a kangtik bangbokin, nohtei ca in Jordan ngun cu na kaltan celh laklawh uh tianin kangtik bok hi.

²⁴ Itahim titale leihummi hempohin Topa i huham cu thei haw tuk a, nohte hei in Topa na Pathian uh cu a kumkhua in upat un,” ti hi.