JOSHUA 3 - Ngawm Bible

Israel Mite Jordan Ngunpi Kaltan

¹ Zingtungno in, Joshua le Israel mi hempoh ngiahbuk pen tho haw a, Shittim pen tulin Jordan ngun lamah hawh haw hi. Ngunpi a kaltan haw laih ngawlin, ngun mawkah ngiak haw hi.

² Ni thum nungten Israel puitute cu mi honpi ngiahnak hempoh ah hawhin,

³ “Topa na Pathian uh i piakmi Thutiam Kuang cu Levi mi thiampi ten zawngin, a hawhpih haw na muh uhten, na umnak tek uh pen tul unna, zui un.

⁴ Hi lam na hen awng uh ngawl hangin hawhnak thei ngawlin um sual tuk uh ci. Thutiam Kuang cu nek leita pahsuh un; peng lang bang danin zui un,” tin mipi tei lakah hilh hi.

⁵ Joshua in Israel tei lakah, “Ciangduntik cawm un. Itahim titale zingten noh tei lakah Topain nalamdang bawl tuk hi,” tin hilh hi.

⁶ Thiampite cu Joshua in, “Thutiam Kuang la unna, mipi mailamah hawh un,” tin a hilh ten a hilh bangin hawh haw hi.

⁷ Topain Joshua lakah, “Moses lakah ka um bang bokin, nangma lakah ka um bok thu a theihnak haw tukin, Israel mi hempoh ten tuni in, nangmah upatin le khaisang haw tuk hi.

⁸ Thutiam Kuang puatu thiampi tei lakah Jordan ngun na kaltan uhten ngun mawkah ding un,” tin thupia in hi.

⁹ Joshua in Israel mipite cu, “Keimah nek unna, Topa na Pathian uh i awnkam cu ngai hem un.

¹⁰ Noh tei lakah a nungmi Pathian um tih cu tuni in thei tuk uh ci. Mailamah na hawh uhten, Kanaan mi, Hit mi, Hiv mi, Periz mi, Girgash mi, Amor mi le Jebus mite cu amah in hawlvawk khawng tuk hi.

¹¹ Leihum buppi i Topa i Thutiam Kuang in, na mai uhah Jordan ngun kaltan pih tuk hi.

¹² Mah hangin Israel hinnam khat pen pa khat tenin, mihing sawm le pa nih teng un.

¹³ Leihum buppi uktu Topa i Thutiam Kuang a zawngtu thiampi ten tui sungah a ke a khiak bek haw ten a luang li laihmi Jordan ngunpi cu a luan cawl tuk hi; sak lam pen a luangmi tui cu munkhatah tingin, cawl tuk,” ti hi.

¹⁴ An cop hun a hih tak Jordan ngunpi cu ngengzet hi. Tui kaltan tukin Israel mite cu a ngiahbuk haw pen tul haw hi. Thutiam Kuang zawngtu thiampi ten lamhuai haw hi.

¹⁵ Tuimawk hengin, a ke haw tuisungah a khiak bek haw ten,

¹⁶ Jordan ngunpi cu khencat hi; a luan cawlin, Zarethan khua el a, ummi Adam khua tiang tingto hi. Tuipi Thi sung a, luangmi tui cu kang tawng loli hi. Israel miten Jerikho khua el pen kaltan haw hi.

¹⁷ Leiko hum pen Israel mite cu hawhin, a venghawng haw in, a kaltan ceng haw tian Topa i Thutiam Kuang a zawngtu thiampite cu Jordan ngun laizang leiko ah ding leleng haw hi.