JOSHUA 20 - Ngawm Bible

Buknak Khuapi

¹ Topa in, Joshua lakah

² hi bangin Israel tei lakah hilhin hi, “Moses lak a ka hilhsa bangin mi thattu tei buknak tuk khuapi teng un.

³ Tumtahnak um ngawlin mi a that sualtu a um haw ten phu lak a tumtu lak pen a suahcak theihnak tukin na ten uhmi khuapi cu a buknak mun haw tuk hi.

⁴ Mithattu cu hi khuapi pa kha khatah tai in, khuasung tumnak kongkhahah cawl haw hen hi. Mahceng ten khuasung upa tei lakah a thu hilh haw hen. Mahceng ten khua sungah tumtikin, a umnak mun ngaihsutsak haw tuk hi.

⁵ Phu la nuam pa in mah khua tian a hil tale mah mithatpa cu pia haw pahsuh hen. Huatdunnak nei ngawlin a thah sualmi a hih tak khua sungmi ten hup haw hen hi.

⁶ Khua sung mipi maiah a thu a son laklawh hawleh mah hun a, Thiampi Sang a thih laklawh, mah khua ah um leleng hen. Mah nungten a nuam tale, a tainak khua ah kikleh thei tuk hi tin hilhin,” ti hi.

⁷ Mah hangin Jordan pen nitumnak lam Naftali mualhum ngam Galilee pengah Kedesh khua, Efraim mualhum ngamah Shekhem khua, Judah mualhum ngamah Hebron khua,

⁸ Jordan ngun pen nisuahnak lamah Jerikho khua pen nisuahnak mawk a ummi mualhumah Reuben hinnam tei ngam Bezer khua, Gad hinnam tei ngamsung Gilead ah Ramoth khua le Manasseh hinnam tei ngam sungah Bashan ah Golan khua teng haw hi.

⁹ Hi khua cu Israel tei ca in hihen, amu lak a um ngamdangmi ca in hihen, a buknak haw tukin tenmi hi haw hi. Tumtahnak um ngawlin mi a that sualtu cu hi khua ah himnak ngah haw tuk hi. Mah mun pen mipi maiah a thu a son haw laih ngawl sung cu phu la nuam ten that thei haw tukma hi.