JOSHUA 2 - Ngawm Bible

Joshua In Jerikho Ah Vilvengtu Hah

¹ Joshua in Shittim pen vilvengtu pa nih hahin, “Hawh unna, a ngam haw le a khuapi Jerikho khua vilvengta un,” tin hah hi. Hawh haw in, Jerikho khua a hen haw ten, numei pha ngawlnu Rahab innah ngiak haw hi.

² Jerikho kumpipa in, a ngam haw vilvengtu tukin Israel mi heng haw tih a zak ten,

³ Rahab lakah, hitin thucah hi, “A ngam uh vilveng tukin a hengmi, na inn a ngiak mihingte suahin,” tin thupia hi.

⁴ Mahnaven Rahab in Israel mi pa nihte cu selin, kumpipa i lakah, “Ka innah mihing hung ngai haw a, mahnaven i lai khua pen hung haw him tih thei mang.

⁵ Khuathim lulup, khuapi kongkhah a khah kuan haw ten tulleh zo haw hi. Ilai lamah hawh tum haw tihvang thei mang, manlang zetin, na hil uh tale pha tuk laih uh ci,” tin hilh hi.

⁶ Rahab in vilvengtu pa nihte cu a inn hum thangkhau a koihnak nuaiah sel hi.

⁷ kumpipa i ngalkap ten hil haw in, khua pawleu a hen bek haw ten kongkhah cu khak haw hi. Jordan ngun hen tian hil haw hi.

⁸ Israel mi pa nih tei hihbuh laihngawlin Rahab cu a inn humah kaito in,

⁹ “Topain, hi ngam cu nangmuh pia zo tih cu thei ing. Ka ngam buppi uhin, lauthawng zetin can tawtok khawng ung.

¹⁰ Izipt ngam pen na tul uhten, na maicang loli ah, Tuipi San cu kangtik tih za zo ung. Jordan ngun i nisuahnak lam a, um Amor miphun tei kumpi pa nih Sihon le Og le a ngalkap na thah khawng uh vang za bok ung hi.

¹¹ Mah thu ka zak bek uhten lauzet ung hi. Nangmuh ka lau uh hangin ngal nawm khawng ung. Itahim titale Topa na Pathian uh cu van le leipi i Pathian hi loli hei.

¹² Nahum uhah hehpihnak ka langtik bangbokin, ka innkua pihte hehpih bok tukin Pathian lakah thutepnak bawl un hi. Nangmuh ka muan theihnak tukin ka nelah thutiamnak bawl un hi.

¹³ Ka nu le pa, ka unau le a innkua pih hei hihen, that ngawlin hup zazalta un,” ti hi.

¹⁴ Vilvengtu pa nih ten “Ka tep uhmi bangin ka bawl uh mata Pathian in ka nunnak uh hei la tahen. Ka bawl uhmite hi phuang ngawlin na um ahi tale, hi ngam hi Topain a piak ten ka tepsa uhmi cu zui loli tuk ung,” ti hi.

¹⁵ Rahab inn cu khuapi upnak kulhtian tuah tawngkhadunin sakmi hi; mah hangin a kongkano pen khauno tuah pualeu ah khiasuk hi.

¹⁶ “Hampalak ah tai un: mahma tale ngalkap ten mu kha haw tuk hi. Nangmuh a zei tute a kihleh laklawh haw tian ni thum sung ngelh un hi. Mahnung ten na hawh nuamnak mun uhah hawhleh un,” tin tiam hi.

¹⁷ Mah vilvengtu pa nih ten “Na thutep bangin zui tuk ung.

¹⁸ Zo lengin! Na khua ka sim uhten, keimuh na khiaksuknak tukvelhah khausan na khai lehin hi. Na pa le nu, na ningpa le na pa i innkua a venghawngin, na innah khawmdun khawng un,

¹⁹ pa kha khat na inn pen tulin lampi ah vak kha in, a thi bok tale, ama sual hi tuk hi. Kohtei sual hi tukma ven.

²⁰ Ka thu tih uhte hi na son kha tale ka thutep uhmi bangin cangleh tukma hi,” tin ti haw hi.

²¹ Rahab in “Na tih uh bangin lungkim ing,” ti hi. Mahceng ten vilvengtute a inn pen a hawh ceng haw ten, Rahab in, khausan cu a tukvelhah khaih hi.

²² Vilvengtute cu mualhum hampa lakah ngelh haw hi. Kumpipa i ngalkap ten a ngamsung hempoh ah ni thum sung zei haw hi. Pa khat hei amuh haw ngawl hangin Jerikho khua ah kikleh haw hi.

²³ vilvengtu pa nihte cu mualhum pen tolhsukin, ngunpi a kaltan ceng haw ten Nun i capa Joshua lakah hawhin, a theihmi thu hempoh hilh haw hi.

²⁴ Amuh ten, “A ngampilin, Topa in eimuh pia zo tih um ung. A mihing venghawng haw in, ka thawmnging uh a zak haw ten thinsuzet haw hi,” tin hilh haw hi.