JOSHUA 15 - Ngawm Bible

Judah Piakmi Ngam

¹ A nuai a, ngam cu Judah hinnam innkua khat tek i co mi ngam hi: A ngam haw cu hanglamah Edom ngamngi pen a hanglambel a um Zin ngamkhing tian hi.

² Hanglam a ngamngi haw cu Tuipi Thi i hanglam mawk pen

³ hanglamah hawhsukin, Akrabbim mual kawn pen Zin tian hi. Negev pen Kadesh Barnea tiang hawhngutin, Hezron ah hawhvawk ngut a, Adar tian; Karka lamah haw in,

⁴ Azmon lamah a hawh nungten Izipt ngamngi lui zui in Mediterranean tuipiah hengin, mahlaiah tawp hi. Judah ngam i hanglam ngamngi cu mahti bangin hi.

⁵ Nisuahnak lam pen a ngamngi haw cu Tuipi Thi hi, saklamah Tuipi Thi sung a Jordan ngun a khopnak mawk tian hi. Mah tui kawi i saklam ngam ngi pen,

⁶ Beth Hoglah le saklam saw ah Beth Arabah tian hi. Saklamah Bohan Suangpi tian, Bohan cu Reuben i capa hi;

⁷ Haksatnak kuam a tihmi haw pen Debir tian, saklamah hawhngutin luikuam hanglam mawk a ummi Adummim mual kawn lam le a khenkhat Gilgal lamah kawi hi. Enshemesh a ciktui le Enrogel lamah hawh phei in,

⁸ Hinnom capa i munlawn a tihmi haw pen hawhto in Jerusalem khua umnak Jebus mualtuan hang lamah hawh ngut hi. Refaim munlawn saklam mawk pen nitumnak lam Hinnom munlawn tuah zawndunmi mualkul tian hi.

⁹ Mah mualkul pen Neftoah a ciktui umnakah hawhngutin, Efron mual el a um khuapi tianin heng hi. Baalah (ahimata Kiriath Jearim) lamah kawi lehin,

¹⁰ Baalah i nitumnak lam pen Seir mualkimin Jearim (ahimata Khesalon) Mual pen Bethshemesh hengin Timnah kal tian heng hi.

¹¹ A ngamngi haw cu Ekron saklam mualtuanah hawhngutin, Shikkeron lamah kawi a, Baalah Mualah a hawhvawk nungten Jabneel heng hi. A ngamngi haw cu Mediterranean tuipi hengin mah mun cu a tawpnak hi.

¹² Nitumnak lam ngamngi cu Mediterranean tuipi hi. Judah hinnam tei ngamngi cu a hum a, ka tihmi bangin hi.

Kaleb In Hebron le Debir Neh

¹³ Topa in Joshua lakah a hilh bangin Judah hinnam Jefunneh i capa Kaleb lakah Judah mitei ngam khenkhat piakmi um hi. Mah khua cu Hebron hi. Hebron cu Anak i pa Arba i khuapi hi.

¹⁴ Anak i capa pa thum Sheshai, Ahiman le Talmai cu hi khua pen hawlvawk haw hi.

¹⁵ Kaleb cu hawhin (Kiriath Sefer tin, a sam haw mi) Debir khua mite cu do hi.

¹⁶ Kaleb in, “Kiriath Sefer khua a neh theitu cu ka canu Aksah pia tung,” ti hi.

¹⁷ Kaleb unau Kenof capa Othniel in mah khua cu a neh hangin Kaleb in, a canu Aksah pia hi.

¹⁸ A pasal Othniel lakah a hen ten, a pa Kaleb lak pen lo cing khat ngen tukin a pasal Othniel in tik hi. A tihnak bangin a pa Kaleb lakah laak tuah hawh hi. Laak hum pen a tolh ten a pa in, “Ikaw na kin?” tin dong hi.

¹⁹ Aksah in, “Nget nop nei ing hi, Negeb ngam ko munah na umtik hangin tuikhuk kul ka hih uhten hehpih zalin,” tin ngen hi. Kaleb in saklam tuikhuk le hanglam tuikhuk pia hi.

Judah Khuapite

²⁰ Judah hinnam innkua khat tek i co mi ngam cu hihi, hi:

²¹ A co haw mi khuapi, Edom ngam el a ummi hanglambel a khuapi cu Kapzeel, Eder, Jagur,

²² Kinah, Dimonah, Adadah,

²³ Kedesh, Hazor, Ithanan,

²⁴ Zif, Telem, Bealoth,

²⁵ Hazor Hadattah, Kerioth, Hezron,

²⁶ Amam, Shema, Moladah,

²⁷ Hazar Gaddah, Heshmon, Bethpelet,

²⁸ Hazar, Shual, Beersheba, Biziothiah,

²⁹ Baalah, Lim, Ezem,

³⁰ Eltoklad, Khesil, Hormah,

³¹ Ziglag, Madmannah, Sansannah,

³² Lebaoth, Shilhing Ain le Rimmon hi. A elkim a khua neu tuah a venghawngin khua sawm nih le khua kuah hi.

³³ Mualbul a khuapi cu, Eshtaol, Zorah, Ashnah,

³⁴ Zanoah, Engannim, Tappuah, Enam,

³⁵ Jarmuth, Adullam, Sokoh, Azekah,

³⁶ Shaaraim Adithaim, Gederah le Gederothaim, Gederah, le Gederothaim a venghawngin khua sawm le khua li hi a, a elkim a um khuanote tuah hi.

³⁷ Mah hun pen, Zenan, Hadanshah, Migdalgad,

³⁸ Dilean, Mizpah, Joktheel,

³⁹ Lakhish, Bozkath, Eglon,

⁴⁰ Kabbon, Lahmam, Chitlish,

⁴¹ Gederoth, Bethdagon, Naamah, le Makkedah khuapi tel haw hi. A elkim a um khuanote tuah a venghawngin khua sawm le khua luk hi.

⁴² Khuapi dangte cu Libnah, Ether, Ashan.

⁴³ Iftah, Ashnah, Nezib,

⁴⁴ Keilah, Akzib, le Mareshah hi. A elkim a um khuanote tuah a venghawngin khua kuah haw hi.

⁴⁵ Ekron khuapi a elkim a um khuapi le khuanote,

⁴⁶ Ekron le tuipi lak a ummi, Ashdod khua el khuanote vang tel haw hi.

⁴⁷ Ashdod le Gaza le a elkim a khuanote telin Izipt ngamngi ngun le Mediterranean Tuipi tian hi.

⁴⁸ Mualhum ngam a khuapi cu Shamir, Jattir, Sokoh,

⁴⁹ Dannah, Kiriath Sefer (mahma tale Debir)

⁵⁰ Anab, Eshtemoa, Anim,

⁵¹ Goshen, Holon le Giloh khua sawm le khua khat hi in, a elkim a um khuanote vang tel hi.

⁵² Adang khuapi cu, Arab, Dumah, Eshan,

⁵³ Janim, Beth, Tappuah, Afekah,

⁵⁴ Humtah, Kiriatharba (Hebron tih hei a sam haw mi) le Zior haw hi. A elkim khuanote tuah khua kuah haw hi.

⁵⁵ Maon, Karmel, Zif, Juttah,

⁵⁶ Jezreel, Jokdeam, Zanoah,

⁵⁷ Kain, Gibeah, le Timnah na hi haw hi. A elkim khuanote tuah khua sawm haw hi.

⁵⁸ Adang khuapi cu Halhul, Bethzur, Gedor,

⁵⁹ Maarath, Bethanoth, le Eltekon hi. A elkim a um khuanote tuah khua luk haw hi.

⁶⁰ Mah humah Kiriath Baal (ahimata Kiriath Jearim) le Rabbah vang tel haw hi. An el khuanote tuah khua nih haw hi.

⁶¹ Phillawn ngamah Beth Arabah, Middin, Sekakah,

⁶² Nibshan, Ci khuapi tihmi le Engedi khuapi um haw hi. A elkim a um khuanote tuah khua luk haw hi.

⁶³ Mahnaven Jerusalem a ummi Jebus mite cu Judah miten hawlvawk thei haw ma hi. Mah hangin Jebus mi le Judah mite cu tusun tianin Jerusalem khua ah um ten haw hi.