JOSHUA 11 - Ngawm Bible

Jabin le A Panpihtu Ten Neh Haw

¹ Israel tei ngalnehnak thu Hazor kumpi Jabin in, a zak tenin Madon kumpi Jobab, Shimron kumpi, Akshaf kumpi,

² saklam mualhum kumpi, Galilee tuipi pen hanglam ummi Jordan ngun kuam a um kumpi, munlawn a um kumpi le nitumnak lam a um Dor elkim kumpi cah khawm hi.

³ Kanaan kumpi, Amor kumpi, Hit kumpi, Periz kumpi le mualhum ngam a um Jebus kumpi le Mizpah ngam Hermon mualbul a um Hiv mite vang cah khawng hi.

⁴ A cah bangin hung haw in, a ngalkapte cu tuipi mawk a, ngunphil zah haw hi. Cipuh le cipuhleng tampi keng haw hi.

⁵ Hi kumpi ten a ngalkapte cu khawmin, Israel mite do tukin Meron a um ciktui mawkah tawkdun khawm haw hi.

⁶ Topa in Joshua lakah, “Lau pahsun. A venghawng haw in zingten tu hunin Israel khut sungah pia tung a, thi khawng haw tuk hi. A cipuh tei zapi cu satcat unna, a cipuhleng haw mei in haal khawng un,” ti hi.

⁷ Mah hangin Joshua le a ngalkap ten muanmawh khak ngawlin Meron cik tui el pen do haw hi.

⁸ Topa in nehnak cu Israel kut sungah a piak hangin a do haw ten nehin, saklam a ummi Sidon le Misrefoth Maim tian, nisuahnak lamah Mizpah kuam tianin ngal hil haw hi. Mihing pa khat hei tang ngawlin that khawng haw hi.

⁹ Topa i thupiak bangin Joshua in, a cipuh tei zapi cu satcatin, a cipuhleng haw mei tuah haal khawng hi.

¹⁰ Joshua cu kiklehin, Hazor khua nehin, a kumpi vang that hi. Mah hunin, Hazor khua le a ukmi cu huham neibel haw hi.

¹¹ Pa khat hei tang ngawlin that khawngin, a khua haw vang mei tuah haal khawng haw hi.

¹² Joshua in, a kumpi le a khuapi cu neh khawng hi. Topa i nadek Moses i thupiak bangin Joshua in that khawng hi.

¹³ Mual neuno hum a sakmi khua lak pen Joshua i halmi Hazor khua sial ngawl khuapi pa khat hei Israel miten haal haw ma hi.

¹⁴ Hi khuapi pen a lon haw mi na manpha le ngan hempoh cu Israel miten amuta tukin la haw hi. Mahnaven mihing cu a venghawngin that khawng haw hi, pa khat hei suakca haw ma.

¹⁵ Topa Pathian in, a salpa Moses lakah thupia in, Moses in Joshua lakah mah thu cu pia hi; mah thupiak bangin Joshua in zui khawng hi. Moses lak a, Topa i thupiakmi bangin Joshua in bawl khawng hi.

Joshua In Ngam Buppi La

¹⁶ Joshua in ngam hempoh neh khawng hi; mualhum ngam, Negev ngam hempoh, Goshen ngam hempoh, nitumnak lam mual nuai tian, Jordan munlawn, Israel ngamsung mualhum ngam le munlawn,

¹⁷ Halak mual pen Seir khua elkim, Hermon mual pen hanglam a, um Lebanon kuamah Baalgad tian neh khawng hi. Ngeipi a do nungten,

¹⁸ a kumpi vang that khawng hi.

¹⁹ Hiv mitei umnak Gibeon khua sial ngawl ilai khua hei in, Israel mite tuah lemdunnak thutiam bawl nuam haw ma hi. A venghawng do in, a neh khawng nungten a neihmi ngeh hi.

²⁰ Hehpihnak um ngawlin thah khawng le siatsuah khawng tukin a lungmu haw cu Israel mite do tukin Topa in khohtik hi. Hiti bangbokin Topa in Moses tiam ham zo hi.

²¹ Mah hun lelengah Joshua hungin, mualhum ngam a ummi; Hebron khua Debir khua, Anab khua le Judah le Israel mualhum a ummi, mi ngengzet Anak mite vang that khawng hi. A miphun haw cimittikin, a khuapi vang siatsuah khawng hi.

²² Israel ngam sungah Anakim mite pa khat hei tang haw ma toh hi. Gaza, Gath le Ashdod khua ah dawmno tang haw laih hi.

²³ Topa in Moses lak a thu a piak bangin Joshua in mah ngam hempoh cu la khawng hi. Joshua in Israel tei lakah amu hinnam zui in, a ngah haw tukin pia hi. Mahten a ngam haw cu ngaldai in um hi.