JOSHUA 10 - Ngawm Bible

Amor Mite Neh Haw

¹ Joshua in Jerikho khua siatsuahin, a kumpipa tiangin, a thah bang bokin, Ai khua vang siatsuahin, a kumpi haw vang that hi, tih Jerusalem kumpi Adonizedek in za hi. Gibeon miten Israel mite tuah lemdunnak bawlin a lak hawah um haw tihvang za bok haw hi.

² Gibeon khua cu khuapi dang bangin ngengin, Ai khua sangin ngeng saw hi. A ngalkap hei cu ngalpha mi a hih haw hangin Jerusalem mite cu lauthawng em haw hi.

³ Mah hangin Adonizedek in Hebron kumpi, Hoham, Jarmuth kumpi Piram, Lakhish kumpi Jafia le Eglon kumpi Debir tei lakah thucah hi.

⁴ “Gibeon miten Joshua le Israel mite tuah lemdunnak thutiam a bawl haw hangin, hung unna, Gibeon mite do bawm un,” ti hi.

⁵ A cah bangin Amor kumpi pa nga; Jerusalem, Hebron, Jarmuth, Lakhish le Eglon kumpi cu a ngalkap venghawng tuah tawkdun khawmin, Gibeon khua cu kimin do haw hi.

⁶ Gibeon miten Israel tei ngiahbuk Gilgal a, ummi Joshua lakah, “Bawipa nung hek pahsun; manlang zetin hung inna, keimuh bawmin hi. Mualhum a ummi Amor kumpite tangkawmin, keimah do haw hi. Pan zazalin hi,” tin bopnak ngen haw hi.

⁷ Mah hangin Joshua le a ngalkap cu a ngalkap phabel tuah Gilgal mun pen hawh haw hi.

⁸ Topa in Joshua lakah, “Na thinsu pahsun nehnak pia zo ing. Nangmah do theitu kuamah um haw tukma,” ti hi.

⁹ Joshua cu Gilgal mun pen Gibeon tiang zan khua hawhin, muanmawh ngawlpi in, a ngal cu nam haw hi.

¹⁰ Israel ngalkap amuh haw ten ngalte cu a thinsuzet tukin Topa in bawl hi. Israel ngalkap ten Gibeon khua ah ngalte cu that haw hi. Bethoron mual kawn pen hilin, Azekah le Makkedah khua tianin that pepel haw hi.

¹¹ Israel ngalkapte lau in, Bethhoron mualkawn pen Azekah khua tian a tai haw laihin, Topa in van pen nialpi bokbawn tiatia a zuktik ten mitampi thi haw hi. Nial i khiakhup mite cu Israel ngalkap tei ngalnam tuah thahmi sangin tam saw hi.

¹² Pathian bopnak tuah Israel miten Amor mite a neh ni haw in, Israel tei zakin Joshua in Topa i lakah hi tin au hi; “Maw Ni aw, Gibeon humah dingin; Maw Hade aw, Aijalon kuam humah cawlin,” ti hi.

¹³ A tih bangin Israel miten a ngal a neh laklawh haw tian ni cu dingin, hade vang cawl ngangai hi. Hi thu cu Jashar laibu sungah ngan haw hi. Ni cu hawh ngawltohin van laizangah ni khat pum loli cawl hi.

¹⁴ Mah ni sun bang, Pathian in Israel mite panin Topa in, a mihing tei thu a ngaih hun, leipi pian tung pepanin um awng ma hi.

¹⁵ Mahceng ten a ngalkap cu a ngiahbuk Gilgal ah pin haw hi.

Joshua In Amor Kumpi Pa Nga Man

¹⁶ Kumpi pa ngate cu tai in, Makkedah suangholah ngelh haw hi.

¹⁷ Mahlai a ngelhnak mun a theih haw ten Joshua lakah hilh haw hi.

¹⁸ Joshua in, “Mah suanghol maiah suangtum ngengpi tiang unna, a cingtu koih un hi.

¹⁹ Mahnaven mahlaiah nangmuh um pahsuh un. Ngalte cu hil unna, a nunglam pen that pepel un; kuamah a khuapi sung heng haw pahsuh hen. Topa na Pathian uhin, na khutsung uhah pia zo,” ti hi.

²⁰ Joshua le a ngalkap ten ngal cu that pepelin neh khawng haw hi. A thah haw ngawl nih khat cu a khua kulhtian heng thei haw in, mahte cu that haw ma hi.

²¹ a ngalkapte cu Joshua lakah a ngiahnak haw Makkedah ah himdamno in heng khawng haw hi. Mahnung ten Israel tei humah kuamah in awn ngamleh haw ma toh hi.

²² Joshua in, “Suanghol cu hong unna, kumpi pa nga cu ka lakah hunpih un,” ti hi.

²³ A hilh bangin bawl haw hi. Jerusalem kumpi pa, Hebron kumpi pa, Jarmuth kumpi pa, Lakhish kumpipa le Eglon kumpipa cu hunpih haw hi.

²⁴ Mah kumpite Joshua lak a hen haw ten Joshua in, Israel mi hempoh samin amah tuah ngal a do kawmtu a khutnuai bawite cu, “Hi laiah hung unna, hi kumpi tei ngawng hi na ke uhin sikpek un,” ti hi. A tih bangin kumpi tei ngawng cu sikpek haw hi.

²⁵ Joshua in, a lak hawah, “Lau pahsuh un, na tha uh hei nau pahsuh hen. Ngilzet le ngalpha zetin um un, itahim titale na ngal tei humah Topa in hi bangin bawl khawng tuk,” ti hi.

²⁶ Mah nungten kumpi cu Joshua in thatin, a luang haw cu thingkung pa nga humah taklam tian tak hi.

²⁷ Ni a tum ten Joshua i thupiak bangin a luang cu la in, a masa a ngelhnak haw suanghol sungah vawk haw hi. Suanghol kongka ah suangtum tianglehin, mah suangtian cu atu khan tianin um lai hi.

Joshua In Amor Ngam Tampi La

²⁸ Mah ni-in Joshua in Makkedah khua cu do in, a neh ten a kumpipa vang man hi. A khua sungmi venghawngin pa khat hei tang ngawlin that khawng hi. Jerikho kumpi hum a bawl bang lengin Makkedah kumpi hum hei ah bawl hi.

²⁹ Mah nungten Joshua le a ngalkapte cu Makkedah pen hawhin, Libnah khua do haw hi.

³⁰ Topa in nehnak a piak bangin Israel miten mah khua le a kumpipa vang neh haw hi. Khua sung mite cu pa khat hei tang ngawlin namin sat hum khawng haw hi. Jerikho kumpipa i hum a bawl bang lengin, Libnah kumpi vang bawl hi.

³¹ Mah nungten Joshua le a ngalkap cu Libnah pen Lakhish ah hawh haw hi. Lakhish cu kimin do haw hi.

³² Topa i bopnak hangin Israel miten Lakhish khua mite vang pa khat hei tang ngawlin that khawng haw hi.

³³ Gezer kumpi Heran cu Lakhish pan tukin hung naven Joshua in nehin, amah le a ngalkap cu pa khat hei suakca ngawlin that khawng hi.

³⁴ Mahceng ten Joshua le a ngalkap cu Lakhish pen Eglon ah hawh haw hi. Eglon khua cu kimin do haw hi.

³⁵ Mah sun lelengin la haw a, Lakhish khua a bawl haw bangbokin Eglon khua mite vang pa khat hei suakca ngawlin nam tuah sat hum khawng haw hi.

³⁶ Mah nungten Joshua le a ngalkapte cu Eglon pen Hebron ah hawhin, do haw hi.

³⁷ Hebron khua cu la in, a kumpi haw a thah nung haw ten a khua mite vang that khawng haw hi. Hebron khua cu siatsuah khawng haw hi. Eglon khua a bawl haw bangin Hebron vang pa khat hei suakca um ngawlin that khawng haw hi.

³⁸ Joshua le a ngalkapte cu Debir lamah hekkikin, Debir khua cu do haw hi.

³⁹ A kumpi haw cu manin, mah khua le a elkim a um khua la haw hi. A mihing haw venghawng that khawng haw hi. Hebron le Libnah khua mite le a kumpi haw a thah khawng haw bangbokin, Debir khua mite le a kumpipa vang khawih ngawlin that khawng haw hi.

⁴⁰ Joshua in ngam hempoh neh khawng hi. Mualhum ngam le Negev ngam hihen, munlawn le mual tuanpi hihen a kumpi bawi tuah neh khawng haw hi. Israel Topa Pathian thupiakmi bangin mi pa khat hei suakca ngawlin that khawng limlem haw hi.

⁴¹ Joshua in hanglam ngam Kadesh Barnea pen tuipi mawk a um Gaza tian, Goshen ngam hempoh le saklam ngam a um Gibeon tian neh khawng hi.

⁴² Israel i Pathian Topa in Israel mite a panpih hangin, hi ngam hempoh le a kumpi haw cu tum khat do in, Joshua in neh khawng hi.

⁴³ Mah nungten Joshua le a ngalkap cu a ngiahbuk Gilgal ah kikleh haw hi.