JOSHUA 1 - Ngawm Bible

Pathian In Kanaan Ngam La Tukin Joshua Thupia

¹ Topa i sal Moses a thih nungten Moses bawmtu Nun i capa Joshua lakah Topa in,

² “Ka salpa Moses cu thi zo hi. Atu-in nangmah le Israel mihing na venghawngin, bawm bawl unna, Jordan ngun kaltanin, ka piak tukmi ngamah hawh un hi.

³ Moses lakah ka hilhsa zo bangin na hawhnak tuk uh ngam hempoh cu ka miphun nangmu lakah pia zo toh ing.

⁴ Na ngam uh cu hanglam phillawn pen saklam Lebanon mual tiang, nisuahnak lamah Eufrates ngunpi pen Hit ngam hempoh le nitumnak lamah Mediterranean tuipi tian hi tuk hi.

⁵ Na nunsung hempoh ah kuamah in nang cu neh haw tukma hi. Moses lakah ka um bangbokin, na lakah um tung. Ituk mahten nangmah cu zamsanin, lawl awng tuk mang hi.

⁶ Ngilzet le ngalpha zetin umin, itahim titale, pia tung hi tin, na pu le pa tei lakah ka tepsa mi ngam na lak uhten, Israel mite cu nangman lampui tuk ci.

⁷ Moses i piakmi Thukham cu kimno zui tukin ngilzet le ngalpha zetin umin hi. Thukham a neubel tianin zulzau ngawlin zui inna, na hawhnak hempoh ah na lamtuang tuk hi.

⁸ Thukham laibu cu phawkngil hihim pahsun. A sung a, ngatmi bangin na nun theihnak tukin a sun a zanin sial lelengin hi. Mahti bangin na bawl tale khangto tuk ci a, na bawlmi hempoh lawhting tuk ci.

⁹ Ngilzet le ngalpha zetin umin, tin thu ka piakmi hi ituk mahten phawkngil pahsun, lau pahsun na, na thin nau pahsun; itahim titale Topa na Pathian keimah in, na hawhnak hempoh ah um pih tung,” ti hi.

Joshua In Mipite Thupia

¹⁰ Joshua in Israel mi lampuitute cu,

¹¹ “Na ngiahbuk uh pen, na eih tuk uh bawlsa khawngin, mun tihkimah hawh un, itahim titale ni thum sungah Jordan ngunpi kaltanin, Topa na Pathian uh i piakmi ngam cu co tuk uh ci, tin hilhin,” tin thupia hi.

¹² Joshua in Reuben mi, Gad mi le Manasseh mi khenkhat tei lakah,

¹³ “Topa i sal Moses i hilhmi “Topa na Pathian uhin, na khua le na ngam tukin hi ngam cu pia tuk hi, a tihmi cu komno in cing leleng un.

¹⁴ Na zi uhte, na canau uhte le na nganhing uhte hempoh tuah Moses i piakmi ngam, Jordan pen nisuahnak lamah um un hi; mahnaven nangmu lak pen ngalkap hempoh cu Israel tei ca in, ngaldo tukin maiah not unna, Jordan ngunpi kaltan un hi.

¹⁵ Topa na Pathian uh i piakmi ngamah Israel na unau ten umnak a bawl nung haw ten Topa i sal Moses i piakmi Jordan ngun pen hi mun nisuahnak lamah nohte vang kik unna, mah ngamah um tuk uh ci,” ti hi.

¹⁶ Amuh ten Joshua lakah, “Na thupiakmi hempoh cu bawl tuk ung a, na hawhtiknak mun hempoh ah hawh tuk ung.

¹⁷ Moses i thu ka zui uh bangbokin, na thu zui tuk ung: Topa na Pathian cu Moses lakah a um bangbokin, na lakah um zal tahen.

¹⁸ Akua hei hihen na thu el tu le a zui ngawltu cu thah hi tuk hi. Ngilzet le ngalpha zetin umin hi,” tin Joshua cu ti haw hi.