JOEL 3 - Ngawm Bible

Pathian In Miphunte Thukhen tuk

¹ Mah hun le mah ni ten Judah le Jerusalem cu mi bawngpha in bawlleh tung.

² Ka miphun hempoh cu munkhatah sam khawm tung a, thukhennak Munlawnah hawhpih tung hi. Ka miphun Israel tei can ai-in, mahlai munah amuhte thukhen tung hi. Ka mihingte cu amu ngamsung tekah kai khekin, ka ngam cu semkeh haw hi.

³ Ka mihingte cu kungkhai in semdun haw hi. Zu silnak le numei pha ngawl leinak tukin pano le numei naupangte cu salin zuak haw hi.

⁴ Noh Taiar, Sidon le Filistin ngamte, keimah iti bang bawl nuamin pel li uh nge cim? Ka humah phulak tum uh cim? Ka humah i bawl thei tuk uh cim? Na bawl uh tale manlang zetin, nangmu lu humah hengkik paih tung hi.

⁵ Ka sui le ngunte la in, ka na sunglawite pua khawngin le na biakinn uhah a koihtu cu nangmuh hi uh ci.

⁶ Judah le Jerusalem mite cu amu ngam pen khawlapi ah hawhpihin, Grik tei nelah zuak uh ci.

⁷ Mahnaven na zuaknak mun uh pen sosuah tung a, taisan haw tuk hi. Na thil bawl uhmi cu nangmu lu humah heng kiklehtik tung hi.

⁸ Na canu le capa uhte Judah mitei nelah zuak tung a, amuh ten ngam khawlapi a um Seba tei nelah zuak haw tuk hi. Keimah, Topa in hilh zo toh ing.

⁹ “Miphun hempoh nelah than un, ngal do tukin tuangtim ham unna, na ngalkap uhte tho haw hen. Ngaldo tuk hempoh cu munkhatah tawkdun khawmin hawh haw hen.

¹⁰ Na lobunnak tuman uh cu namah seek un. Na thingsuinak nam uhte cu ceipi in bawl un. Mi nawmtambel vangin ngaldo bok hen.

¹¹ Manlangin tul un, piam le pam miphun hempoh, mahlai munah tawkdun khawm un,” ti hi. Aw Topa, na ngalkapte, ngaldo tukin hahin hi.

¹² “Miphun hempoh ten ngaldo tukin thok haw hen. Topa i Thukhennak Munlawnah hawh haw hen. Na elkim a, um miphun hempoh; thukhen tukin mahlai munah keimah khung tung hi.

¹³ A sualnak haw nase leita hi, cang-ah hun zo, namkawi kaisuah un. Hung unna, sabittui suuk un. Sabit ngawinak khuk dimin, sabit buulte vang dimlet hi.

¹⁴ Thukhennak Mun lawngpi sungah mi thawng tampi um haw hi. Thukhennak Mun Kuampi pen Topa i thukhennak ni nai zo hi.

¹⁵ Ni le hade cu thimin, aksite deleh haw ma toh hi.

Pathian i Mihing Muicu Piaknak

¹⁶ Topa i thawm ngengnak cu Zion Mual pen thumsuk tuk hi. Jerusalem pen a aw suah tuk a, lei le van hing khawng tuk hi. Mahnaven a mihing tei ca in Topa cu a buknak haw hi. Israel tei ca in panmun khualnak mun hi.

¹⁷ Keimah cu, Topa na Pathian ka hihlam thei tuk uh ci; ka mual thiangtho Zion ah a ummi ing. Jerusalem cu khua thiangtho hi tuk a, ngamdangmi kuamah in neh thei haw tukma hi.

¹⁸ Mah ni-in, mual sangpi hum pen sabittui put tuk a, mual neuno pen khuinawi luang tuk hi. Judah tei ngam lui hempoh ah tui luang tuk hi, Topa Biakinn pen ciktui puttulin, Shittim munlawn cu hingtik tuk hi.

¹⁹ Mahnaven Izipt cu phillawn ngamko in cang tuk hi. Edom ngam cu hampa lakin cang tuk hi. Itahim titale Judah ngamah thilpha ngawl dekin misual ngawl tei thisan a luantik haw hang hi.

^20-21 Misual ngawl tei thisan a luantik haw hangin keimah in phula tung hi. Mahnaven Judah cu kumkhua in ngam luahin, Jerusalem ah a catngawl mihing um haw tuk hi. Topa keimah cu Zion ah um tung,” ti hi.