JOEL 2 - Ngawm Bible

Topa i Ni Ngallinnak Piatu Khaaumawngte

¹ Zion mual pen pengkul tum un: Pathian mual thiangtho hum pen ngallinnak daak tum un. Hi ngamsung ummi hempoh ten lau in, can khawng haw tahen. Itahim titale Topa i ni cu nai zo hi.

² Khuathim le khawngaih ni heng hi. Meingo thimpi le khaaumawng tei khuhbing ni heng hi. Mual humah khuathim bangin khaaumawng ngalkap honpi heng hi. Hih ni bang um awng ma hi. Mailam hei ten um awng tukma hi.

³ Meipi in, a nung le mai haw pen kangtum khawng hi. A matan haw a ngam cu Eden huandum bang hi naven a nunglam haw cu phillawnin cang hi. A hawhnak haw lampi ah kuamah suakca haw tukma hi.

⁴ A mel haw cu cipuh honpi bang le cipuh ngalkap bangin tai haw hi.

⁵ Cipuhleng ke thum bangin thumin, mualhumah dawk zawzok haw hi. Cangkung meikang bangin tha tui in, ngaldo tuk ngalkap honpi bangin sialcelh haw ma hi.

⁶ A matan hawah miphun tampi lungkhamin, a mai haw dalkhawng hi.

⁷ Ngal hangbel bangin mainot haw in, ngalkap bangin pang humah kai susuih haw hi. Amu malam tekah hawhin, kuamah lam pial haw ma hi.

⁸ Pa khat le pa khat nawkdun kha haw ma hi. Mailamah cawl ngawlin hawh pilpel haw a, kuamah in khaktan thei haw ma hi.

⁹ Khuapi ah a hen haw ten, khua kulhtian humah kai haw a, nguca bangin hi tukvelh pen tumin, inn hum le inn sung tian tum haw hi.

¹⁰ A matan hawah lei buppi cu hingin, van vang hing dudut hi; ni le hade thimin, aksite vaak haw ma toh hi.

¹¹ Topa i thupiaknak au thawm cu a ngalkap tei mai ah vanthum bangin thum hi. A ngalkapte tha nei mahtak haw hi. A nadektu cu sialcelh haw ma. A lauhuai zetmi Topa i thinuknak ni cu! Akua in thuak thei tuk him?

Topa In Sualsiktik

¹² Topa in, “Atu hei in,” na lungmu uh venghawng tuah “Ancang le hitui luang tianin kikleh un; ka lakah thasia zetin kikleh un hi.

¹³ Na thasiatnak uh cu na lungmu tak loli tuah langtik unna, na puansilh uhte balkeknak bekin tawk ma laih,” ti hi. Topa na Pathian nelah kikleh un. Amah cu hehpihnak le itnak neitu hi; thinsau in, a kho mi itnak tuah dim hi; dantat tuk a ngaihsutsa vang supleh thei hi.

¹⁴ Topa na Pathian uhin, a lungmu khellehin, lo an suak tukin muicu pia thei hi. Sangvut biakpiaknak le sabit biakpiaknak a nelah pia tuk uh ci.

¹⁵ Zion ah pengkul tum un, an can tuk thupia unna, mipi pumkhawm tukin sam un.

¹⁶ Mipi sam khawm unna, khuapi sunglawizet bawl un. Upateleh naupangte sam khawm un. A ang sungah a cawi haw laihmi naunote vang sam khawm un. Mohuaitu tangvalpa vang a inn pen tulin, mothak vang a inndat sung pen tul hen.

¹⁷ Topa i nadektu thiampite cu Biakinn tumnak kongka le biaklandawh laklawhah dingin thungenin kap haw hen. Topa aw, na mihingte hi hehpih za zalin; Miphun dang ten, “Na Pathian haw cu ilai ah um him tin, zawnsakin, a nuihsan haw tuk tianin maw, ka um tuk uh phal hihim pahsun.”

Pathian In Israel Ngam Phalehtik

¹⁸ Topa in, a ngam ca in ngaihsaknak langtikin, a mihingte hehpihleh hi.

¹⁹ A aunak haw zain, a nel hawah, “Ngai un, an, sabit le olif situi pialeh tung a, taizet tuk uh ci. Miphun dang tei mai ah mualpho in umtik tukma toh ing.

²⁰ Saklam ngam a, na lauzet uhte cu na nel uh pen phillawn lamah hawlvawk tung. A mai nawktute cu nisuahnak lam Tuipi Thi sungah, a nungzui lehtute cu nitumnak lam Mediterranean tuipi sungah hawlvawk tung. A luang uih haw cu khawlapi tiang nam tuk hi. Pualthau zetin, na a deh haw hangin siatsuah tung hi.”

²¹ Leingam aw, imah lau pahsun, lungdam thatui zetin umin hi. Topa in, nohtei ca tukin na ngengpi bawlsak zo hi.

²² Ngamsate aw, lau pahsuh un; na tatnak tuk uh hamhing leleng tuk hi, thingkungte a ngah, ngahin, theipi le sabit vang ngahzet tuk hi.

²³ Zion mihingte, na thatuizet unna, Topa na Pathian nelah na lungdam un. Amah in, na kul zah uhin, khal nguah, phalbi nguah le khuapi nguah zutikin, khuapi nguah ten ni dang bang lengin nguahzutik tuk hi.

²⁴ Na cangcilnak mun cu cang a dimin um tuk hi. Sabit ngawinak khuk le na beel uhte cu sabittuileh olif situi cu let tuk hi.

²⁵ Ka hahmi thing eitu khaaumawngte, a honpi a um khaaumawngte, a leng pepel thei khaaumawng tei eihmite cu keimah in lulleh tung hi.

²⁶ Na duhzah uhin, ei in, taizet tuk uh ci. Topa na Pathian min cu pahcawi tuk uh ci. Na ca uhin, a lamdang na bawlsak zo. Ka mihingte cu mualpho in, umleh haw tukma toh hi.

²⁷ Israel mi lakah ka um hi, thei tuk uh ci. Topa keimah bek hi, na Pathian uh ing hi; a dang um haw ma hi. Ka mihingte cu mualpho in um haw tukma toh hi.

Topa i Ni

²⁸ Tu nungten mi hempoh humah ka Hawvang buak tung a, na capa le canu uhten ka thu phuang haw tuk hi. Na putek uhten mangmanin, Na khangno uhten muhnak nei haw tuk hi.

²⁹ Mah ni ten salnu le salpa tei hum tianah ka Hawvang buaksuk tung hi.

³⁰ “Vanah hihen, leihumah hei hihen, ngallinnak langtik tung hi. Thisan le mei alh, meikhu tom um tuk hi.

³¹ A lauhuai zetmi Topa ni, a hen deuh laih ngawlin ni cu thim tuk a, hade cu thisanin cang tuk hi.

³² Mahnaven Topa i min a samtu hempoh cu suahcaknak ngah haw tuk hi. Topa in, a hilh hamsa bangin, ‘Zion mual le Jerusalem khua sungah a suakca mi um haw tuk hi; Topa i tenmite cu suakca haw tuk ti hi.’ ”