JOEL 1 - Ngawm Bible

¹ Hithu cu Pethuel capa Joel nelah Topa i hilhmi hi:

Khaaumawng Ten Ngam Siatsuah

² Noh, khanghamte ngai hih un; Judah ngamsung a ummi ten thei ten un. Na khan sung uh le na pu le pa tei khan hei ah hiti bang thu piang awng a maw?

³ Hithu hi na ca tei lakah hilh unna, na ca uhten khang khat nung khang khat hilhdun pepel haw hen.

⁴ Thing eitu khaaumawng tei eihbang cu a honpi a ummi khaaumawng ten ei haw hi. A hon, a honin, a ummi khaaumawng tei eihbang cu a dawk pepelmi khaaumawng ten ei haw hi. A dawk pepelmi khaaumawng tei eihbang cu thingnget khaaumawng ten eitum khawng haw hi.

⁵ Noh zukham misilte tho unna, kap un; sabittui khamtute tau li un. Na zu intuk uhte bo khawng zo hi.

⁶ Khaaumawng honpi in, a ngam uh sim hi. Amuh cu ngilzet haw a, sialcelh ngawlin tam haw hi. A ha haw cu kiosa ha bang le a tinte cu kiosa tin bang hi.

⁷ Ka sabit kungte siatsuah khawng haw, ka theipi kungte ek khawngin, a ceh nei ngawlin bawl haw; A ngah thawi khawngin, a hawng tian hawk khawng haw; A kangkak nangawn heuh ciang khawng pilpial haw hi.

⁸ Noh mihingte, a pasal tuk tangval pa i thihsanmi khanglai nu bangin kap un.

⁹ Topa i Biakinn ah piak tukmi sabittui le sangvutte umleh ma toh hi. Topa i nadektu noh thiampite kap un!

¹⁰ Lo hempoh sia khawng zo in, lo ngamah imah tang ma toh, ankungte sia khawng haw zo. Sabittuite kangin, sathaute suakleh ma toh hi.

¹¹ Lobungte, thasia un; sabit cingkemtute, thasia in kap un. Sangvut le barli sangvutte um haw ma toh. An cop tuk imah umma hi.

¹² Sabit kungte thiimin, thei kungte ko hi. Tale kungte, Ung kungte, apple kungte le thingkung dangte vang ko khawng zo haw hi. Mihing tei ca in lungdamnak bota hi.

¹³ Biaklandawh hum a nadektu, noh thiampite thangkhau puan silhin kap un! Biakinn ah hawhin, zankhua kap un. Pathian ah na piak tuk uh an le sabittuite bo khawng zo.

¹⁴ An can ni bawl unna, nadeh ngawl ni-in bawl un! Topa i Biakinn sungah upa le ngamsung mihing hempoh sam khawng un. Topa Pathian nelah a kapthahin, hehpih kun un.

¹⁵ Topa i ni cu nai zo hi. Mah ni cu lauhuai leita! Cungnungbel el pen a nase zetmi siatnak heng tuk hi.

¹⁶ A mitmuh lengin ante bo khawngin, Pathian inn sung pen lungdamnak le lungnopnakte bo khawng zo ma maw?

¹⁷ Lei ngamko in, ancite thi khawng haw hi. An koihnakte sia khawng zo hi.

¹⁸ Nganhingte vang hamin kap li haw, khuicangte lungbingin van zoto thong haw hi. Itahim titale eih tuk hamhing umma toh hi; Tuuhonte vang thi li thong haw hi.

¹⁹ Topa aw, nangmah sam ing. Itahim titale meipi in, hamhing le thingkungte kangtum khawng hi.

²⁰ Ngamsung a um ngamsate vangin nangmah kinzet haw hi. Itahim titale ciktuite kang khawngin, hampa hempoh mei in kang khawng zo hi.