JOB Laibu (The Book of Job) 9 - Ngawm Bible

Job i donlehnak:

^1-2 Hi zuh hi, mahte cu ka theihsa ngeh hi. Mahnaven itin kaw mihingin, Pathian mai ah midik a hih thei tuk?

³ Itin kaw Pathian thu cu a el theih tuk hi. Kua ma don theih tuk ngawlmi thu thawng khat hi dong thei si!

⁴ Pathian i cihnak cu thukzet hi, a huham neihmi cu zalzet hi, Kuamah in dodalin, a mai ah ding thei haw tukma hi.

⁵ Ngallinnak pia ham ngawlin mualte thawntik hi. A thinukin siat suah khawng,

⁶ Pathian in hiinhingtikin, leipi a dinnak bulte hing khawng haw hi.

⁷ Pathian in, a thu in, ni suak tuk ngawlin kham thei hi, Aksite vang zanlam ten vaak tuk ngawlin kham thei hi.

⁸ Van khi puan bangin a zak ten, kuamah in bawm haw ma hi. Tuipi sung ngulpi i ngum a, ke tuah a sikpek theitu Amah bek hi.

⁹ Pathian in van aksi; zaangkhua, si luk, zawlzawng, ngambawm le zaawltingte bawl hi.

¹⁰ Kuamah i theihzawh tuk ngawl; na lamdang a bawl mite vang sialceng tukma hung.

¹¹ Pathian cu ka el pen letvawk hi, mahnaven mu thei mang. Hawhngut naven thei zo cuang mang.

¹² A deihmi cu la in, kuamah i kham theih kha ma. Ikaw na bawl tih vangin kuamah in thudong ngam haw ma hi.

¹³ Pathian thinuknak cu dai ngawlin, a langpangtu tuipi ngulpi Rahab le a bawmtute cu sikpek khawng hi.

¹⁴ Mah hangin itin kaw Pathian cu ka don theih tuk? Itin kaw amah el theihnak tuk kammal ka zei theih tuk?

¹⁵ Mawh nei ngawl hi naveng amah cu donleh thei mang. “Hu hehpih zalin,” tin, keimah thukhentu Pathian nelah nget bek hi, ka tih theih calam hi.

¹⁶ Ka otnak tuk hun a pia hei in, ka otmi ngai tuk hi tin, um thei mang.

¹⁷ Thu le la imah um ngawlin, keimah nuaipek tukin huihsia hah hi, kei a bawlsiatnak cu khang dedeuh hi.

¹⁸ Hai hawhnak tuk hun hei pia ma hi, ka hum a bawlmi hempoh ten ka lungbuaitik sesem haw hi.

¹⁹ Ka thangilnak suah tung maw? Pathian bangin tha ngil akua kaw um? Dikcangnak lamah ti ahin, akua in kaw thukhennak zungah a henpih thei tuk?

²⁰ Mawhnak nei ngawl muantak hi leng naveng ka awnkam pen mawhsiat hi, Sonbang tuk um ngawlmi hi naveng, ka ottul masa hangin sual nawn hi.

^21-22 Sualnak nei mang, mahnaven imah lamdangleh ma toh. Nung tuk hi napleh ma toh ing. A sual uh vang, a sual uh ngawl vangin lamdang lehma toh. Pathian in siatsuah khawng tuk poh hi.

²³ Phawhkhak ngawlin, mawh nei ngawlmi a thih ten Pathian in nuihsan hi.

²⁴ Pathian in leipi cu mipha ngawl khutah pia hi. Thukhentu tei mit cu puanin hup khawng hi. Mahte cu Pathian i bawl kha ma hi na ti uh tale, a koi bawl tuk kaw?

²⁵ Ka hunte cu phatnak um ngawlin let pepel hawta hi, Zualkotu sangin manlang saw.

²⁶ Ka nunnak ni cu letvawk pepel ta hi. Pumpeng tuah bawlmi hawmkuang bangin le ak mantu mupi bangin manlang hi.

²⁷ Ka thuaknak cu phawkngil tain, lungdam maituino tuah um ka tum hei ten, ka cimkhamnak cu keimah hil tukin kikleh lelem haw tuk hi.

²⁸ Ka haksat thuaknak hi lau ing. Pathian in sual ci ti zo hi.

²⁹ Pathian i sual thu a khen nungten itakaw ka sihsan ka khual lih tuk?

³⁰ Ka sualnak cu iti bang sahphio tuah hei, somciang thei tukma.

³¹ Pathian in, a lauhuai khuk sungah khia in, ka puansilhte nangawnin, keimah zahcak pih haw hi.

³² Pathian hi mihing bangta ahin, don nase thei tung; Ka thu uh son tukin zungah hawhin, ka thu uh cu soncat tuk hi.

³³ Mahnaven ka laklawh uhah kamtai um haw ma hi. Pathian le keima laklawhah thukhen theitu kuamah um haw ma.

³⁴ Pathian, kei dantat toh pahsun; lauhuai na hihnakin ka thinsutik ma toh hen.

³⁵ Imah launak um ngawlin, awntul bok tuk toh ing; Itahim titale ka lungmu cu keimah in theibel ing.