JOB Laibu (The Book of Job) 8 - Ngawm Bible

Bildad in:

^1-2 Huih bangin imah nge ngawl na otlih cu ceng toh cim?

³ Pathian in thudik cu melh awng ma hi; A dik ngawlmi vang bawl awng ma.

⁴ Na canote Pathian humah a sual haw hangin, a sualnak haw bangin dantat ci.

⁵ Mahnaven atu-in, Ihempoh tithei Pathian ngenin hi.

⁶ Thiangtho in, na dikcang ngangai ahi tale, Pathian in bawm tuk a, Na innkua tungdingleh tuk a, laksawng vang pia tuk hi.

⁷ Pathian i piak tukmi tuah tehkip ten, na neihsa na sun mite cu imah hi haw tukma hi.

⁸ Tanglaih a cihnakte zoleh hemin, a pu le pa tei theihmi thutakte ngaisung lehin hi.

⁹ A nunnak uh hi com leita in, a theih uhmi imah umma hi. Leihum a nunnak uhte cu lim bang hi.

¹⁰ Mahnaven tanglaih micip ten na zilh haw henna, a hilh mek haw mi hi ngai hemin;

¹¹ “Phaikung cu a kawt ngawlnak munah um awng ma hi. Cikdup pualamah um awng ma hi.

¹² A neuno laihin man tak a hih haw laih ngawl hei in, tui a kang tale thim masabel haw hi.

¹³ Pathian thei ngawltute cu mah bang haw hi. A muansannak haw bo hi. Pathian tel ngawlin a nun haw ten a muansannak haw bo hi.

¹⁴ Nimzang khat, maimomzang khat muang haw hi.

¹⁵ Maimomzang, zang khat a ngaingam haw tale hen ni maw? Nimzang khat tuah a len haw hei in ding thei ngai haw ni maw?”

¹⁶ Mipha ngawlte cu sun ni al a, hampa bangin po haw hi, Huan sungah a dim khawngmi hampa bangin po hi.

¹⁷ A zung haw tuah suangte vialin, suang ummi hempoh vial khawng haw hi.

¹⁸ Mahnaven bot inna, bo thal tuk hi; mahlai mun a umlam haw kuamah in thei haw tukma toh hi.

¹⁹ Mahzuh hi, mipha ngawl tei lungdamnak cu mahti bang lelengin bo hi, midangte hungin, a umnak luahtum khawng haw hi.

²⁰ Mahnaven Pathian in mifel cu lawl tukma hi, mipha ngawl tei baan vang ngiltik cuang tukma hi.

²¹ Na mitmai ah lungdamnak lang tuk a, na kam cu nuihnak tuah dim tuk hi.

²² Mahnaven nangmah a huatute cu a zakcatik tuk hi, mipha ngawl tei innkua cu pailal tahaw tuk hi.