JOB Laibu (The Book of Job) 6 - Ngawm Bible

Job i donlehnak:

^1-2 Ka thuaknak le ka lungsiatnak hi. Cuaikhainak pen khingkhai bang ahin!

³ Tuipi a, philnel sangin ngit saw tuk hi. Ka kamhang ten na lung-amtik pahsuh hen.

⁴ Ihempoh tithei Pathian i thalcangin ka sunglam pen kalh hi, a ngu cu ka pumpi cingah zalhin, Pathian in, a lauhuai nate ka mai ah tiang hi.

⁵ Laak in hampa a peh ten a lungkim hi, Khui hei in mengdenin hampa ko ei.

⁶ Mahnaven a uknak um ngawl, ci sawh ngawl an cu akua kaw a ei thei tuk? Aktui hawngin uknak nei maw?

⁷ Mahtibang an ei tuk cu nap hihim mang. Ka eihmi hempoh cu ciat dimdem khawng ing.

⁸ Pathian in ita ka ngetmi cu pia tukma kaw? Itakaw ka thungetnak a donleh tuk ngawl?

⁹ Pathian in zan dikdekin, a ngawi ahin, Ama khutin ka nunnak a botik saw ahin, deih na vengin!

¹⁰ Kei that tuk hi tih ka thei ahin, iti zahin ka thuak ahi hei in, lungdamin dawk tung. Pathian cu a thiangtho hi, tih thei ing. A thupiakmi cu el awng mang.

¹¹ Nung hih tukin iti bang zaangtha kaw ka neih laih? Muansanmi imah nei ngawlin, ita nungca nuam li kam ing?

¹² Suang tuah bawlmi ing maw? Ka pumpi daal hi maw?

¹³ Hupdun thei tukin zaangtha nei ma toh ing; Bopnak deihin, zotnak tuk le nei mang.

¹⁴ Tu bangin ka cimkham hun ten Pathian ka nunghek ten hei hihen, ka nunghek ngawl ten hihen, muantak ngualcam kul ing.

¹⁵ Mahnaven noh ka ngualcamte cu nguah a zuk ngawl hun ten a kangmi luitui bangin kei suamtu hi uh ci.

¹⁶ Mah luituite cu vuk le tuikhal tuah dim haw naven,

¹⁷ Nisa hun ten zung khawng haw in, kangko khawng hi.

¹⁸ Nganhing tuah khualzinte lam pai haw in, tui zei in, phillawnah vakin, thi haw hi.

¹⁹ Sheba le Tema khua pen, ngan honpi tuah khualzin miten zei haw hi.

²⁰ Mahnaven a ko mi lui mawkah a muansannak haw bota hi.

²¹ Nohte cu keima ca in, mah lui bangin, Ka umdan na muh uhten lamdangsa in lau uh ci.

²² Laksawng pia un, ti ing maw? Ka ai-in mi pa kha khat nawhthuh piatik ing maw?

²³ Ahimata ka ngalte le hehpihnak nei ngawl mi bawlsiatu khut pen pan un hi ti ing maw?

²⁴ Ahi tale, zilh teh ve ule! Ka sualnak hu hilh hem un! Awn ngawlin mengdenin ngai teh nang.

²⁵ Awn taituang cu lungmu sung tum hi, Mahnaven na otmi uhte cu a thawnthong hi.

²⁶ Ka otmi hi huih bang thong hi tin, ngaisung uh ci. Ahi tale itakaw ka lungbingnak awnkamte cu na don nuam lih uh?

²⁷ Nu le pa nei ngawl ca-ngah nautate cu, aisannakin mang uh ci a, Na ngualcam phabel uhte naunehin, hauhpih tuk na tum uh.

²⁸ Ka mitmai hi zo hem un! Zolthu son tuk mang.

²⁹ Valthau leita zo uh ci! Mi namnuai toh pahsuh un! Kei lawl pahsuh un! ka thu cu dik hi.

³⁰ Mahnaven zolthu son li bangin ngaisung uh ci; A dik le dik ngawl deidan thiam ngawlin ngaisung uh ci.