JOB Laibu (The Book of Job) 5 - Ngawm Bible

¹ “Job, sam hemin! A donlehtu akua bek um haw ni maw? Na zotnak tuk vancungmi pa khat bek um haw ni maw?

² Thinuk leleng a nun cu misilte thattu hi. Iksiknak cu mi tawinate thattu hi.

³ Misilte lungmuang zetin, a um haw mu zo toh ing; Mahnaven phawhkhak ngawlin, a innkua haw cu tamsiatnak tawk haw hi.

⁴ A canote cu himnak tawk thei awng haw ma; Thukhennak munah kuamah in amuh panin, ding haw ma.

⁵ Misil tei ankung cu ngilkial ten ei haw tuk hi. Ling lak a, pomi ankung tianin; a hauhnak haw cu dangdum ten iksik haw hi.

⁶ Phatngawlnak cu leisung pen po ma hi; Haksatnak vang leisung pen a tulmi kha ma hi.

⁷ Meithem cu mei alh sung pen a len kek bangin, mihing hum a hengmi haksatnak cu mihing lala i hentikmi hi.

⁸ Kei hi nangmah ka hi ahin, Pathian lamah hekkik tung, Ka thu cu a lakah hengtik tung.

⁹ Thil thupi tampi a bawlmite cu thei zo awng tuk mang; Na thasiahhuai lamdang a bawlmite cu a bo ni um awng tukma.

¹⁰ Leingam humah nguah zutikin, lo ngamte nawngtik hi.

¹¹ Mahzuh hi, mi lungnem a cawisangtu le thasia mi hempoh lakah lungdamnak a piatu cu Pathian hi.

^12-13 Mi depde tei tuptahmi cu siatsuah sakin, micipte cu a thu vaihawmnak haw in awktik hi. A bawl haw mi hei hi tahen lawhting haw ma hi;

¹⁴ Sun khuavak hei in, zan khuathim sung bangin vak kawkawi haw hi.

¹⁵ Mahnaven Pathian in mi ca-ngahte cu thihnak pen hup hi, Mi tingsamte cu nepsuknak pepan hi.

¹⁶ Mi cimkham tei lakah muansannak pia hi, Mahnaven mipha ngawlte cu vatmit khawng hi.

¹⁷ Pathian i hilhhawlmite cu mi lungdam haw hi. Nun a hilh tale na khawngai nuam pahsun.

¹⁸ Pathian i liamsuah mite cu, amah in tuamleh hi; A khutin meima piangtik a, a khut lala tuah damtikleh hi.

¹⁹ Amah in haksatnak nam luk sung pen hup tuk hi, Salih sung hei pen phatngawlnakin nang tawngkha thei tukma.

²⁰ Paampi a heng vangin thitik tukma hi; Ngaldonak a um vangin thihnak ngalnam sung pen pan tuk hi.

²¹ Mitei sonsiatnak sung pen Pathian in hupin, Siatsuahnak a hen hei ten him tuk poh ci.

²² Thisan luannak le ngilkialnak mu khawng tuk navecin, Nuihsan thong tuk ci, sahang hei lau tukma ci.

²³ Na bun mi lo sungah suang hei um tukma hi. Sahangte tuah hei in ailemno in um tuk ci.

²⁴ Na puanbuk sungah lemdaihnak tuah um tuk ci. Na tuute na zoh hei ten himdam tenno in mu tuk ci.

²⁵ Na casuante cu tamzet haw tuk a, Leihum a hampa po zah hi haw tuk hi.

²⁶ An cop hun tian himdamno in, a nungmi sangvut bangin, Kum ngeipi khan pha zetin nung tuk ci.

²⁷ Job, hih thute hi kum ngeipi cungin ka theih uhmi hi. Thudik hi, mah hangin sang tohin hi,” ti hi.