JOB Laibu (The Book of Job) 42 - Ngawm Bible

¹ Topa cu Job in hi bangin don hi:

² Topa, nang cu Ihempoh titheitu ci, Na deihmi hempoh bawl thei ci tih cu thei ing.

³ Imah cihnak nei ngawlpi in, Topa na cihnak cu ka up sualnak hangin don kha sual ing. Ka theih bat ngawlmi keima ca in thu lamdang hamto kha sual li bok ing.

⁴ “Ka otmi ngai inna, ka thudotmi don hemin?” tin ti ci.

⁵ Ni dang laihin, ka beng bekin nangmah za ing, Atu-in, ka mit loli tuah mu zo ing.

⁶ Mah hangin zakca in keimah le keimah ningdelhin, leivul le vut lakah khungin sikleh ing.

Thukhupnak

⁷ Topa in, Job lakah hi hempoh a ot nungten Elifas lakah, “Nangmah le na ngualcam pa nih tei humah ka thinuk hi, itahim titale ka sila Job in, ka thu hi man zetin hilh naven noh ten hilh ma uh ci.

⁸ Job lakah khuicang salih le tuucang salih hunpih unna, nangmu ca in biakpiaknak bawl un. Job in nangmu ca in thungenin, a thungetnak cu ngai tung a, na sil uh zahin mualphotik tuk mang hi. Amah bangin ka thuman zetin hilh ma uh ci,” ti hi.

⁹ Topa i hilhmi bangin Elifas, Bildad le Zofar ten bawl haw a, Topa in Job i thungetnak cu sang hi.

¹⁰ Topa in, Job cu a ngualcam pa thum ten thu a ngetsak nungten, amah cu pitungtik lehin, amasa laih a, neihmi hempoh i letnih tamin muicu pia hi.

¹¹ A unaupihte, a celnute le a ngualcam lun ten leng haw in, a innah an eih puai bawl haw hi. Pathian in, a humah haksatnak a hentik hangin, a hehpihnak haw thu le a hehnemnak haw thu hilh haw hi. Sumpai le sui zungbut pa khat ten pia haw hi.

¹² Topa in, Job cu masa hun a, muicu a piak sangin dawlta hunah tam saw in, muicu thupha pia hi. Job in: tuu thawng sawm le thawng li, kalauk thawng luk, khuikap thawng khat le laak thawng khat neileh hi.

¹³ Capa salih le canu pa thum neileh hi.

¹⁴ A canu upabel cu Jemimah ti haw in, a pa nihnak cu Keziah ti in, a nautabel cu Keren Happuk ti haw hi.

¹⁵ Job i canute bangin a mawi mi leihumah numei kuamah um haw tukma hi. A pa in, a capate lo le lam a sep bangin a canute vang sem bok hi.

¹⁶ Mah nungten Job cu kum za le sawm li nungin, a tu le cate khang li tian mu hi.

¹⁷ Kum tamzet nungin tekkun khukludualin thi hi.