JOB Laibu (The Book of Job) 41 - Ngawm Bible

¹ Tuipi thuanthum sung a, sahang Leviathan cu sio tuah awk thei ni cim? A lei cu khau tuah khih thei ni cim?

² A naal vitin, khaukhih thei ni cim? Thik kawipi tuah a kha sunlet thei ni cim?

³ Hu hah zalin, ti ni maw? Na lakah hehpih kun ni maw?

⁴ Nangmah tuah lungkimnak bawlin, kumkhua na nadek tukin thutiam ni maw?

⁵ Na umlawh numei tei zoh nopnakin, na inn a, na khawihmi vano bangin khih thei ni cim?

⁶ A cik zuak tukin ngasa mantu ten nepdun li haw tuk maw? Sumbawl ten zuak tukin a cik lem haw ni maw?

⁷ A vun cu ceipi tuah sunlet thei ni cim? A lu cu khau vawhmi ceipi tuah sun thei ni cim?

⁸ Na khut tuah zen hemin; nase zetin sualdun tuk uh ci; Tu nungten ti ngamleh tukma toh ci.

⁹ Leviathan cu amuh thawthong haw hei ten lau leita in leihumah lum pok haw hi.

¹⁰ A thin a pulhang ten lauhuai zet hi; A mai ah a ding ngamtu kuamah um haw tukma.

¹¹ Leviathan do in, a himdam um haw ni maw? Leihumah kuamah um tukma hi.

¹² Leviathan i kebeu tha le a tha ngildan hilh ngawlin um thei thong mang.

¹³ Kuamah in, a silhmi a angki humta saw cu duk thei haw tukma; A thik angki vang sun pem thei haw tukma.

¹⁴ A lauhuaimi a ha tuante tuah akua kaw a kha a botkek ngam tuk?

¹⁵ A ngumzaang a kep cu ngal lumphaw tampi thuah bangin, thuahdun teptup haw a, suang bangin cang hi.

¹⁶ Pa khat le pa khat a pehdunnak haw bing leita in, huih hei tum thei bikbek tukma.

¹⁷ Khoh zetin, a pehdun haw taktoh cu imah in dokcat thei tukma.

¹⁸ A hahthio ten al zawzok hi, a mit cu zingtungno nisuak bangin de selsul hi.

¹⁹ A kam sung pen mei alh tul zuazuakin, meithemte pok u-ung thong haw hi.

²⁰ A naal sung pen meikhu tulin; a so tawtokmi beel nuai a, hampa kang khu bang hi.

²¹ A haihawhin mei alhtik zawzuakin, a kam sung pen meiling tul luluih hi.

²² A ngawng cu a ngil leita hangin, cawl thei ngawl tha ngui a neih khak hangin a mutu hempoh ten lau mahtak haw hi.

²³ A vun a nemnak mun imah lai ah umma, thik bangin cangin, ektuah theih thawthong tuk kha ma hi.

²⁴ A lungmu cu suang bang cang zetin imah lau nei ma; A cangmi le a kehthei ngawlmi cangngawinak suang bang hi.

²⁵ A thawh ten a ngilbelte hei in lau haw; Thinsu in, a lungmu haw pai khawng hi.

²⁶ A lin theitu tuk ngalnam umma, a sun pem theitu tuk cei le thal vang umma hi.

²⁷ Ama lak pen thik cu cangphol nem bang thong a, daal cu thingmuat bang hi.

²⁸ Thalcang hei in hawlvawk thei ma; suang tuah sep vangin ama ca in hampa ko tuah seh bang thong hi.

²⁹ Tembek cu ama lak pen phaikung bang hi a; Ceipi in, a khawh haw hei in nuihsan thong.

³⁰ A pum vun cu beelpei hiam bang hi. A hawh thahin, a kawtmi lei cu leileh sa bangin kuivawk khawng.

³¹ Suankang sung tuiso bangin tuipi cu sotikin; Situi beel let bangin tuipi cu lettik hi.

³² A hawh ten a nunglam a, tui cu de susulin; Tuipi cu phultotikin, tuiphuanin, suaktik khawng hi.

³³ Leihumah amah tuah tehkip tuk kuamah um haw ma hi; Launak imah nei ngawl ngamsa hi.

³⁴ A pualthaubel ngamsate hei imah simsial ma hi; Hampalak ngamsa hempoh tei kumpi hi.