JOB Laibu (The Book of Job) 40 - Ngawm Bible

^1-2 Job aw, Ihempoh tithei Pathian cu eng ci, atu ni cawl tuk ci maw, don hemin?

Job i donlehnak:

^3-4 Silhah zetin awn zo ing, “Topa, kei in itin kaw ka don theih tuk? Imah awnleh tukma toh ing,” ti hi.

⁵ Ka ot tuk zah sangin a valthau in, awn zo ing.

⁶ Topa in, simpei sung pen Job lakah, hi bangin hilh thuah hi.

Topa in:

⁷ Job aw, pasal bangin ding inna, ka thudotmite don hemin hi.

⁸ A dikcang ngawlin kei bawl tum cim? Kei hi misualah koihin, nangmah saw a dikcangmi in ngaisung duncop tum cim?

⁹ Keimah zahin, na tha ngil a maw? Keimah zahin vanthum bangin na aw nging bok a maw?

¹⁰ Mahtin ahi tale minthannak le maiphatnak na neihmi tuah ding inna, Sunloihnak le huham na neihmi tuah thuamin hi.

¹¹ Mi pualthaute na zo hemin; na thinuknak nase zetin suah inna, zakcazet tukin bawlin:

¹² Hi zuh hi, zo inna, khesukin hi; mipha ngawlte cu a dinnak mun hawah cil niknekin hi.

¹³ Leisungah phum khawng inna, Mithi ngamah kencipin hi.

¹⁴ Mahti bangin na bawl thei tale, nangmah a thangphat masabeltu tuk cu keimah hi tung. Nangmah in neh cei ti tung hi.

¹⁵ Sahang Behemoth khi zo hemin; nangmah ka bawl bangin amah vang bawl ing, khuicang bangin hampa pet hi.

¹⁶ Mahnaven a pumpi ah iti zahin ngilnak um hum? Iti bang ngilnak kaw a taksa ah a um?

¹⁷ A mei cu sidar thingkung bangin khohin, a kawngtha vang ngilzet hi.

¹⁸ A nguh cu daal bangin khohin, a kete vang thik tuanpi bang hi.

¹⁹ Ka semsuahmi hempoh lak pen a lamdangbelmi ngamsa hi; Amah nehtu cu amah semsuahtu bek um hi.

²⁰ Sahang a tatnak haw mualsangah, a eih tuk hampa po hi.

²¹ Lingkung nuai ah bokin; Cikdup phaipheng lakah ngelh hi.

²² Tuimawk a, lingkung le paaknem kungin nilimtik hi.

²³ Tuilun vang lau ma hi; Jordan tuicawkin, a mai a sep li hei in, daidenno in um hi.

²⁴ Akua in kaw a mit hupin, a man thei tuk? Akua in kaw a naal pen sio tuah a awk thei tuk?