JOB Laibu (The Book of Job) 39 - Ngawm Bible

¹ Lianglak a, sathak tei ca hin hun tuk thei awng cim? Sazuk i ca hin laih mu awng a cim?

² Ha i zong sung, ca pai haw kaw tih thei cim? Ituk ten hing haw tuk tih hilh thei ni cim?

³ Ano hing tukin a nu lei ah a bawhsuk hun tuk son thei ni cim?

⁴ A canote hampa lakah khangin pilzet haw; a nu tei lak pen amu nuamnakah hawhin, kikleh haw ma toh.

⁵ Hampalak a, laak cu amu deih bangin tat theihnak thu piatu akua kaw? Hahin, amu nuamnakah a vaktiktu akua kaw?

⁶ Mihing um ngawlnak phillawn cu a inn haw tukin pia ing. Hampa um ngawlnak ci lawnlai ah umtik ing.

⁷ Thawmnging tamnak khuapi sungah um nuam haw ma; kuamah in khemin nadektik thei haw ma hi.

⁸ Mualhum cu a hampa eihnak haw mun hi; Eih tukin a hing laihmi hempoh zei haw hi.

⁹ Ngamsialin, na nadeh sak nuam ni maw? Na khui innah zan khat hei cam nuam a ni maw?

¹⁰ Khau tuah khihin, lei zalhnak doktik thei ni cim?

¹¹ Na haksa dek saktu tukin, a ngilnak muang thei ni cim?

¹² Na cangcilnak pumah kikleh tuk hi tin um cim? Na pumah an khawmtik thei ni cim?

¹³ Kalauk vano i ha khen cu iti zahin manlang kaw? Mahnaven iti bang kalauk vano hei in, tititut bangin leng thei ma hi.

¹⁴ Kalauk vano in, a tui cu lei i lumtik tukin leihumah zam hi.

¹⁵ Miten sikkeh sual haw kawn tih le ngamsa hei in cilkeh sual kawn, tih hei thei zo ma hi.

¹⁶ A canote cu ama ca ngawl bang bawlin; a cimnak cu a thawnthong tuk hi tih vang poitik ma hi.

¹⁷ Hiti bangin a siltiktu le cihnak a pia ngawltu cu Pathian hi.

¹⁸ Mahnaven nase zetin, a tai vanglak ten cipuh hum khungtu vang a tih tham ngawlin nuihsan thong hi.

¹⁹ Job aw, cipuh a caktiktu cu nangmah poh hi kha nen ti cim maw? A tuangmul cual zetin, a potiktu cu nangmah hi kha a cim?

²⁰ Khaau bangin a dawk haw khi nangmah in dawktik cim? Mi thumin, a naal haw a phit haw khi nangmah maw a phittiktu?

²¹ Thatho zetin munlawnah a ke pek tawtok haw, ngaldonak munah a tha neih tawp tuah mainot haw hi.

²² Lau nei haw ma, iti bang ngalnam hei in kiktik thei ma.

²³ Cipuh khungtu tei kenmi hiamnam: Thalcang bawm, cei le namte sudunin, ni alin de zawzok hi.

²⁴ Ngaldonak pengkul a tum haw ten mengdenin, umleh thei haw ma toh; A tha haw tho in, mailamah tai vingveng haw hi.

²⁵ Pengkul a tumsial haw ten a naal phit haw in; Ngaldonak ngim cu ngam khawlapi pen za haw, ngalkap hotu bawipa i thupiaknak aw vang za haw hi.

²⁶ Muno cu na lak pen poh maw lendan cung kha maw? Hanglamah leng tukin a ha a phalh ten?

²⁷ Muvanlai in, na thu ngai maw i kaw? Mualsang humah bu a sak ten.

²⁸ Suangkhan sangbelah bu bawlin, suang hiam le suangzumte cu a ngal kulhtianin mang hi.

²⁹ Mahlai mun pen thah tuk le eih tuk cu a khawla le a nai ah cuan kawkawi hi.

³⁰ Sa luang umnakah mulukolhte khawmkhawm haw, a cano ten sa thi cu dut haw hi.