JOB Laibu (The Book of Job) 38 - Ngawm Bible

Topa In Job A Donlehnak

¹ Mahten simpei sung pen Topa in, Job lakah hi bangin donleh hi.

Topa in:

² Ka cihnak thu a el lawlok litu cu akua nge cim? Theihnak nei ngawl pi in awn menmun li bok sisi!

³ Papi bangin tuangtimin ding inna, thu ka dot tuk mite hi don hemin hi.

⁴ Leipi ka semsuah laihin ilai ah um nge cim? Thu theizet na hi ngai tale hilh tehin hi.

⁵ Leipi hi i tia hi tuk hum tih a soncattu akua kaw? A hum a ngamngi tehnak khau a doktu akua kaw? Na theihmi um maw?

⁶ Leipi a dototu khuamte ilai humah kaw a din? Akua in akil suang phut kaw?

⁷ Vak memial ten aksite munkhatah lasa in, vancungmite cu lungdamin, a au lih haw ten,

⁸ Leisung pen tuipi a tul laihin, a khamtu tuk kongkhah akua in khak kaw?

⁹ Tuipi cu meingo tuah a khuhtu le thimnak tuah a tuamtu cu Keimah ing hi.

¹⁰ Tupi ngamngi tuk bawlsak ing a, ama kongka kalh sungah koih ing.

¹¹ “Hilai tian bek hung inna, hilai tian sial ngawl hawh thei ma ci; A ngil zetmi na tuicawkte hilai ah cawl haw tuk hi!” tin tuipi cu ti ing.

¹² Job aw, na nun sungah ni kha khat, khuavak tohin, ti awng cim? Vak memial tohin, thupia awng cim?

¹³ Vak memialin, leihum vak tukin le mipha ngawlte a ngelhnak mun haw pen hingtul tukin thupia awng cim?

¹⁴ Nisuakin mual le luamte ciangno in langtik, Puan buhmi bangin le taklei humah min ngatnak ngatmi bangin langciang soh hi.

¹⁵ Sun ni al cu mipha ngawl ca in al leita hi, Thi luangtik tuk kham hi.

¹⁶ Tuipi tawdeng a tuiputnak heng awng cim? Tuipi thuanthum tawdengah lamleng awng cim maw?

¹⁷ A thim zetmi mithi khua kongka le a cingtute a laktu um awng haw maw?

¹⁸ Leipi hi i tia hum tih hei son thei cim? Na thei ahi tale hilh tehin!

¹⁹ Vaknak hi ilai pen hung hum tih thei kha cim? Thimnak aw i lai pen kaw a tul?

²⁰ A hawhnak haw tuk lampi le a kihnak haw tuk mun hilh thei ni cim?

²¹ Tekzet toh ci a, leipi semsuah a hih laihin na suak zo ahi tale hilh thei tuk ci, tih um ing

²² Vuk le nial ka koihnak khan pal kha awng cim?

²³ Haksatnak hun can, ngaldunnak le dodun hun ca tukin koih ing.

²⁴ Ni a suahnak mun heng awng toh cim? Ahimata nisuahnak lam huih a hunnak heng kha awng toh cim?

²⁵ Nguah tui luannak hawkluam a kuattu akua kaw? Vanthum le huih sia theu ten lampi sialtu akua kaw?

²⁶ Mihing um ngawlnak munah nguahzutik theitu akua kaw?

²⁷ Hampa hing po hen tin, ngam ko lakah akua in tui paih kaw?

²⁸ Nguah in pa nei a maw? Daita in hingtu nei a maw?

²⁹ Vuk hi akua i pum sung pen piang kaw? Tuikhal hi akua i pum sung pen tul kaw?

³⁰ Tui cu suang bang suaktikin, tuipi mai khaktiktu cu akua hum?

³¹ Si luk khi munkhatah ken khawm thei ni cim? Zawlzawng kennak khau duk thei ni cim?

³² Aksi hempoh amu hun tekin suaktultik thei ni cim? Ngambawm le Zaawlting tei lampi lak thei ni cim?

³³ Vanhum a, um mitei zuimi daan i umdan son thei ni cim? Leihumah thuneitik thei ni cim?

³⁴ Meingo in, “Ka humah nguahzu hen,” tin, thupia thei ni cim?

³⁵ Khuaphelep khi thu na pia ahin, amah in, “Na thu bangin hihen,” ti ni maw?

³⁶ Cinphung vano cu tui lun tuk hi tin akua in kaw a hilh tuk? Simphuk cu nguahzu tuk hi tin thantiktu akua kaw?

³⁷ Meingo sial thei tuk tianin, a ciptu um haw maw? Van tuikuang a tui leihsuk tukin thupia theitu akua um kaw?

³⁸ Meingo pen nguah a zuk ten, leivulte pawnduntikin lei cu thik bangin a cangtik theitu akua kaw?

³⁹ Kiosa tei an a eih haw tuk zei sak awng a cim? Kiosa ngilkialte a von haw vahtik thei cim?

⁴⁰ Kiosa le a note cu akua sung hawah umin, suangkua sungah a ngelh haw laihin an piatu akua kaw?

⁴¹ Va-akte ngilkialin, a cate an duhin, ka lakah a ham lih haw ten an a piatu akua kaw?