JOB Laibu (The Book of Job) 37 - Ngawm Bible

¹ Huih sia le nguah sia ten ka thinsutik haw hi.

² Na venghawng uhin Pathian i aw nging ngai un, a kam sung pen a tulmi vanthum nging cu!

³ Vanah khuaphelep mun hempoh ah hah hi.

⁴ A aw hawl cu za hung; a nase zetmi vanthum cu nging dudum hi; mah hunin khuaphelep cu catngawlin al zawzok.

⁵ Pathian i thupiak hangin thasiahhuai nate piang hi; a theihbat uh ngawlin nalamdangte cu!

⁶ Leihumah vukta tukin thupia hi; a thupiak bangin nguah bingleihzu hi.

⁷ Nadektu mihingte cawltikin; iti bang nate dek thei haw hum tih theitik nuam hi.

⁸ Ngamsate akua sungah tum haw, akua sung hawah tumin kual haw hi.

⁹ Huih sia cu hanglam pen theu in, khawsik cu saklam pen heng hi.

¹⁰ Pathian i haihawhin, tui khaltikin, mahten a zalzet tuipi vang khaltik hi.

¹¹ Meingo lakah tui koihin, khuaphelepte de zawzok haw hi.

¹² Pathian thu zui in, leihum muntihkimah kap zawzok haw, leihum buppi mun hempoh ah Pathian thupiak bangin um khawng haw hi.

¹³ Pathian in leingam kawt tukin nguahzutik; mihing bawlsiatnak tuk maw, ahimata, a lungkimmi langtiknak tukin maw, nguahzutik hi.

¹⁴ Job aw, demno sung cawl hih inna, ngai tehin, Pathian i nalamdang a bawlmi hi ngaisung tehin!

¹⁵ Iti bangin Pathian in thupia in, meingo lak pen khuaphelep al zawzok tih thei cim?

¹⁶ Meingo cu vanah iti bangin thawn dawduah haw kaw tih thei cim? Pathian i thiamdan hi thei a cim.

¹⁷ Hanglam huihtheu in, lei a sat ten, na puansilh le na khua-um tuah na thuak lih cu.

¹⁸ Pathian in van khi phalhin, limlang bang ciang zetin, a bawl ten nang i bop theih nei nge cim?

¹⁹ Pathian nelah ka ot tukmi hilh hemin, keimu cungcang ah ot tuk nei ma ung, ka lungmu sung uhah imah umma.

²⁰ Ka ot tukmi hi Pathian nget masa kul maw? Pathian i siatsuah tuk cu akua in teng li tuk kaw?

²¹ Van a, vaknak cu alzet, de leita in zo ngam ma ung, van cu huihin mut ciangleh khawng;

²² Saklam pen sui bangin a almi lang, Pathian i huham thawm ngengnak tuah ka lungmu uh dim.

²³ Pathian i huham nase leita in nek ngam ma ung; Dikcangzet le cam zetin mihing tei lakah thuson hi.

²⁴ Mi hempoh ten a lau haw hi mawh haw ma, cip ing a tidun copte cu Pathian in imah simsial kha ma hi.