JOB Laibu (The Book of Job) 36 - Ngawm Bible

¹ Elihu in, a thuson pehlehin,

² Pathian ai-awhin ka otmi hi thinsau in ngei saw deuh hu ngai hih in hi.

³ Keimah Semsuahtu Pathian hi dikcang hi, tih langtiknakin, ka thutheihnak cangkim zetmi hi, ka theih zahin mang tung.

⁴ Na lak a, ka otmi hi a dik ngawl umma hi; Na mai ah micip tatak umin mu ci.

⁵ Pathian cu a thawmngeng zetin, mi zotsak nei ma hi; Theih ngawlmi vang nei ma hi.

⁶ Misualte cu khawih ngawlin Mi ca-ngah tei thu vang camcawi zetin sonsak hi.

⁷ Mi dikcangte cu hup hi; Kumpi bangin mi uktu in bawlin kumkhua in sunloih upatnak cotik hi.

⁸ Milai in ama thil bawlnak hangin, Cimkhamnak thuakin thik taicin tuah kencipnak a tawh haw ten,

⁹ Pathian in, a sualnak le a pualthaunak haw cu amu humah langtik hi.

¹⁰ Phat ngawlnak pen kikleh tukin a beng haw hongtikin ngallin thu hilh hi;

¹¹ Pathian thu zui in, a na, a deh haw ten, a nunsung hawah lungmuannak le hauhsaknak co ngah haw hi.

¹² Pathian thu a zui haw ma tale ngalnam tuah siatsuah tuk a, imah thei ngawlin thi haw tuk hi.

¹³ Pathian thei ngawlte cu a thin haw so leleng; Haksatnak a tawk haw hei in bopnak deihin thungen haw ma.

¹⁴ A khanphat haw laihin thi haw in, a nunnak haw cu zahcaknak tuah botik haw hi.

¹⁵ Pathian in mihing cu haksat a thuaknak haw pepanin, Haksatnak cu a mit haw vaaktiktu in bawl hi.

¹⁶ Pathian in haksatnak sung pen suahin, himnak sungah nop zetin koih hi. Na cabuai cu eih tuk an tuah dim hi.

¹⁷ Mahnaven atu-in mipha ngawl tei thuakmi bawlsiatnak thuak ci, na sualnak tuah khawthu mi thuak ci.

¹⁸ Nawhthuh eihnakin, zol theih tuk ngawlin ngallingin hi.

¹⁹ Bopnak deihin, na au li vangin nemcuam tukma, na tha neihmi hempoh hei in bawm thei tukma hi.

²⁰ Zan a heng tukmi ngakhel nuam pahsun; miphun tampi a paihlalnak tuk hun hi.

²¹ A pha ngawlmi lamah hawh pahsun; mahlai lam hek tuk ngawlin a khamtu tukin haksatnak thuaktikmi hi ci.

²² Pathian i huham a ngeng dan cu cing lelengin; Pathian cu zilhtu hempoh tei zilhtu ngengbel hi.

²³ Kuamah in Pathian cu nadektik thei haw tukma, Thil sual bawl vang nawn thei haw tukma hi.

²⁴ Pathian cu a thil bawlmi hangin thangphat leleng haw; nohte vangin amah cu thangphat bok un hi.

²⁵ A thil bawlmi hempoh cu akua a bangin mu zo haw toh, mahnaven lam khawlapi pen cuan thei ung.

²⁶ Pathian i a thawmngeng dan cu cangkimin, theihzawh ma hi; Pathian i kum vang sialzawh tuk kha ma.

²⁷ Leihum a tuipi pen tui lato in, van pen nguahzutiktu cu Pathian hi.

²⁸ Anci cingtu mi hempoh ca in Pathian in meingo pen nguahzutik hi.

²⁹ Pathian i umnak vanah iti bangin meingote hawh haw hum tih le iti bangin vanthum dudum hum tih kuamah in thei zo haw ma.

³⁰ Amah in vanhaang mawk tianin khuapheleptik hi; mahnaven tuipi tawdeng cu thim leleng hi.

³¹ Amah in nguahzutikin, mihingte cawm hi; a eih haw tuk an tampi pia hi.

³² Khuaphelep a khutah suumin, a muibatmi kha tukin kekta cu thupia hi.

³³ Huihsia heng tuk cu vanthumin theitik a, khuihon hei in, a hun cu thei haw hi.