JOB Laibu (The Book of Job) 34 - Ngawm Bible

^1-2 Noh micip le thu theite, ka thu hilhmi hi ngai hem un!

³ An cu na tep uhten a uk le uk ngawl thei uh ci; Na beng uhin thu zain, thudik ahi le hi ngawl khenkhuai thei uh ci.

⁴ Na thu cu thudik ahi le hi ngawl teng nung; thupha ahi le hi ngawl vang ngaisung teh nung.

⁵ Job in, “Mawhnak nei mang; ka humah Pathian in camcawino in thukhen ma.

⁶ Itin kaw khial ngai ing hi, tin zolthu cu ka son theih tuk? Ka meima hi dam theileh tukmi hi kha ma toh, mahnaven sualnak cu nei mang,” ti hi.

⁷ Job bang milai mu awng uh cim? Pathian zotsaknak cu baihno in son zuzung thong; A ca in, tui in bangin baih hi.

⁸ Mipha ngawlte tuah umkawm nuamin, misualte tuah hawh langkhat leleng haw hi.

⁹ Pathian i ngualcam pha hihnak cu imah nemcuam kha ma, ti hi.

¹⁰ Noh, theihtupnak a neite ka thu hi ngai teh un! Pathian in thil phatngawl bawl ni maw? Ihempoh tithei in thil sual bawl ngai ni maw?

¹¹ Mihing cu a nadeh haw zui in, Pathian in thaman pia hi. A bawl haw mi a nunzia haw tuah zui in, a hum hawah hentik hi haw hi.

¹² Ihempoh tithei Pathian cu kuamah i hum hei ah a dik ngawl bawl ma hi; akua i hum hei ah a man ngawlin um awng ma hi.

¹³ Midang akua bek pohin, Pathian nelah thuneihnak pia haw maw? Lei hum buppi hi cingin hi, tin, akua bekin dehvo pia haw maw?

¹⁴ Pathian in, a hawvang la in nunnak haihawh a laleh tale;

¹⁵ Nunnak nei hempoh thi haw tuk a, mihing hi leivulah suakleh haw tuk hi.

¹⁶ Cihnak na nei ngangai uh tale ngai hem un!

¹⁷ A dikmi le a nase mi Pathian lawl uh cim? Pathian in thudik a hua tale itin kaw leipi a uk theih tuk?

¹⁸ Pathian in, ngilo le mipha ngawl ahi haw tale, kumpi le hotute vang lawl hi.

¹⁹ Pathian in mi hempoh semsuahin, kuamah deidan ma; Uktu bawite pan ngawlin, mi ca-ngahte hua in le mihau tin deih cuang ma hi.

²⁰ Mihing cu phawhkhak ngawlin zan hei ah thi thei hi; Pathian in vat humin pai vawk haw hi. Mi ngilzet vang imah tih tham ngawlin botik hi.

²¹ Pathian in mihing tei lampi zo hi, mihing tei ke kal cu zo cangcian hi.

²² Iti bangin khuathim ahi hei in, misual mu tuk ngawlin Pathian a lim theitu thimnak umma hi.

²³ Pathian mai ah mihing hawhin le a thukhen tukin, Pathian in, a hun tek kulma hi.

²⁴ Hotute lawlin hotu dang koih tukin, Pathian in, a thu haw dotkan lih kulma hi.

²⁵ Itahim titale a bawlmi haw a neubel vang thei khawng hi; Zanlam ten vawkin siatsuah khawng hi.

²⁶ Mipi tei muh theihnak munah misualte bawl sia hi.

²⁷ Itahim titale amah cu zui nuamleh haw ma toh, A thukham hempoh vang imah sumsialleh haw ma toh.

²⁸ Amuh ten mi ca-ngah a siatsuah haw hangin huisa in kap haw; mi ca-ngah tei bop ngetnak aw cu Pathian in za hi.

²⁹ Pathian in zamsan thong tukin a ngaisung tale, akua in kaw a mawhsiat thei tuk? A mai a sel ten milai ten ikaw a tih theih haw tuk?

³⁰ Amuh uktu in Pathian thei ngawl, mi nuainem thei a koih vangin, Ngamsung miten ikaw a tih theih cuang haw tuk?

³¹ Job aw, Pathian nelah na sualnak phuang toh cim? Sualleh tuk ngawltohin, thutiamdun toh cim?

³² Ka sualnak cu lak zalin, tin ngen cim? Thilpha ngawl bawl tuk ngawltohin lungkim toh cim?

³³ Pathian i nadehnak na el nungten na deihmi bawlsak tukin muansan laih cim? Hi thu cu nangma khencat tukmi hi, kei i khencat tuk hi ma hi! Atu-in, na ngaihsutnak hilh hemin!

³⁴ Thu a ngaisung thiamte cu a lungkim leng haw tuk poh; Ka thu hilhmi a zatu micip ten hi bangin ti bok haw tuk poh hi.

³⁵ Job in, hi thu le la thei ciang ngawlin awn sual ngam maw le! A otmi hi sullam nei ngawl na hi pah!

³⁶ Job i awn hi phano in, na ngaisung uh ahi tale, mipha ngawl pa khat bangin awn hi, tih cu mu tuk poh uh ci.

³⁷ A sualnak i humah dodalnak bet hi, Ka mitmuh uhah le ka beng uh i zakin Pathian nuihsanin zawnsak hi.