JOB Laibu (The Book of Job) 33 - Ngawm Bible

¹ Mah hangin Job aw, ka ot tukmi hempoh hi phano in ngai in hi.

² Ka lungmu sung a, um mi cu ka kam pen tul tuk hi.

³ Ka otmi hempoh hi ka lungmu sung a, ummi thungai thu hi; cangcian kiuhkeuhin hilh tung.

⁴ Pathian i hawvangin kei cu bawlin, Ihempoh tithei i haihawhin nunnak pia hi.

⁵ Na don thei tale, na ot tukmi cu ngaisung hamin! zuamteh pah ni ci!

⁶ Nang le kei cu Pathian mai ah bangten hung hi. A pa nih uhin taklei tuah bawl mite hung.

⁷ Mah hangin kei cu lau nuam pahsun; nehpek tuk mang hi.

⁸ Na ot ka zakmi cu:

⁹ “Mawhnak nei mang, thilpha ngawl imah bawl mang; Mawh nei ngawl ka hih hangin sualnak pen luat ing.

¹⁰ Mahnaven Pathian in kei a do nuam hangin thu zei in, a ngal bangin bawl hi.

¹¹ Ka ke cu thik taicin tuah kenin, ka ke kal hempoh vang zociang cikcek hi,” ti ci.

¹² Mahnaven Job aw, ciangkohin hilh ing; khial ci! Pathian cu iti bang mihing sangin ngeng saw hi.

¹³ Ita mihing tei phuknak don awng ma hum tin, Pathian cu siat ci?

¹⁴ Pathian cu mihing tei lakah tu le atu-in awn hi, mahnaven a otmi cu imah simsial haw ma.

¹⁵ Mihing a hihbuh haw laihin, a mang hawah mang le muhnak tuah amu lakah awn hi.

¹⁶ A otmi ngai tukin a beng haw vaktikin hilh hi, ngallinnak a hilhmi cu lau haw hi.

¹⁷ Sualnak bawlleh tuk ngawltohin le, mi pualthau hi tuk ngawlin hilh hi.

¹⁸ Khan khuk sungah hengtik ngawlin thihnak pepan hi.

¹⁹ Pathian in mihing nun a hilh ten natnak thuaktikin, a taksa pumpi in natnak thuak hi.

²⁰ Mi dam ngawl ten an ei nap haw ma; An ukbel hei a luak haw suak.

²¹ A taksa haw kiamsuk dedeuhin a nguh haw bek tang hi.

²² Khan khuk lam zuan dedeuh haw a, mithi khua heng pal haw tuk hi.

²³ Mihing dehvo hilhciangtu tukin Pathian vancungmi thawng tampi lak pen pa khatno bek, mah mihing bawm tukin le a dikmi hilh tukin hungkha tuk hi.

²⁴ Vancungmi in hehpihnak lungmu tuah “Amah cu hah un! Mithi khua ah hawh tukmi kha ma hi; Amah tatlehnak man hilai ah um,” tin tituk hi.

²⁵ A taksa cu dawnin, a tha ngilleh tuk hi.

²⁶ Thu a nget ten Pathian in don tuk hi, lungdamno in Pathian bia tuk a, Pathian in ama ca in tuangtung lehtik khawng tuk hi.

²⁷ Amah in mipi mai ah, “Sual ing, a dik ngawlmi bawl naveng Pathian in ka nunnak khawih laih hi.

²⁸ Khan khukah hawh phal ngawlin, sun khuavakah mu laih ing hi,” tituk hi.

²⁹ Pathian in atu le atu-in, nadek hi.

³⁰ Mitei nunnak cu khaan khuuk heng ngawlin panin, a khansungah lungdamnak pia hi.

³¹ Job, atu-in ka hilhmi hi ngai in, mengdenin um inna, awn hih tung.

³² Mahnaven thuhilh tuk na nei tale hilhin, ngai tung hi; Lungdam zetin dik ci ti tung.

³³ Mah ahimata daidenno in um inna, ngai in hi; cihnak thu na hilh nang.