JOB Laibu (The Book of Job) 32 - Ngawm Bible

Elihu i Otmi

¹ Job i ngualcam pa thum ten, Job awn cu don nuamleh haw ma toh, itahim titale mawh nei ngawlin amah le mah ngaisungdun cop leita.

² Job cu midikcangin, koihdunin, Pathian a mawhsiat hangin a el hawah a dingtu Elihu a tih haw pa cu thinuk zetin sup thei ma hi. Elihu cu Ram i hinnam Buz casuan Barakel i capa hi.

³ Elihu cu Job i ngualcam pa thum tei hum hei ah a thinuk, itahim titale Job i awn a donleh theih haw ngawl hangin Pathian cu khial hi tih tuah bangten hi.

⁴ Elihu cu nautabel a hih hangin midang tei ot a bo laklawh mengdenin um hi.

⁵ A ngualcam pa thum ten Job ot a donleh theih haw ngawl ten a thinso in hi tin ti hi.

Elihu in:

⁶ Kei cu naupang ing, noh cu upa hi uh ci; Mah hangin ka ngaihsutmi hilh tukin nuam hihim mang.

⁷ Noh cu upa saw deuhte cu a awn masa tuk uhmi ci, tin ngaisung ing.

⁸ Mahnaven mihing lakah hungin cihnak a piatu cu, Ihempoh tithei Pathian i hawvang saw hi.

⁹ Mihing cu kum upa a hih hangin cip hi ngawlin, thudik vang thei saw cuang haw ma hi.

¹⁰ Mah hangin ka thu hi ngaibok tukin deih ing. Ka ngaihsutmi hilh bok tung hi.

¹¹ Na ot sung hempoh uh thinsau zetin ngai ing, cihnak awnkam na zei lih uh laihin ngak leleng ing.

¹² Phano in ka ngaih ten sung uh ci tih za ing, Job i otmite el thei ma uh ci!

¹³ Itin kaw cihnak neitu ung na tih ngam uh? Job a don theitu cu Pathian bek hi, noh ten tileh thei ma toh uh ci.

¹⁴ Job cu nangmu lak bekah awnin, ka lakah awn ma hi; Mahnaven a thu na don uh bangin don tuk mang.

¹⁵ Job aw, amuh ten ot tuk theileh haw ma toh, na thu donleh thei haw ma toh.

¹⁶ Cingdenin, a um haw tian maw ka ngah tuk? Ot uk imah neileh ngawltohin ding thong haw maw!

¹⁷ Mah kha ma hi, keimah in atu-in, don tung a, ka ngaihsutnak hilh tung.

¹⁸ Awn ngawlin um thei ma toh ing, ka sungah ka ot tukmi dim leita zo.

¹⁹ Otnak hun ka nei ngawl tale, Sabittui thak a dimmi saphaw thawl a keh bangin pokkeh tung.

²⁰ Ka ot hihim kul hi, mahbek ten haihawh thei tung; Ka kam pen hilh tul hihim tung.

²¹ Hi thu ah kuamah pat cuangmi nei tuk mang; Kuamah hei phatson cuang tuk mang.

²² Mi phatson vang thiam mang; Mi ka phatson ahi tale manlang zetin Pathian in bawlsia tuk hi.