JOB Laibu (The Book of Job) 31 - Ngawm Bible

¹ Sual nuamnak tuah khanglai zo tuk ngawlin thukam zo ing.

² Van a um Ihempoh tithei Pathian lak pen ka covo ikaw a um? Mihing nadehnak humah itin kaw lo le lam a sep?

³ Phatngawlnak a bawltu i lakah suksiatnak le paihlalnak hengtik.

⁴ Pathian in ka bawlmi hempoh thei khawng pilpial. Ka ke kal vang mu khawng siksek.

⁵ Zolthusonin hawh awng mang, midang zol tuk hei in tum mang.

⁶ Pathian amah in, a dikmi cuai tuah khai henna, ka sual ngawllam mu tuk poh hi.

⁷ A dikmi lampi pen lampial ing, thil sual bawl nuamnakin lemin, sualnakin ka khut ka nawngkaitik tale,

⁸ Ka lo sung ankungte sia khawng henna, ka cinmi an cu midang ten ei khawng haw hen.

⁹ Ka innnel pa i zi cu mawizet mu in, a inn kongka pualeu ah ngelhin, ka pang ahi tale,

¹⁰ Ka zi in pano dang ca tukin an huan bokin, pano dang ten a zaunakah zaupih bok hen.

¹¹ Mahtibang sualnak cu a sesuak mi a hih hangin a daan bangin cawh kuan piak tuk hi.

¹² Mahtibang sualnak cu ka neihmi hempoh a kokangtik khawngtu mei bang hi.

¹³ Ka umlawhpa kha khat ka humah lungkim ngawlin a phuciak tale, A hilhmi phano in ngai tung a, mahten dikcangno in, a humah nung tung.

¹⁴ Mahti bangin ka bawl ma ahi tale, Pathian mai zo ngamleh tuk mang? Ka thukhen tukin a hun ten, ikaw ka ot theih tuk?

¹⁵ Ka nu i pum sung pen kei a semsuahtu Pathian cu, ka umlawhte a semsuahtu Pathian leleng hi.

¹⁶ Mi ca-ngahte bop tuk el awng mang; Meivongte vang khaw-ngaitik mang.

¹⁷ An ka eih laihin, nu le pa nei ngawl ca-ngah ngilkialin umtik awng mang.

¹⁸ A lak hawah pa bangin um ing, ka nunsung phano in cingkhawi tung;

¹⁹ Mi tingsamzet mu ing, a ca-ngah leita haw hangin silh tuk puan hei a lei zo haw ma tale,

²⁰ Ka tuuhon lak pen ka lakmi tuumul puan pia mek ing. ka humah a lungdamzet haw hi.

²¹ Thukhennak munah neh tung hi tih thei in, nu le pa nei ngawl ca-ngah ka zol tale,

²² ka baan ek khawng henna, ka ko pen hong khawng tahen.

²³ Pathian i dantat piakmi ka lau hangin, mahti bang thilpha ngawl cu bawl vingviang tuk mang.

²⁴ Sui humah ka muansannak koih mang, sui phabel hei muang cuang sap mang.

²⁵ Mi neinung ka hih hangin pualthau lawlok awng mang.

²⁶ Vak hi tin, ni bia awng mang; mawi hi tin, hade mai ah kun awng mang.

²⁷ Mahtibang sualnak bawl tukin, sualsohnak tawk awng mang. Amuh upatnakin ka khutphalh vang nam awng mang.

²⁸ Mahtibang sualnak a bawltu cu thah tak hi; Itahim titale Pathian cu nunghekin lawl hi.

²⁹ Ka ngalte haksatnak a thuak haw ten lungdam thei mang, haksatnak a tawh haw hei ten ka thinkim ma.

³⁰ A thihnak haw tuk tamsiatnak tuah thungenin sual awng mang.

³¹ Ka ca nadektu ten, mikhualte ka innah ka tuntik cu thei khawng haw hi.

³² Suk le to ah vakkawite ka innah ngiaktik ing a, lampi ah zautik awng mang.

³³ Midang ten a sualnak haw sel tum haw naven kei cu ka sualnak sel awng mang.

³⁴ Mipi ten ka thu itin son haw tuk nen tim tih lauthawng awng mang; Nuihsan kha sual haw tuk tih lauthawngin inn sungah khahkhumdun awng mang.

³⁵ Ka thusonte hi akua bekin ngai tukma uh cim? Ka thusonmi hi kam khatno hei a dik ngawl umma hi, tin kamdun ing. Ihempoh tithei, Pathian in don hen. Keimah ngaltu ten sual a notnak haw cu ka muh tukin lai sungah a ngatsak thei haw a hin,

³⁶ Maitai zetin ka ko ah pua in, sui lukhu bangin ka lu ah khu tung.

³⁷ Pathian nelah ka bawlmi hempoh hilh khawng tung; A mai ah ultungzet tung.

³⁸ Ka bunmi lo in kei mawhsiatin, thasia in, a hitui ka caktik tale,

³⁹ A poto mi an cu ei in, lo a bungtu saw ngilkialin ka koih ahi tale,

⁴⁰ Ka lo ah sangvut le cang sang ai-in hampa le ling po saw tahen. Job i awn cu bota hi.