JOB Laibu (The Book of Job) 3 - Ngawm Bible

Pathian Lakah Job Phuciak

¹ Job cu umden thei ngawltohin, a hin ni cu tamsia nek hi.

Job in:

^2-3 Ka hin ni cu tamsiat hihen; ‘Capano hing hi,’ a tih haw zan hei in!

⁴ Ka hin ni cu thimnak ni-in, suak hen; Mah ni cu Pathian in cing ma toh hen; Mah ni-in vaknak hei umma hen.

⁵ Thimzing le a nase zetmi thimnak ni-in suak hen; Meingo hangin tuam henna, ni cu dawkin thon tahen.

⁶ Mah zan cu kum sialnak sungah telh ngawlin phiat hihen; Ituk hei ten sialcih hi ma toh hen.

⁷ Imah a piang ngawlmi zan, zan nemcuam ngawl mi le, Lungdamnak um ngawlmi zanin bawl hihen.

⁸ Mah ni tamtu tukin mipolte hilhin; Tuipi sung a, ngamsa Leviathan thupia theitu mipolte cu!

⁹ Zinglam aksi, nikonghong vaak ma toh hen! mualpi al tuk toh tin, muansannak imah umma hen.

¹⁰ Mah zan cu tamsiat hihen, ka hin zan a hih hangin; Haksat cimkhamnak tawk tuk ngawlin a hup ngawl hangin hi.

¹¹ Ka nu i pum sung pen suak ngawlin ka thita ahin nuamzet ing! Mah ahimata ka hintul ten ka thita a hin nuamzet ing!

¹² Ita ka nu in, a kawng humah cawi hum? Ita a nawicawptik hum?

¹³ Mahlai in ka thita ahin, atu-in cawlpha tuk toh naveng.

¹⁴ Tanglaih khuapi lop a tungding lehtu, a hihbu denmi kumpi le uktu bawite bang uh ci.

¹⁵ A inn sungah sui le ngun dimin, a pamtu kumpi bangin le

¹⁶ a thisa in hinmi nauno bangin hihbu zo tuk toh ing.

¹⁷ Khansungah mipha ngawlte a siatnak haw pai hi; A cawl zetmi nadektute colh umnak ngah haw hi.

¹⁸ Thawngtate hei lemdaino um thei haw in, liat le vonak pen luat haw hi.

¹⁹ Mahlai ah mihau, mi ca-ngah a kimin um haw; Silate vang suakca haw hi.

²⁰ Ita haksat cimkhamnak a thuakte nung leleng haw kaw? Ita lungsia tei lakah vaaknak heng kha kaw?

²¹ Thih tuk bek ngak haw, mahnaven thihnak heng awng ma. Hiti bang na manpha zei sangin, khan sung heng nuam saw haw hi.

²² Thi in, a vui haw laih ngawl sung cu lungdam awng haw ma hi.

²³ A mailam thu haw cu Pathian in sel sak hi, A kimkot haw cu kulhtian tuah tiang khawng haw hi.

²⁴ Ka kahnak cu ka tui le an hi in, ka taunak cu bo tih umma.

²⁵ Ka ngam ngawlmi le ka lau zetmi hempoh a venghawngin thuak khawng zo ing.

²⁶ Lungmuannak nei mang, colh ni nei mang; Ka cimkhamnak hei bo awng ma.