JOB Laibu (The Book of Job) 29 - Ngawm Bible

Job i Hilhmi Nungdawlbel

¹ Job in hi bangin donleh hi.

Job i donlehnak:

² Ka nunnak hi a bul pen ka panleh thei ahin, Pathian in kei a zoh leleng laih bang khin!

³ Pathian i mei-inn cu ka lu humah vakin, khuathim sung ka hawh ten vaknak pia hi.

⁴ Mah hunin, mi neinungzet ing, Pathian i pawlkomnak hangin ka innkua cu humhim hi.

⁵ Ihempoh tithei Pathian ka lakah umin, ka cate vang ka elah kiim dimdiamin um haw hi.

⁶ Ka khui le keel ten nawitui tampi pia in; Suangkhol lak hei pen ka olif kungte po thei haw hi.

⁷ Khua sung upate a tawhdunnak khuapi kongkhahah ka khun bok ten,

⁸ Keimah amuh bek haw ten khangnote cu ding khawng paih haw hi. Upate vangin upatnak langtikin ding haw hi.

⁹ A muk haw hupmi bangin a hotute awn haw ma toh.

¹⁰ A mu lak a mi upate vang daiden haw hi. A lei haw hei phia lehma toh.

¹¹ Keimah a mutu le ka thu a zatute hempoh ten, ka dehmi hangin pakzet haw hi.

¹² Mi ca-ngahte a au haw ten bawm ing, Nu le pa nei ngawl le mi cimkham bawmtu nei ngawlte zo ing.

¹³ Lungbing vancaukap a um miten kei cu thangphatzet haw, Meivongte vang himnak le lungnopnak zeisak ing.

¹⁴ Dikcangnak cu puan bang silh ing, Dikcang zetin thukhennak cu puancual le lupawng bangin silh ing.

¹⁵ Mitcaw tei ca in khua muhnak ing; Kebai tei ca in, a ke haw ing hi

¹⁶ Ca-ngah le mi cimkham tei ca in, a pa haw hi ing a, Ka theih awng ngawl mikhualte haksatnak a tawh haw ten pan ing.

¹⁷ Hehpihnak nei ngawl thuneitute siatsuah ing, A bawlsiat haw mite luattik ing.

¹⁸ Kum ngeipi nungca tukin le ka inn sungah lungmuang zetin thi tukin ngaisung leleng ing.

¹⁹ A zung pen tui a ngahtu le a kang pen daita dong lelengtu thingkung bang ing.

²⁰ Akua abang hei in keimah pahcawi haw, a sonsiatu kuamah um haw ma; Ka thakiam viang ma hi.

²¹ Midang tei lakah ngaihsutnak ka piak ten mengdenin ka thu cu ngai haw hi.

²² Ka hilh celh ten kam khat hei el tuk le bet tuk hei nei haw ma. Ka otmi cu a sung hawah nguahtui bangin nimsuk hi.

²³ Akua hei in ka awn ngai tuk cu nuamzet ten haw, Lobung ten khuapi nguah a deihzet haw bangin hi.

²⁴ A thin haw a nau ten ka mitmai pha langtik ing; nui siseno in ka um ten thinnopleh haw hi.

²⁵ Hotu dekin thuson kulmite soncat ing; Kumpi in, a ngalkapte a ho bangin ho ing; A thasia haw hei in hehnemleh ing.