JOB Laibu (The Book of Job) 28 - Ngawm Bible

Cihnak Thupi Dan

¹ Ngun a cawhnak haw khuk um; Sui a thiantiknak haw mun um.

² Miten thik cu leisung pen co haw hi. Daal cu suang sung pen tuitik haw hi.

³ Mihing ten a thukbel thimnak mun tian heng haw; Leisung a thuknakah tumin, khuathim sungah suang zei haw hi.

⁴ Mihing tei umnak pen a khawlazet munah, Mihingte ke tuah a pal awng haw ngawlnak munah, Leikua sung pen suang manpha co haw; Mahlai ah amuh bek nadekin, Khuk sungah khau tuah khaihdun haw hi.

⁵ Leihumah ankung po hi; Mahnaven mah leisung cu meikang bang lingin, so tawtok hi.

⁶ Leisung a suang sungah mepian suang manpha umin, Leivul lak pen sui mu haw hi.

⁷ Mah khuk sung hawhnak lampi cu mupi in thei kha ma; Langta hei in, a humah leng awng ma hi.

⁸ Kiosa hihen, sahang dang hihen, mah lampi cu zui awng haw ma.

⁹ Mihingin, a cangbelmi suang co in; Mual tianin, a bul pen co let haw hi.

¹⁰ Suang lakah khuk a cawh haw ten suang manpha mu haw hi.

¹¹ Tuinakte mu in, leisung a selmi nate pholhsuah haw hi.

¹² Mahnaven cihnak cu ilai pen muh theih tuk kaw? Theihtupnak cu ilai pen cun theih tuk kaw?

¹³ Cihnak tatak cu mihing ten a umnak lampi thei haw ma: Mihing tei sungah vang a lampi umma hi.

¹⁴ A thukmi tuipi le tuipi thuanthum ten, “Hilai ah cihnak umma,” ti haw hi.

¹⁵ Cihnak cu sui tuah lei theih ma; Ngun tuah vangin lei theih ma.

¹⁶ Sui phabel le suang manphate vangin aman kim haw ma.

¹⁷ Aman cu sui sangin tam saw; Sui kuang le limlang phabel man sangin tam saw.

¹⁸ Cihnak man ngangai cu Suangngo, suangsan, suang sandup manpha tei man sangin tam saw.

¹⁹ A phabelmi suang aile, sui phabel tuah Cihnak cu tehkip theih tukma.

²⁰ Cihnak bulpi cu ilai ah kaw? Theihtupnak cu ilai ah um kaw?

²¹ Leihum a nung mihing le ngamsa ten mu awng haw ma; Van a leng vanote vangin mu awng haw ma.

²² Thihnak le siatsuahnak hei in, “Mi sonleh sawlawn bek za ung ti haw hi.”

²³ Pathian bekin a lampi thei hi; Amah bekin cihnak lampi le a mun cu thei.

²⁴ Itahim titale amah in leipi mawk tian mu in, Vanhaang nuai thil hempoh vang mu khawng hi.

²⁵ Pathian in huih cu mual neitikin, tuipi thuanthum ca in ngamngi bawl hi.

²⁶ Nguah a zuknak tuk mun ngaisung sa in, Vanthum le kekta tei ca in lampi sial hi.

²⁷ Mah laihin Pathian in cihnak cu mu in, Man a neihdan khingkhai hi. A lungkimin khotik hi.

²⁸ Pathian in mihing lakah, “Cihnak na nei nuam uh tale Pathian kihca un; Theihtupnak na nei nuam uh tale, a pha ngawlte pial un,” ti hi.