JOB Laibu (The Book of Job) 27 - Ngawm Bible

Job in donlehin:

^1-2 Ihempoh tithei Pathian, dikcangnak a cotik ngawltu le, kei a khaw-ngaitiktu a nungmi Pathian min salin thukam ing:

³ Pathian in nunnak haihawh a piak sung le Pathian i piakmi ka naal sung a, haihawh a um sungin,

⁴ ka muk pen awn sia tul tukma, ka lei in zolthu son tukma.

⁵ Noh cu dik uh ci tin ti awng tuk mang; mawhnak nei mang tin ka thih ni tian dinpih lo tung.

⁶ Thudikah ka dinnak cu hah thei tuk mang; ka lung thiang hi; Ka lungmu in, khial ngai ing, ti awng tuk mang.

⁷ Keimah a ngaltu le a dotute cu mipha ngawl le midik ngawl bangin bawlsiat hihen.

⁸ Pathian a thei ngawltu ten i muansannak kaw a neih haw tuk? Pathian in, a nunnak haw a botik hun ten i muansannak kaw a neih haw tuk?

⁹ Haksatnak tawkin a au haw ten, Pathian in, a aunak haw za ni maw?

¹⁰ Ihempoh tithei Pathian nelah a lung haw dam ni maw? A lakah thungen leleng ngai haw ni maw?

¹¹ Pathian huham a ngengdan na hilh nang; Ihempoh tithei Pathian i tuptahmi na theitik nang.

¹² Mahnaven nangmuh loli in mu tek zo uh ci; Mah hangin ita hitih bang awn li thong uh cim?

Zophar in:

¹³ Ihempoh tithei Pathian in mipha ngawl, thisan luan lau ngawlte a bawlsiat dan cu hi bangin hi:

¹⁴ Capa tampi a nei haw hei in ngal kutin thi khawng haw tuk; A cano haw ten an kham thamin, eih tuk nei awng haw tukma.

¹⁵ A nung calam pa nih pa khat cu natnakin thi leleng haw tuk, a zi haw hei ten kah haw tukma.

¹⁶ Mipha ngawl ten ngun sialcelh ngawl nei haw tuk; Puansilhte vun menmunin, a kul haw sangin tam saw in nei haw tuk hi.

¹⁷ Mahnaven mipha khenkhat ten mah puan cu silh haw tuk, Midikcang khenkhat ten a ngun cu co haw tuk hi.

¹⁸ Mipha ngawl tei sakmi inn cu kho ma; maimom bu bang le lo cingtu sila tei sakmi bukno bang hi.

¹⁹ Hun khat sung cu hausa zetin zau haw tuk, A khatlawh haw ten a hauhsaknak haw cu bo khawng tih mu haw tuk hi.

²⁰ Thakhat thu in, tuihau tung bangin launak heng tuk; zanlam huihtheu in mutvawk tuk hi.

²¹ Nisuahnak lam huihsia in a inn haw pen mutvawk tuk hi.

²² Luat a tum lih haw hei in, hehpihnak nei ngawlin nuaivawk tuk hi.

²³ A tainak hawah huihsia in zui pepelin, lauhuai zetin nuainek hi.