JOB Laibu (The Book of Job) 24 - Ngawm Bible

¹ Ita Pathian in thukhennak ni tek ma hum? A ma nadektu ten thudik a conak haw tukin!

² Mihing ten ngam tam saw deuh ngah nuamin ngamngi suangphut haw; tuu ngu in amu tuu lakah koih haw hi.

³ Nu le pa nei ngawl ca-ngah tei laakte nguksak haw; A leiba a kuan theih laklawh meivongnu i khuicang matsak haw hi.

⁴ Mi cimkhamte sikpekin, mi tingsamte cu amuh lau in ngelh haw hi.

⁵ Mah hangin mi ca-ngahte cu hampa lakah laak bangin ngamkhing ngamko lakah an zei haw; A cano tei eih tuk an imah lai hei ah ngah thei haw ma.

⁶ Midang tei lo sung an la haw; mipha ngawl tei sabit huanah sabit ngah thawi haw hi.

⁷ Zan lam ten puansilh ngawlin thacangin zau haw, a taksa haw lumtiktu imah umma.

⁸ Mualhum nguah tompeh haw a; buknak a um ngawl hangin suangpi lim ahbel haw hi.

⁹ Mipha ngawl ten ca-ngah nautate sila in ngul haw; mi ca-ngah tei canote cu leiba ai-in la haw hi.

¹⁰ Mi cimkhamte cu puansilh nei ngawlin pualeu lamah hawh haw hi. Cangtel pua li haw naven a ngilkial leleng haw hi.

¹¹ Situi tukin olif ngawi haw, sabittui tukin sabit ngah ngawi haw hi. Mahnaven a dangdum leleng haw hi.

¹² Khuapi sungah a maliam mi le A thi li tohte au li haw; mahnaven a thungetnak haw cu Pathian in imah simsial ma.

¹³ Amuhte cu vaknak deih ngawltute haw hi; A thei hei thei ngawlin a lampi hei zui nuam haw ma.

¹⁴ Vak memial ten mithattu cu ca-ngahte le mi tingsamte that tukin tul, mahten zanin mitei na ngu.

¹⁵ Uire pa cu khuathim mun pen mi ngak hi, kuamah in kei mu haw tukma ti hi. Mitei theih tuk lau in, a mai khuh hi.

¹⁶ Nguca ten zanlamin mi inn keulet haw, mahnaven sunlamin innah ngelh haw; vaknak cu pialden haw hi.

¹⁷ Sun vaknak cu lau haw; mahnaven zan khuathim cu lau haw ma.

Zophar in:

¹⁸ Mipha ngawl cu tuilunin tai vawk hi. A ngam neihmi cu Pathian i tamsiatmi ngam hi; A sabit huanah nadek tukin hawh haw ma toh.

¹⁹ Vuk cu a satnak mun le a konak mun pen a zung bangin misualte cu mihing umnak ngamsung pen pai haw hi.

²⁰ Kuamah in thei haw ma, ama nu hei in cingleh ma toh; Tholung ten ei in, thingtu bangin lop khawng.

²¹ Itahim titale meivongte siatsuahin, ca nei ngawl a cingmi numei humah hehpihnak nei ma.

²² Pathian in, a huham tuah mi ngilte siatsuahin, mipha ngawlte thi haw hi.

²³ Pathian in himnak munah umtik, mahnaven a mit tuah zawldawt leleng.

²⁴ Hun comno sung cu mi lawhtingzet hi; mahnaven ngei ngawlin ah sami cangkung bangin le hampa bangin thimleh ta hi.

²⁵ Ka hilhmi bangin kha ma hi, tin a el theitu um uh cim? Ka otmi hi man ma hi tin, a langtik theitu um uh cim?