JOB Laibu (The Book of Job) 23 - Ngawm Bible

Job i donlehnak:

^1-2 Pathian hum a, ka phuknak cu luai dedeuh hi, Ka humah a khut a ngit leita hangin, phu ngawl le tau ngawlin um thei mang.

³ A hawhnak lampi ka thei ahin, A umnak mun vang ka thei ahin, nuamzet sing!

⁴ A lakah ka thute hen tung, ka thu cu cangkimno in hilh tung.

⁵ Ka lak a ot tukmi le, a don daan tukte vang thei nuamzet ing.

⁶ A huham neih zah tuah Pathian in kei do ni maw? Do lalam tukma, ka otmi komno in ngai saw tuk hi.

⁷ Cangkim ing, Pathian tuah thuson kawm tuk ung; mawhnak nei ma ci tin kumkhua phatin tituk hi.

⁸ Nisuahnak lamah zei zo ing, mahlai ah Pathian umma. Nitumnak lamah ka zei vangin umma leng hi.

⁹ Pathian cu saklam le hanglamah nadek hi; Mahnaven mu thei cuang mang.

¹⁰ Pathian in ka ke kal khat tianin mu hi, A khingkhai ahi tale sui bangin ka thianthoh lam thei tuk hi.

¹¹ Ka ca in, a tenmi lampi cu komno in zui ing; Taklamah hihen, veilamah hihen, pial hihim mang.

¹² Amu kam pen a tul a thupiakmi cu pialsan ngawlin bawl leleng ing. Ka deihmi hi ngawlin ama deihmi zui leleng ing.

¹³ Pathian cu thekdun, awng ma hi; kuamah in langpang thei haw tukma, a bawl nuammi cu kuamah in kham thei haw tukma.

¹⁴ Ka ca in tuptahnak a neihmite kimtik tuk hi, mah tuptahnak humah tuptahnak dang tampi nei hi.

¹⁵ A mai ah lauthawng zetin can li ing, mahmi ka ngaihsut ten lau ing.

^16-17 Ihempoh tithei Pathian in ngalphatnak ka neihmi hempoh pailaltik khawng; Thimnakin ka mit a cawtik vangin, A lautiktu ngangai cu thimnak kha ma hi, Pathian Amah hi.