JOB Laibu (The Book of Job) 22 - Ngawm Bible

Awn Dondun A Vei Thumnak ( 22:1-27:23 ) Eliphaz in:

^1-2 Iti bang mihing, micipbel ahi vangin Pathian ca in, mi nemcuam um ngai haw ni maw?

³ Thildik na bawlmi cu Pathian ca in a nemcuamnak um a maw? Ahimata na phatnakin Pathian ca in nemcuam a maw?

⁴ Nun hilhin khingkhai na tawh hi Pathian na kihcak hangin hi ma hi.

⁵ Na phatngawlnak a nase hangin le na sualnak a tam leita hangin hi saw hi.

⁶ Na unau in, a leiba lohlehtik tukin vaukhapnak bawltik ci, a puante lonsakin silh tuk dang imah nei ngawlin bawl ci.

⁷ A cawlin dangdum tei lakah tui pia ma ci, Ngilkialmi tei lakah an hei pia nuam ma ci.

⁸ Huham na neihnak le mi upa na hihnak cu, ngam buppi luah khawngnak tuk bekin mang ci.

⁹ Meivongte na bop nuam ngawl bek hei hi ngawlin Nu le pa nei ngawl ca-ngah tei nate lonsakin siatsuah ci.

¹⁰ Mah hangin na elkimah nangmah a awktu tuk thang tampi um; muanmawh ngawlpi in lauthawngnak tuah dim ci;

¹¹ Thimnak sah leita in imah mu thei ma ci, Tuihautungin khuh khawng hi.

¹² Vancung sangbel munah Pathian um; Aksi cu sang bok haw naven, Pathian in, zosuk hi ma maw?

¹³ Mahnaven nangin, “Pathian in i theih li tuk kaw? Meingo in lim si! Itin kaw ka thu a khen theih tuk?” tin ti ci.

¹⁴ Vankuumpi humah Pathian a hawh ten Meingo sah zetin limin keimah mu tukma poh, tin ngaisung ci!

¹⁵ Mipha ngawl tei zui lelengmi lampi lun cu zui nuam leleng laih cim?

¹⁶ Mi pha ngawlte cu a hun haw kim laih ngawlin tuihautungin tai hi; A bulpi haw tuah tai vawk khawng hi.

¹⁷ Hite cu Pathian a eltu le, ka hum uhah imah bawl thei tukma tin a ngaisungtute hi.

¹⁸ Mahnaven amuh a hautiktu cu Pathian Amah leleng hi; Mipha ngawl tei ngaihsutnak cu lem hihim mang.

¹⁹ Mi pha ngawlte bawlsiatnak a tawh haw ten, miphate lungdamin, mawhnak a nei ngawlte nui haw hi.

²⁰ Mipha ngawl tei thil neihmi hempoh cu bo hi. A tang calam vang mei in kang khawng hi

²¹ Mah hangin Job, Pathian tuah lemdun unna, amah cu na ngalin ngaisung toh pahsun, mahtin na um tale nangmah cu muicu pia tuk hi.

²² A thu zilhmi cu pom inna, a awn cu na lungmu sungah koihin hi.

²³ Hi zuh hi, niamkhiatnak lungmu tuah Ihempoh titheitu i lakah kik inna, na inn sung a thilpha ngawlmi hempoh cu khawlapi ah vawkin; nang cu lawhting lehtik tuk hi.

²⁴ Na sui neite vawk khawngin; Ofir pen na ngahmi na sui phabelte vang lui suang bangin vawk khawngin hi.

²⁵ Ihempoh tithei Pathian cu na sui hi tuk a, Amah cu a cuampengno in, na tenmi ngun bangin na ca in hi tuk hi.

²⁶ Pathian cu na lungdamnak hi leleng tuk a, mitmai pha tuah Ama lamah thinnopno in, hek tuk ci.

²⁷ Thu na nget ten don tuk hi; Na thutepmite cu komno in cangkimtik tuk ci.

²⁸ Na thu soncatmi hempoh bawlsuak khawng hi tuk a, na hawhnak lampi vak tuk hi.

²⁹ Pathian in mi pualthaute khesukin, mi nuai a umte pan hi.

³⁰ Na bawlmi thiangtho in, sualnak nei ngawl na hi tale Amah in pan tuk hi.