JOB Laibu (The Book of Job) 21 - Ngawm Bible

Job i donlehnak:

^1-2 Ka otmi hi ngai hem un! Kei na hehnem theihnak uh cu mahmi bek hi.

³ Ot theihnak hun pia bok un, ka celh ten na nuam uh tale nuihsanleh poh un.

⁴ Mihing tuah thu eldun hi ma ung! Ka thin a com vangin mawh mang hi.

⁵ Keimah hu zo hem un! Lung-am thinsu le awn ngawlin na kam uh hup uh ci!

⁶ Ka hum a thil a piangmi ka ngaihsut ten, ka thinkham leita in can li ing.

⁷ Ita Pathian in mipha ngawlte hi a nunnak haw a khawih? A san haw sautikin, hau dedeuhin, a bawl hi?

⁸ A tu le cate a pitung haw tian mu manin, a nun haw?

⁹ Pathian in, a innkua hawah haksat lungbingnak hengtik ngawlin, Thinsuk lauthawngnakte tawk awng haw ma.

¹⁰ Hi zuh hi, a khui haw himdamin bawngsiatnak tawk ngawlno in pung haw hi.

¹¹ A canote cu suk le to ah tai in tuuno bangin ummai haw hi.

¹² Tingtang le khuangno tumin lam dediam haw hi.

¹³ Lungmuang zetin tekkun tian nungin haksatnak thuak ngawlin mengdenin thi hawta hi.

¹⁴ Mi pha ngawlin, “Keimah zamsanin,” tin Pathian ti haw; “Na lampi hi a theih hei nuam ma ung,” ti haw hi.

¹⁵ Ihempoh tithei biak lih vang kulma, a lakah thunget lih vang imah nemcuam ma, tin ngaisung haw hi.

¹⁶ Ka cahnak uh tuah lawhting leng poh ung, ti haw hi. Mahnaven a ngaihsutdan haw cu sang thei mang.

¹⁷ Mipha ngawl tei meilah vaakmi mit awng maw? Amu lak pen akua bekin haksatnak tawk awng haw maw? Pathian in, a thinukin, mipha ngawlte bawlsia awng maw?

¹⁸ Hampa ko bangin huih i muh tukmi le Leivul bangin huihsia i muhvawk tukin bawl maw i heng?

¹⁹ A pa i sualnak hangin a ca i humah, Pathian dantatnak heng, ti uh ci. Mah kha ma hi, misual humah Pathian bawlsiatnak heng hen. Na sual uh hangin bawlsia ing hi, tihvang ciangno in langtik hen.

²⁰ Misual ten a sualman siatsuahnak thuak haw hen; Ihempoh ti thei Pathian i thinuknak tawk haw hen

²¹ Mi pa khat a nunnak ni a bo ten a zamta mi a innkua le a cano tei thu theileh tuk toh maw ikaw?

²² Akua bekin Pathian zilh theitu um haw ni maw? Van a ummi tei hum hei ah thu a khentu Cungnungbel humah!

^23-24 Mi khenkhat cu a thih ni haw tian midam hi haw in; Lungdam le thinnopin, a taksa haw phazet leng thahin, thi haw hi.

²⁵ Mi khenkhat cu lungdamnak nei awng hihim haw ma; Thinkhamin nung haw a, thinkhamnak leleng cu thi cih hawta hi.

²⁶ Mah pa nihte cu thi haw in vui hi hawta; A pa nih haw in thanlung tuah dim veve haw hi.

²⁷ Iti bang ngaihsutnak nei uh cim tih thei ing. Keimah siatsuah tukin ngaihsutnak pha ngawl nei uh ci tih thei ing.

²⁸ Noh ten mihau pa i inn cu ilai ah kaw? Thil pha ngawl a bawltu pa cu ilai ah um kaw? tin dong uh ci.

²⁹ “Khualzinte tuah otpihdun awng ma uh cim? Amuh ten a hilh haw mi thu thei awng ma uh cim?”

³⁰ Pathian cu a thinukin, mi a bawlsiat ten, a luattu cu mipha ngawlte hi mek haw hi.

³¹ Mipha ngawl pa sual nawntu tuk akua bek um haw maw?

³² A thih ten phano a cinmi khanmualah vui tukin zawng haw hi.

³³ Mi thawng tampi ten hen haw a, phazetno lei ah vui haw hi.

³⁴ Noh ten imah ngawl thu tuah hehnem tum uh ci; Na otmi hempoh uh hi zolthu ngeh hi.