JOB Laibu (The Book of Job) 20 - Ngawm Bible

Zophar in:

^1-2 Job, ka thin pulhangtik ci, na thu donleh ngawlin um thei ma toh ing.

³ Na otsa mite hi mi zotsaknak awnkam ngeh hi; Mahnaven iti bangin don tung tih cu thei ing a, theihtupnak nei ing.

⁴ Na theih bangin, tanglaih pen panin, leihumah mihing a um pat laih haw pepan,

⁵ Mipha ngawl i lungdamnak cu hun comno sung bek phat hi.

⁶ Khangto in, van a khongto haw hei hihen, a lu in van a tawngkha hei in hi.

⁷ Leivul bangin huihin mutvawk tuk hi; A thei satu ten ilai ah kaw, ti li haw tuk hi.

⁸ Zanmang bangin pai tuk hi; Mang a muhmi bangin ituk mahten muhleh um tukma toh.

⁹ A mutu tei mitin muleh haw tukma toh hi; A um meknak mun pen pai tuk hi.

¹⁰ Ca-ngah cimkham tei lak pen a ngukmi nate cu, A capa ten a neihmi sung haw pen pia kikleh haw tuk hi.

¹¹ Khangno lai a, a ngil zetmi a pumpi cu, ngei um ngawlin leivul suak tuk hi.

¹² Thil pha ngawl cu hum zetin thei hi, mah hangin a khenkhat cu a kam sungah muam hi.

¹³ A leinuai ah ngeipi koihin, a hum leita hangin seleh nuam ma.

¹⁴ Mahnaven mah a neihmi cu, a hapum sung pen kha hi; Thihsi bangin kha hi.

¹⁵ Mi pha ngawlin a ngukmi na cu law tulleh khawng hi; Pathian in longlehin, a hapum sungta hei pholhleh hi.

¹⁶ Mipha ngawl tei eihmi cu ngulhang i ngu bang hi.

¹⁷ Tui bangin olif situi luang cu mu tukma hi; khuinawi le khuaihum a luangmi vang mu tukma hi.

¹⁸ A nadeh man hempoh ei lalthong khawngin, a vawk kul tuk hi, A hauhnakte nop zetin mang kha man tukma.

¹⁹ Itahim titale ca-ngahte nemsukin imah simsial ma hi. Mitei inn saksate lonsak hi.

²⁰ A hampumnak haw cu bo tih nei ma naven, a sunloihmi nate hei hup theihmi imah nei cuang haw ma.

²¹ In le ei in, a khambang imah umma; a hauhnak cu ngeican ngawlin bo hi.

²² Lawhting zetin, a um laihtakin bawngsiatnak heng hi. Haksatnak le bawngsiatnak nase zetin, a lakah heng hi.

²³ A duhzahin ei poh hen! Pathian thinuknak cu a lakah mei alh bangin alh tuk a nguah bangin a humah zutuk hi.

²⁴ Thik ngalnam pen a luat nuam hei in, Daal thalcangin kha in, a thin sun kha leng hi.

²⁵ Thalcang cu a pumah mutin, mah thalcang cu dawk ngah haw; A de mi a zik hiam pen thi cak khat nung cak khat caksukin; ama humah launak ngeh dim hi.

²⁶ A khawlsa na hempoh cu siatsuah khawng haw; mihing i lap ngawlmi mei in amah le a innkuate kang khawng haw hi.

²⁷ Hi pa i sualnak cu van pen langtik hi; Amah do tukin leipi cu tho hi.

²⁸ Pathian thinuknak cu tuihautung bangin heng tuk a, a hauhnak hempoh a venghawngin siatsuah tuk hi.

²⁹ Mipha ngawl tei tawhmi cu mah bang hi; Amu ca in Pathian i laitek sa hi.