JOB Laibu (The Book of Job) 2 - Ngawm Bible

Satan In Job Khingkhai Leleu

¹ Topa i mai ah vancungmi tei khopkhawm ni heng lehleu in, Satan vang a lak hawah tel kha leleu bok hi.

² Topa in, “Ilai lam pen hung nge cim?” tin dong hi. Satan in, “Leihum buppi ah suk le to in, ka vah kawkawi nikneknak pen hung ing,” tin don hi.

³ Topa in, “Ka sila Job thei kha cim?” tin dong hi. “Leihumah amah bang mipha le muantak kuamah um haw ma hi. Keimah bia in, thilpha ngawl imah bawl ma hi. Thu bulbat um ngawlin Job cu, ‘Siatsuah tung,’ tin, keimah na lem hangin lungkim pih ing; mahnaven Job cu a masa bang lengin muantakin nung leleng,” ti hi.

⁴ Satan in, “Mihing cu akua nabang hei in, ama nunnak sangin a neihmi hempoh bo tuk cu phal saw tuk hi.

⁵ A tisa na bawlsia ngangai tale na maicang loli pen nangmah tam tuk poh hi,” tin don hi.

⁶ Mah hangin Topa in, “Na tih bangin hihen. Job humah na deih bangin bawl thei ci. Mahnaven amah cu that pahsun,” tin, Satan cu ti hi.

⁷ Satan cu Topa i umnak pen tulin, Job i pumpi cingah, a sip pen a kelek tian meima sia veitik hi.

⁸ Job cu vut lakah khungin, a meima cu beelkeh tuah khuat liphet hi.

⁹ A zi in, “Masa lam bang lengin muantakin, um leng laih cim? Ita Pathian cu tamsia in, thi saw ma kam?” tin ti hi.

¹⁰ Job in, “Numei sil bangin awn ci mei! Pathian in, na pha a piak ten a lung uh dam hi. Haksatnak a lak uhah a hen ten ita phu li tuk kam hung?” tin ti hi. Hiti bangin thuak naven Job in, Pathian humah awn sia kam khatno hei hah viang ma hi.

Job Ngualcamte Hung Haw

¹¹ Job i ngualcam pa thumte cu: Teman khua pen Elifas, Shuah ngam pen Bildad le Naamah ngam pen Zofar haw hi. Job i haksat thuaknakte a zak haw ten a lakah lengin, thasiatpih tukin le hehnem tukin hawh haw hi.

¹² Khawla thim pen amuh haw ten Job cu theikhen haw ma zo. Job hi tih a theih nung haw ten lungsia khawngai le kap le kio in, a puan haw botkekin, leivulte vanlamah thehto in, a lu haw thehdun cop haw hi.

¹³ leihumah sun salih le zan salih sung khungin, a thuak dante amuh haw hangin kuamah in kam khatno hei awn kha ngam haw ma hi.