JOB Laibu (The Book of Job) 19 - Ngawm Bible

Job i donlehnak:

^1-2 Ituk tiang lawlawm kaw na ot uhmi tuah kei na bawlsiat lih tuk laih uh?

³ Vei sialcelh ngawl tianin zawnsak uh ci. Hiti bangin kei na zotsak uh hangin zahcak tuk hei ngaisung ma uh ci.

⁴ Sualnak ka bawl ngai ahi hei in, noh tei natnak tuk ikaw a um?

⁵ Keimah sangin mipha deuhin ngaisung cawm uh ci; Ka thuaknak hangin mawh hi, tin ngaisung uh ci.

⁶ Hi bangin a piangtiktu cu Pathian hi tih thei zo ma uh cim? Keimah awk nuamin thangsiah hi.

⁷ Thisan luangtik hi, tin ka au hei in kuamah in ngai haw ma. Bopnak ngen naveng a manno in thukhentu kuamah um haw ma.

⁸ Pathian in ka lampi khakin, hawhleh thei ma toh ing; ka lampi cu thimtik hi.

⁹ Ka sunloihnak hempoh lonsak khawng zo; ka minthannak hempoh botik khawng zo.

¹⁰ Mun tihkim pen kei cu vat hi, ka muansannak cu thingkung bangin a bul pen bong hi, Thiim tuk le thi tukin keimah zam hi.

¹¹ Ka humah a thinuknak cu mei bangin alh hi; a ngal lauhuaibelin koih hi.

¹² Keimah do tukin a ngalkapte hah hi; ngal buknak tukin khuk co in, ka deubuk kil khawngin panmun khual haw hi.

¹³ Pathian in sosuahin ka unau ten taisan khawng haw; keimah a thei satu vang mikhual suak khawng hawta.

¹⁴ Ka unaupih ten kei taisanin, ka ngualcam ten zamsan haw hi.

¹⁵ Ka inn a cam mek haw ten kei cu phawkngil khawng zo haw hi; Ka umlawh numei ten mikhual le ngamdangmi in ngaisung haw hi.

¹⁶ Ka umlawh sam naveng don ma; bopnak ngenin ka lem hei ten ka lakah zuan nuam ma.

¹⁷ Ka zi in ka haihawh namsia thuak thei ma; Ka suahpih ka unau ten ningdelh haw hi.

¹⁸ Naupang ten amuh haw ten zawnsakin nuihsan haw hi.

¹⁹ Ka ngualcam phabelte hei in ningdelh haw, ka ihbel mite ka ngalin suak haw hi.

²⁰ Ka nguh humah ka vun khai leih luih; nung zo cacang ing.

²¹ Noh cu ka ngualcamte uh ci! Hu hehpih zal un! Pathian khutin vatvawk hi.

²² Pathian in kei a bawlsiat bangin ita nohte vangin kei bawlsia bok kam uh ci? Hi zah na thuaktik uh hi lungkim ma laih uh cim?

²³ Hiti bangin ka otmi hi akua poh bekin, a khum haw ahin, laisungah a ngan haw ahin deih na veng!

²⁴ Mahma tale cikut tuah suangpeek humah nganin, kumkhua kho tukin, ngan ahin deih na vengin!

²⁵ Mahnaven kei a pantu cu a nung tih thei ing; a tawpnak ten kei panpihleh tuk hi.

²⁶ Natnakin ka vun cu a ei khawng vangin, hi ka taksa tuah Pathian cu mu tung.

²⁷ Ka mit loli tuah amah cu mu tung, midang hi ngawlin keimah cikcekin mu tung hi. Mahmi cu ka lungmu in ngakhelzet hi.

²⁸ Itin kaw a bawlsiat theih tuk uh, na tih uh hangin ka tha neihmi hempoh bo khawng zo. Keimah bawlsia nuamin thudang zei uh ci.

²⁹ Mahnaven atu-in ngalnam cu lau toh un! Sualnak hum a Pathian thinuknak a hengtiktu ngalnam cu! Mah tih bangin thukhentu na um hi tih thei tuk uh ci.