JOB Laibu (The Book of Job) 18 - Ngawm Bible

Bildad in:

^1-2 Job, nangmah bang mihing hi, mengden thei ma cim? Ka thu uh ngai tukin cawl hih inna, hilh hih bok ni ung.

³ Nganhing bangin a silin, ngaisung ci, itin kaw ngamsa bangin na ngaihsut?

⁴ Na thinuk hangin thuak dedeuh ci, nangmah i hangin leipi hi phillawnin suak tuk maw? Nangmah hangin mualte hi, thawn haw ni maw?

⁵ Mipha ngawl tei mei-inn cu mit tuk hi, A mei haw cu ituk mah hei ten alhleh tukma toh.

⁶ A puanbuk sung haw a mei-inn cu mit tuk hi.

⁷ A ke kal haw khohzet naven atu-in, a ke bai haw hi; Amu ngaihsutnak hangin lumthong hawta hei.

⁸ Suuk sungah hawhin, a ke haw pen awk hi, dup luatmi sungah cak haw hi.

⁹ Thangin, a ke cawk haw awkin, luat ngawlin kolah tang haw hi.

¹⁰ Leihumah kepal thangsiah haw in, a lampi hawah thang siah haw hi.

¹¹ A kimkotin mullinghuai ten pang haw, a hawhnak haw hempoh ah zui hi.

¹² Mihau hi haw naven atu-in, ngilkialin, a tha bo hi. A el haw pen siatnakin pangin, a lup haw tuk bek ngak hi.

¹³ A pumpicing haw in, natsia thuakin, a khut le kete muatzan khawng.

¹⁴ Lungmuang zetin, a umnak haw puanbuk sung pen doktul vawk haw a, Thihnak Kumpi tawk tukin kai vawk haw hi.

¹⁵ Atu-in, akua hei in, a puanbuk sungah um thei haw, natsia umma toh hen, tin kaat mei alh tuah haal haw hi.

¹⁶ A nuailam pen a zung thi in, a humlam pen a kakte thim haw hi.

¹⁷ A min haw cu a khua le a ngam hawah, ngamdang hei ah bothal hi; Lampi ah kuamah in theileh haw ma toh hi.

¹⁸ Mihing umnak leihum pen hawlvawk hi haw tuk hi; vaknak pen a thimnak sungah hawlvawk tuk hi.

¹⁹ Cikhaih casuan kuamah nei haw ma, amu nungten a nungtu umleh haw ma toh.

²⁰ Nisuahnak pen nitumnak tian mipi ten mah thu a zak haw ten, a thinsu in, can tawtok haw hi.

²¹ Pathian a simsial ngawltute le mipha ngawl tei tawhmi le dinmun cu mahtibang hi.