JOB Laibu (The Book of Job) 17 - Ngawm Bible

¹ Ka nunnak bo awndiak toh; Hai hei hawh zoleh matoh ing. Khanmualin keimah ngak leng.

² Kei a zawnsaktu ten kil khawng haw, a zotsaknak haw cu catngawlin zo ing.

³ Maw Pathian aw, na ngetmi thutepnak cu pia in hi, kei a pantu tuk akua um cuang haw tuk kaw?

⁴ Thu ngaihsut thiamnak nei tuk ngawlin a lungmu haw bin khawng ci. Mah hangin amuhte cu nehtu hitik zal pahsun.

⁵ Tanglaih thupaucapah, mi pa khatin sum le pai deihin, a ngualcam a suam ahi tale, a cano haw a mitcaw tuk hi’ tin um hi.

⁶ Mah thu tehkipnak cu ka humah hengtik haw; ka lakah mi hungin ka mai pen cilsiak haw hi.

⁷ Ka thasia in, ka mit vang thim khawng awn zo; ka khut le ka kete cu lim bangin ngawm hi.

⁸ Mifelzet ing tin, a ngaisungdun copte a lungbingin, a venghawng haw in, Pathian thei ngawl tin kei cu lawl khawng haw hi.

⁹ Upat takmi ing tin, a ngaisungdun cop ten, dik ung hi tin muangdun sesem haw hi.

¹⁰ Mahnaven a venghawng haw in ka mai ah a ding haw a hin, A lak hawah micip pa khatno hei mu tuk mang.

¹¹ Ka nunnak ni cu let pepel hi, ka tuptahte pai dedeuh haw a, ka thuduhsamte bo hawta.

¹² Mahnaven ka ngualcam ten zan khi sun ti haw, khuavak awn toh ti haw hi. Mahnaven kei cu khuathim sung lelengah um ing.

¹³ Ka muansanmi cu mithi khua Sheol bek hi; Mahlai mun khuathim sungah ka zauphah phah tung.

¹⁴ Khankhuuk cu ka pa, ti tung a, keimah a eitu thanlungte cu, ka nu ahimata ka celnu ti tung.

¹⁵ Ka muansannak cu ilai ah um tuk kaw? Ka muansanmi a mutiktu a kuabek um haw tuk maw?

¹⁶ Mithi khua Sheol ka hawh ten, muansannakin zui thei tukma hi.