JOB Laibu (The Book of Job) 16 - Ngawm Bible

Job i donlehnak:

^1-2 Mahti bang awn cu vei tampi za zo ing, Na hehnemnak cu ka ca in thuak sesemnak bek hi.

³ Cawlngawlin maw na otlih tuk uh? Ka ot uh a bo laklawh tin maw na tih leleng tuk uh?

⁴ Ka dinmunah nangmuh umin, na dinmun uhah kei ka um ahin, na ot uhmi bang hi awn thei bok tung. Uangdun zetin ka lu kai ngaw ngok tung a, ka otmi in, tuiting bangin nim khawng tung.

⁵ Ngaihsutnak phapha tuah na tha uh ngiltik tung; Ka mukkam pen a tulmi awnkamin nohte cu hehnem theizet tuk hi.

⁶ Mahnaven ka otmi hi, nemcuamnak imah pia ma; Cingdenin ka um vangin ka thuak lawmcang cuang ma hi.

⁷ Maw Pathian aw, kei cawl leitatik zo ci, ka innkuate vang thitik khawng zo ci.

⁸ Nangmah in kei bawlsia ci, nang cu ka ngal hi ci. Ka vun le ka nguh bek tang zo. Mahmi hangin miten keima mawhnakin ngaisung haw hi.

⁹ A thinukin Pathian in kei cu botthem khawng; a huatnak tuah a hacang ngawi san hi; a mitkemin catngawlin kei zo.

¹⁰ Mipi ten a kam haw kau in nuihsan haw, ka elah hungin ka mai pen beng haw a tangkhawmin keimah langpang haw hi.

¹¹ Pathian in mipha ngawl tei khut sungah hengtikin, Pathian kihca ngawltu tei lakah kei cu vawk hi.

¹² Mengdenin, ka umlaihin kei siatsuah hi; Pathian in ka ngawng pen sanin, sawpnekin vawk hi. Pathian in, a muibatmi in kei bawl hi.

¹³ Mun tihkim pen a thalcang tuah kapin, thalcangin kha in, liamsuah hi; Mahnung hei ten hehpihnak nei ma hi.

¹⁴ Tu le tu liamsuahin, ngalkap thinso bangin keimah nuai niknek hi.

¹⁵ Mithi ngai in um ing, ka vun khuhnak tukin thangkhau puan silh ing; Atu-in, leivul lakah lungbingin khung ing.

¹⁶ Ka kahnak hangin ka maite san khawng; ka mitte bum khawngin, ka mitvunte dup keihkuih khawng hi.

¹⁷ Mahnaven mi thisan luang tukin ka khutin imah bawl ma; Pathian lak a ka thungetnak cu lamcam leng hi.

¹⁸ Maw leipi ka hum a thil sual a bawl haw mi hi sel zal pahsun; Diknak um hen tin ka aunak aw hi mengdentik pahsun.

¹⁹ Ka thutheitu vanah um hi, kei a pantu cu a sannak munah um hi.

²⁰ A hilhsaktu cu ka ngualcam pih hi, Pathian amah bek catngawlin ka hi tui tuah zo ing.

²¹ Mihingin, a ngualcam pih a pat lih bangin, mi pa kha khatin Pathian mai ah kei a panleh bok ahin, deih na veng!

²² Ka kum cu let pepelin, ka zuileh tuk ngawl toh lampi zui ing.