JOB Laibu (The Book of Job) 15 - Ngawm Bible

Awn Dondun A Vei Nihnak ( 15:1-21:34 ) Eliphaz in:

^1-2 Job, na otmi hi phukthong ngeh hi. Nisuahnak lam pen a hengmi huih bang thong.

³ Na ot bangin micip kuamah in awn tukma hi; A sullam nei ngawl awnkam tuah kuamah in amuh le muh patdunnakin mang haw tukma.

⁴ Pathian kihca tuk ngawlin mi thapiatu hi ci, a lakah thungen nuam tuk ngawlin bawl ci.

⁵ Na phatngawlnak cu na kam pen tulin, na tenmi cu mizolnak lei hi.

⁶ Keima lawl hei kulma, na awnkamin sual nawnin, lawl zo hi.

⁷ A suak masabelin, ngaisungdun cop cim? Pathian in mualte a semsuah laihin um zo toh bang kek si?

⁸ Pathian i tuptahnak thei ham zo cim? Mihing cihnak hi nangmah bek i neihmi in maw na ngaihsut?

⁹ Na theihmi hi ka theih uh ngawlmi imah umma. Na theihmi ka theih uh ngawlin um kaw?

¹⁰ Ka cihnak uhte puakpaksa upa, na pa sangin upa saw lak pen ka cun uhmi hi.

¹¹ Pathian i hehnemnak awnkam nemno hi na ca in imah nemcuam ma maw? Ita pom nuam leleng ma nge cim?

¹² Na mitmai pha ngawlin, na thinukin kei zo ci.

¹³ Pathian humah thinukin, ita thusia pawi ngam li cim?

¹⁴ A thiangthomi um thei ngai ni maw? Pathian mai ah midik um ngai haw ni maw?

¹⁵ Pathian in, a vancungmi hei muang ma hi, A mai ah amuhte hei thiang haw ma.

¹⁶ A nawngkai mi, dikcangnak imah nei ngawl, Tui in bangin siatnak bebek a intu mihing cu, iti zahin thiangtho ngawl sesem tuk kaw?

¹⁷ Mah hangin Job ka theih bokmi hi ngai hemin! ka muhmi na lakah phuang tung.

¹⁸ Micip ten a pa tei lak pen, a cun haw mi cihnak thutak cu ohte zilh haw hi. A ip haw mi imah umma hi.

¹⁹ A ngamsung hawah ngamdangmi kuamah um haw ma, Pathian lak pen a puitultu tuk kua mah um haw ma hi.

²⁰ Mipha ngawl le misual ten a nunsung hempoh ah haksatnak tawk hi. Hehpihnak a nei ngawltu tei ca in bawlsiatnak cu koihsak sa in um hi.

²¹ Lauthawngnak aw cu a beng sungah catngawlin nging hi. Him ing ngei, a tih laih takin nguca ten suam haw hi.

²² Thimnak sung pen luat thei tukin muansannak nei ma hi, Ngalnamin amuh that tukin munkhat pen ngak hi.

²³ A luang ei tukin langta mupi ten zo leng haw hi. Ka mailam cu thimzet hi tih cu thei haw hi.

²⁴ A ngil zetmi kumpi bangin siatsuahnakin do tukin pang leng hi.

²⁵ Ihempoh tithei a dodaltu le, Pathian nelah a khuttum a zak litu cu mahti bang cu na hihi.

^26-27 Mi pualthau le mi ngawngtawhin, lungmu khoh zetin, a lumphaw cu dangto in, Pathian do tukin mai ah not hi.

²⁸ Khua tampi a nehtu le, inn lopte a luahtu cu amah hi. Mahnaven ngaldonak a um ten mah khua le innte cu sia khawng tuk hi.

²⁹ Kum ngeipi hau tukma hi, a neihmite ngei phat tukma hi, a lim tianin tham tuk hi.

³⁰ Thimnak sung pen luat tukma hi; kang mei in, a kang khawngmi, a pak huihsia i nuai pekmi thingkung bang hi tuk hi.

³¹ A silnak hangin siatnak bek a muansan tale, a co tuk cu siatnak bek tuk hi.

³² A hun kim laih ngawlin thim tuk a, thingkang bangin ko in, hingleh tukma toh.

³³ A min laihngawlin, a ngah a kulh khawngmi, sabit kung bang hi tuk a, a pak kulhmi cu olif kung bang tuk hi.

³⁴ Pathian thei ngawl ten casuan nei haw tukma hi, Nawhthuh sumpai tuah a sak haw mi inn cu mei in kang khawng tuk hi.

³⁵ Amuh cu mi siatsuah a tumtu le phatngawlnak a bawltute hi; A lungmu haw cu mizolnak bek tuah dim hi.