JOB Laibu (The Book of Job) 14 - Ngawm Bible

¹ Numei sung pen a tul mihing hempoh, a nun haw comin, cimkhamnak thuak haw hi.

² Paak bangin khang haw naven, ziamleh haw; Lim bangin thamthong hawta hi; ngei phaat haw ma hi.

³ Pathian, na mit hem hei in zo nuam tuk cim? Ka humah thukhen tukin na mai ah tulpih ngai tuk cim?

⁴ A thiang ngawlmi mihing sung pen, a thiangmi tul thei ni maw? Tul thei awng tukma.

⁵ A nuntuk kumzah cu ciangtan sa hi. A ha zah cu ngaihsutsa in um hi. Na leitek sa khawng hi thekleh theih hi haw ma toh.

⁶ Mun dang heksan inna, amah bek zamin hi; A nunnak haksat ni cu a noppih theihbelin noppih tahen.

⁷ Phuh sami thingkung ca hei in muansannak umlaih hi; tawtlehin nungleh tuk hi. A zung dawnnote khang pepelleh tuk hi.

⁸ A zungte tek haw in, a bul cu leihumah a ko hei in,

⁹ Tui a ngah ten tawtlehin, thing dawnno bangin poleh tuk hi.

¹⁰ Mahnaven mihing a thih ten bolal ta hi. A thih nungten ilai ah kaw a um?

¹¹ A kokangmi lui bangin le a kangmi tuipi bangin,

¹² Mihing a thih ten tholeh ma toh hi, van hempoh a bolal laklawh khangloleh haw tukma toh hi. A hihbuhnak haw pen tholeh haw tukma toh hi.

¹³ Mithi khua Sheol ah kei na sel ahin deih na veng; a thinuk a paih laklawh kei hu sel zalin hi. Nangmah in, a hun ciangtan inna, kei na theih kikleh hun tuk na koihin hi.

¹⁴ Mihing a thih nungten nungleh thei ni maw? Mahnaven hunpha ngak tung, tu a haksatnak hun mual a leh tian ngak tung.

¹⁵ Mah hun ten kei cu sam tuk ci a, donleh tung hi, Na khut tuah na semsuahmi keimah in ka hum a, na lungdamnak cu mu tung hi.

¹⁶ Ka ke kal cu zo cangcian tuk ci, mahnaven ka sualnak cu velthel li tukma ci.

¹⁷ Ka mawhnak cu ngaidamin, vawksak khawng tuk ci; phat ngawlnak ka bawlmi hempoh nawtciang tuk ci.

¹⁸ Mualte a cim khawng hun heng tuk hi, suang ngengpite pholhlet khawng hi haw tuk hi.

¹⁹ Tui in suangte ei khawngin, hawktui in lei taivawk khawng; Mah bangin mihing tei nunsung a muansannak hempoh pai vawk khawng hi.

²⁰ Mihing cu kumkhua phatin neh ci, mahten pailal khawng haw hi. A thih ten a melte thekin hawlvawk tuk ci.

²¹ A capa ten minphatnak ngah haw naven theileh ma toh; A min a siat haw hei ten thei cuang ma hi.

²² A taksa pumpi a nat bek thei in, a lungmu haksatnak bek thuak hi.